Read Biete JEREMIA 27 Bible Online

JEREMIA 27 - Biete bible

JEREMIA 27

¹Juda rêng Josia naipa Zedekia inlal phut lâiah khan PUMAPA thu ki ziangah a zuang tlung a.

²PUMAPA khan ki ziangah, “Ringkol sin inla, a rui savun ikhop inla, ni ringah ribât roh.

³Khanchu, Edom rêng hei, Moab rêng hei, Tura rêng hei neh Sidon rêng hein Juda rêng Zedekia mu ranga Jerusalema an palâi hong tirhei [41] khah hi thu hih ithon rangin a ne ril a.

⁴PUMAPA Tinrêngthothei, Israelhei Pathianin an rênghei iril rangin anni chu thu peh rangin a ne ti a:

⁵Ki sinthotheina roinpui tak neh ker tha lian takin rammual hei, miriam hei neh rinênga mîring tinrêng hih ki siam a; khahei khah ipeh ranga kî nuamhei ziangah ki pêk ngai a.

⁶Atûn khomah hin hi ram murdihei hih ke som Nebukadnezara, Babilon rêng kutah keiman kî pêk a nit; ramsahei tena khom ama sin itho rangin kî pêk a nit.

⁷Ama ram a siat zoro a tlung mâkah chu nam tinrêngin amah neh a naihei neh a tuhei sin chu thông an ti. Kha rizoin chu nam itam takkahei neh rêng roinpuihei suakin om an ti.

⁸“Babilon rêng Nebukadnezara sin tho nuam ino neh a thunuaia khûn nuam ino nam neh rêngram chu khandai hei, iṭâm hei, ripui hein kuttum kî tho rang a nit, ki kut irât tak Nebukadnezara mangin anni chu ki înrimang vang rang a nit.

⁹‘Babilon rêng sin tho no tin u,’ itia nangni ril ngai nin zânthlahei, nin thlasân ithiamhei, rimang rilfiatuhei, mithi rithla sôn thiamhei, dôi imanga thil hong itlung rang inpuang theia ribehei ṭong kha ringai no rei.

¹⁰Nin ram ata ilah takah iṭhuipai nin nit theina rang neh nangni ke chekindarnaah nin rimang theina rangin nin ziangah milak thu an înpuang ngai a nit.

¹¹Khannisela, Babilon rêng thunuaia khûn a, a sin ithotu nam chu anmani ram ngêiah in-om nôk ki ta, amakhan loihei thông an ta, om mai tâng an ti. Keimah, PUMAPA hin kî ti a nit.”

¹²Kha thu ngir khah Juda rêng Zedekia ziangah khom ki ti a: “Babilon rêng thunuaiah ikhûn inla, amah neh a mihei sinthon la; khanchu, ring ni ti.

¹³Babilon rêng sintho nuam ino nam tong rang PUMAPA îsîr tâk khah îtho rang im khandaihei, iṭâmhei, ripuihei ituangin nangmah neh ni mihei chu nin ithi rang?

¹⁴A zianga ripelût loi ranga nangni riltu zânthlahei thu khah ringai no rei, nin ziangah milak thu pipai an îsîr a nit.

¹⁵PUMAPA khan amah ngêiin anni chu kî tir ni mak a, ker mingin nin ziangah milak an itho a nit, ai ti a nit. Khasikin, nangni ûm isuang a ta, ithatin om nin ta, nin zianga thuno riltu zânthlahei neh khan rimang nin ti.”

¹⁶Khanungchu, thiampuhei neh mipuihei chu PUMAPA thu khah ke ril a, “Tempila bûrbêl chu Babilona rithokin hong ilah kîr nôk zel nîng a ti, ititu zânthlahei thu sîr zôm no rei, milak thu nangni an îril a nit.

¹⁷An ṭong ringai no rei. Babilon rêng thunuaiah ribeiriam unla; khanchu, ring nin ti. Îtho rang im hi khopui hih nimnok buk ai chang rang?

¹⁸Zânthla an init titak a nit a, PUMAPA thu an idong a nitin chu Tempila bûrbêl la omhei, Juda rêng-ina omhei hih Babilon ramah ichôi a nit khâi nona rangin Tinrêngthothei PUMAPA ziangah ngên riseh.”

¹⁹(Babilon rêng Nebukadnezara khan Juda rêng Jehoiakima naipa Jehoiakina neh Judai ram neh Jerusalema mi inlârhei murdi a ṭhui lâiah khan dâr chopui risânghei, dâr tuipanghei neh â ṭhungnahei banah Tempil bûrbêl ṭhenkah ai mâk a nit.)

²¹“Keimah, PUMAPA Tinrêngthothei, Israelhei Pathian khan Tempila neh rêng-ina bûrbêl la omhei chungchânga ki thu sîr hih ringai rei:

²²Babilonah ichôi riai nîng a ta, ki ngaisak nôk mâkah amakhan om a ti. Khanungchu, hong chôi kîr nôk ki ta, hi mun ngêi hih inchuan nôk ki ti. Keimah, PUMAPA hin kî ti tâk a nit.”