Read Biete JEREMIA 28 Bible Online

JEREMIA 28 - Biete bible

JEREMIA 28

¹Kha kum ngirah khan Judai ram rêng Zedekia inlal kum ilina, a thla ringanaah khan zânthla Hanania, Azura naipa, Gibeon khua mi khan Tempilah a ner sônpui a. Thiampuhei neh mipuihei riatah

²PUMAPA Tinrêngthothei, Israelhei Pathian khan hingkan ai ti a nit: “Babilon rêng thuneina chu ken tlôm tâk.

³Babilon rêng Nebukadnezaran hi Tempil bûrbêl ai chôi murdihei chu kum inika sungin hi munah hin hong chôi kîr nôk ki ti.

⁴Juda rêng Jehoiakina, Jehoiakima naipa neh Juda mipui suaka tâng, Babilona fe murdihei khom hi munah hin ṭhui ikhîr nôk riai ki ti. A nit, Babilon rêng thuneina chu ki îkhiak rang a nit. Keimah, PUMAPA hin kî ti tâk a nit,” a ti a.

⁵Thiampuhei neh mipui Tempila ding murdihei maah khan zânthla Hanania ziangah hingka hin ki ti a:

⁶“Amen, PUMAPA khan khangkah takah khan tho riseh. Ni thu inpuang chu PUMAPA khan a tak ichangin ithlun sela, Babilona bûrbêl ichôia omhei neh mipui suaka iṭhuia om murdihei khom hi munah hin hong ithlun nôk ngêt riseh.

⁷Khannisela, nangmah neh mipuihei murdi hin nin zianga ki thu sîr hih lei ringai rei.

⁸Tianlâi ata, nangmah neh keimah ei suak ma renga rithokin zânthlahein, ‘ridoinahei, iṭâmhei, ripuihei, nam itam takka neh rêngram roinpui tak takhei chungah ai tlung rang a nit,’ an ti ngai a.

⁹Khanniseh, ‘râlringamna tlung a ti’ iti inpuangtu zânthla thu sîr chu a hong tlung tenan bang kêng PUMAPA itir zânthla a nit ngêt iti ipom ai nit ngai,” ki ti a.

¹⁰Khanchu, zânthla Hanania khan ki ringa rithokin ringkol khah a lâk a, â khiak chit tâk a.

¹¹Hanania khan mipuihei riatah hingkah hin a ti a: “PUMAPA khan hingkah takah hin Babilon rêng Nebukadnezaran nam tin tinhei ringa ringkol a înpêl chu ikhiakchit a ti, ai ti a nit. Amahih kum inika sungin ai tho rang a nit,” a ti a. Khanungchu, ki rot tâk a.

¹²Zânthla Hanania khan ki ringkol ribât â khiak zoi itôika nungah chu PUMAPA khan ki ziangah,

¹³Hanania ziangah ifea va ril rangin thu a ne ril a: “Thing ringkol chu ne khiak a, arthûlin thîr ringkol nî siam pêk a nit hih.

¹⁴PUMAPA Tinrêngthothei, Israelhei Pathian khan ai ti a nit: ‘Babilon rêng Nebukadnezara sin itho rangin hi namhei murdi hih thîr ringkol a înribât tâk a nit. Khanchu, a sin thông an ta; ramsahei tena khomin Nebukadnezara sin thông an ti,’ PUMAPA khan ai ti a nit,” itin.

¹⁵Khanchu, kha thu khah Hanania ke ril a, khabanah khan a ziangah, “Hanania reh roh, PUMAPA khan nang tir mak a, hi mipuihei hih milak thu ni în-iam a nit.

¹⁶Khasikin, PUMAPA ngêi khan, ‘Ringai roh, rinêng ata nang kî lâk inrimang rang a nit. PUMAPA chungah rihela mipui lâiah thu nen puang sikin hi kum boi ma ngêiin nî thi rang a nit,’ a ti,” ki ti a.

¹⁷Hanania chu kha kum a thla sarinaah khan a thi tâk a.