Read Biete JEREMIA 29 Bible Online

JEREMIA 29 - Biete bible

JEREMIA 29

¹Babilon rêng Nebukadnezaran Jerusalema rithoka Babilon rama ai ṭhui, bôia tâng lâia ruaituhei, thiampuhei, zânthlahei, mipui murdi ziangah Jeremia khan lekha a thon a.

²Amakhah Juda rêng Jehoiakina neh a nu hei, rêng ina milianhei, Judai ram neh Jerusalema ruaituhei, kutithiamhei neh thîrsuhei murdi bôia tâng ranga iṭhuia an om riai zoia a nit.

³Juda rêng Zedekian Babilon rêng Nebukadnezara zianga a mi tir, Safana naipa Elasa neh Hilkia naipa Gemaria hei kutah kha lekhathon khah a închôi a nit. Lekhathonah khan hingka hin riziak a nit:

⁴“Israelhei Pathian, Tinrêngthothei PUMAPA khan mi tin Jerusalema rithoka Babilon ramah bôia tâng ranga Nebukadnezaran a ṭhui ranga ai phalhei ziangah hingkan ai ti a nit:

⁵Inhei sin unla; amakhan om indet rei. Rikulhei siam unla, nin chimu invânghei khah fah rei.

⁶Nupui nei unla, nainetehei nei rei; nin naipahei nupui innei unla, nin nainuhei khom pasal innei rei. Khanchu, nainetehei ineiin hong pung nin ta, iroi tiang ni loiin ipung tiang ni pan ngêt rang a nit.

⁷Suaka nangni ken omna khopui ṭhatna rang sintho unla, an ta rangin keimah, PUMAPA ziangah ṭongṭai pêk rei. Kha ram vângsak inṭumna chu nangmani vângsak inṭumna khom ai nit rang a nit.

⁸Keimah, PUMAPA, Israelhei Pathian ngêi hin, ‘Nin lâia om zânthlahei neh thlasân ithiamhei khan nangni lêm no riseh. An rimang phanhei khom khah ngaisak no rei.

⁹Ker mingin milak thu nangni an îril a nit a, anni chu kî tir ni mak. Keimah, PUMAPA, Pathianin kî ti a nit.’

¹⁰“PUMAPA khan hingkan a ti: ‘Kum sômsarikah a vun tenan Babilon ramah khan nangni zuang ithlo ki ta, nin zianga ki ṭonginkung chu len ki ta, hi munah hin nangni ṭhui nôk ki ti.

¹¹Nin ta ranga ki roisak chu keimah bangin ki riat a, vânduaina inrît ni loiin, vângsak inṭumna nin itûng khah nin chang theina rangin ki înrifûk tâk a nit.

¹²Khanchu, ker ming rilam nin ta, ki ziangah hong ṭongṭai nin ta, nangni lei ringai pêk ki ti.

¹³Ne zong nin ta, tititaka nin ne zong tenan chu nin ne imu rang a nit.

¹⁴Ne mu tâng nin ta; khanchu, nin ramah khan nangni siam inding nôk ki ti. Bôi ata nangni sua tâng ki ta, nangni ke chekindarna ram tina rithokin neh mun tina rithokin nangni ṭhui bûm nôk ki ti. Keimah, PUMAPA hin kî ti a nit.’

¹⁵“Nangmanin chu PUMAPA khan Babilon ramah khom zânthlahei a ne pêk nin ti a.

¹⁶PUMAPA khan Davida rêngṭhungmuna ṭhung rang rêng chungchâng hei, hi Khopuia om mipui chungchâng hei, nin inzirpui, nangmani lôma bôia tâng ranga iṭhuia om inohei chungchâng thu a îsîr hih ringai rei.

¹⁷PUMAPA Tinrêngthotheia khan, ‘Khandaihei, iṭâmhei, ripuihei an chungah ki îṭhum rang a nit. Anni chu theipui iṭuai, ifah ranga ṭha khâi inoa seh tâk angkah hin kî siam rang a nit.

¹⁸Anni chu khandaihei, iṭâmhei neh ripuihein rizûl thal ki ta, rammuala mi tinin an thil mu khah inrît tîng an ti. Anmani ke chekindarna mun tinah an chunga thil itlung khah mihein arkhêl itin an idang ichek vong vong an ti. Anni chu mihein nuiso an ta, an riming kha vânisâmna ṭongbâiin mang an ti.

¹⁹Ke som, ki zânthlahei imanga an zianga thucha kî thon mai ngai khah zôm nuam mak a, an ngaisak no sikah khan amahih an chungah ai tlung rang a nit.

²⁰Babilon rama bôia tâng ranga kî tirhei murdi, nin rêngkan keimah, PUMAPA thu hih ringai rei.’

²¹“Israelhei Pathian, Tinrêngthothei PUMAPA khan Kolaia naipa Ahaba neh Maaseia naipa Zedekia, arminga milak thu inpuang ngaihei chungchâng thu hingka hin â sîr a: ‘Anni chu Babilon rêng Nebukadnezara kutah lan ki ta, nin mitmu ngêiah anni chu that a ti,’ ai ti a nit.

²²Khanchu, Jerusalema rithoka Babilon rama bôia tâng ranga iṭhuia omhei khan, ‘Babilon rêngin Zedekia neh Ahaba meia ai hâl angkah khan, PUMAPA khan ni chungah tho riseh,’ itin kha mihei rimingin vâni sâm ngai an ti.

²³Israel ramah sual natinsat takhei an tho a, an bungtualbômhei nupui an siatpui a, PUMAPA rimingin milak thu an ril a. Amakhah PUMAPA nuamno lam a nit a; an sintho khah a riat a, annihei chungchânga thuretu chu a nit. PUMAPA khan ai ti a nit.”

²⁴PUMAPA Tinrêngthothei, Israelhei Pathian khan, Nehelam mi Semaia rang thucha a ne pêk a. Ani hin Jerusalema om murdi Maaseia naipa thiampu Zefania neh thiampu danghei ziangah ama riming ngêiin lekha ai thon a nit. Hi lekhathona Semaian Zefania zianga a irziak chu:

²⁶“PUMAPA khan thiampu Jehoiada mun ithûltu thiampu rangin nang ai phun a nit. Atûnah hin Tempila hin milian ni nit tâk a; tu mi invêt khom zânthlaa ribe kangân chu an ringah thîrkol inbun a, zingziria khuap rangin iphun ni nit.

²⁷Îtho ngân im Anathot kho mi, Jeremia, zânthlaa ribea thu inpuangtu chungah hin khangkan ni tho no?

²⁸Babilon rama omhei ziangah, ‘Bôia nin itâng sung hi sôt a ta, in neh loi idet sin unla, rikulhei siam unla, nin chimu invânghei kha fah rei,’ a ti pêk sikin ani chu inringam ngêt rang a nit,” itin a irziak a nit.

²⁹Thiampu Zefania khan lekhathon khah ki riatah a tep a.

³⁰Khanchu, PUMAPA khan ki ziangah,

³¹Babilona tânghei murdi ziangah Semaia chungchâng thu hingkan ithon rangin a ne ti a: “Keimah, PUMAPA hin Semaia neh archi suanpârhei chu kuttum thông ki ti. Ani chu kî tir ni mak a, zânthla angkah taka thu inpuangin milak thu khah thutak nangni a însôn a nit. Nin lâiah khan richi suanpâr nei no nih. Ani khan ki chunga rihel rangin mihei â ril sikin ki mihei ta ranga thil iṭha ki tho rang khah idong rangin dam sôt no nih. Keimah, PUMAPA hin kî ti tâk a nit,” itin.