Read Biete JEREMIA 3 Bible Online

JEREMIA 3 - Biete bible

JEREMIA 3

¹PUMAPA khan hingkan a ti: “Min a nupui ṭhen sela, a nupui khan pasal dang nei ta sela, kha nupang khah nei nôk thei khâi no nih. Ramin ai porinchepui riai rang a nit.[6] Khanniseh, Israel nang chu idit itam takkah ni nei nungin, atûn ki tiang hong ikîr nôk nî nuam a nit hiteh na!

²Tlângsîphei khi hang thlîr vêl ta, nochizuar angkana nang an zâlpui nona mun a om im a? Arabhein ramchârah mi an îruang ngai angkana tlangvâl ingâkin lamsîrah ni îṭhung mai ngai a nit. Ni nochizuarna neh ni pualoina sikin ram chu porinchen ni siam zoi tâk.

³Hihei sikah hin rua sûr khâi mak a, rua nungkhôn khom ai sûr khâi ino a nit. Khaten khomin nochizuar mitmâi richang ni nei a, izakin ni mâi reng sen mak.

⁴“Nangman chu, ‘Nang chu ki pa, ki chîn lâi ata lung ne thlungtu ni nit a,

⁵Ni ningthik mai no nia, ni ningmur chu ki chungah om kumkhua no nih,’ ni ti a. Israel, ama angkah takkah khan nî ti a nit a; khanniseh, sual tinrêng ni tho thei dôrkah ni lai tho mai a nit.”

⁶Josia rêng chang lâiin PUMAPA khan ki ziangah hingka hin a ti: “Nupang iamom ino, Israelhei sintho hih ni mûm? Ki zianga rithoka iron itlâng risâng tinah neh thingkung thuai tinah khan nochizuar angkan thil isual ai tho ngai a nit.

⁷Hihei murdi hih a tho zoi tenan chu ki ziangah hong kîr nôk ngêt a ti ki ti a; khanniseh, hong kîr ual mak e. A zuarpuinu Juda, mi lêmsiahei khomin thil omdânhei an lei mu vang a.

⁸Mi iamom ino Israelhei chu an inrêna sual ki mu riai sikin rimâkna lekha ki pêk a, ki ûmisua tâk a. Ân zirpuinu, mi lêmsia Juda khomin ṭi nachâng reh mak a; ani khom a suak a, nochizuar ai chang tâk a nit.

⁹Îte izak viat loia nochi an zuar sikin ram chu porinchen a siam zoi tâk a. Thingbulhei, lungbulhei chubai iûnin an înrêpui tâk a nit.

¹⁰Hihei rizoi nung khomin Israel zuarpuinu, mi lêmsia Judahei chu lungril takkan ki tiang hong kîr mak a, a pelêm paiin an hong ikîr a nit. Keimah, PUMAPA hin ki ti a nit.”

¹¹PUMAPA khan ki ziangah hingka hin a ti: “Mi iamom ino Israel chu mi lêmsia Juda nêkan chu ifel ualin an irbe a nit,” itin.

¹²Ani khan ife a, hi thu hih Israel va ril rangin a ne ti a: “Iamom ino Israel, ki ziangah hong kîr nôk roh. Kei chu lungkhamna sip ki nit a, ningthikin nang en mai no ning a, ni chungah ning inthik kumkhua no ning e.

¹³PUMAPA, nin Pathian chunga nin irhel hih nin ithonsual a nit iti bang hi reh rei. Thingkung tin thuaia nam dang pathianhei chunga nin irzuarhei, ki thupêk nin zômno tliahei kha riphuang suak rei. Keimah, PUMAPA hin kî ti a nit.

¹⁴“Mi iamom inohei o, hong kîr nôk rei, ki tahei nin nit. Khopui tina rithokin mi khatkah, nam tina rithokin mi inikah chit nangni rithlang suak ki ta, Zion Tlângah nangni ṭhui nôk ki ti.

¹⁵Ki thu zôm mi roirêltuhei nangni pêng ki ta, anmani khan vârna neh riatthiamnahein nangni rêl an ti.

¹⁶Kha ramah khan nin hong pungpuang tenan chu mihein ki Thuthlung Bôm chungchâng sâm khâi no nih. Ngaitua khom ngaitua khâi no ni a, ireh khom reh khâi no nia; inang khom nang khâi no nia; a dang khom siam ual khâi no nih.

¹⁷Kha zoro khah a tlung tenan chu Jerusalem chu ‘PUMAPA rêngṭhungmun’ itia be ni tâng a ta, Jerusalemah khan nam tinrêngin amakhan chubai ne ûn tâng an ti. Lungril isual riputin tuklul ilian takkan îte tho khâi no nih.

¹⁸Kha nikhuaheiah khan chu Israelhei neh Judahei chu rizom tâng an ta, mâr tianga bôia an itângna ram ata hongin nin dongtum ranga nin richibulhei kî pêk ramah hin hong kîr an ti.”

¹⁹PUMAPA khan hingkan a ti: “Israel, ram ihoi tak, rammual pumpuia ram iṭha tak nang ipe a, Ki naia nang inei kî nuam a; ‘Epa,’ itia ne koi a, ki zianga rithoka rihêl khâi loi rangin, Nang kî nuam a nit a.

²⁰Khanniseh, a pasal chunga iamom ino nupang angkah takin, Ki ta rangin iamomin lei om ngai mak che. Keimah, PUMAPA hin ki ti a nit.”

²¹Itlângsîpheia rithokin ikhêk rihu a om e, Israel naihei ṭap irî neh an ngênna rihu chu, Sualna sip ringnunhei an mang a, PUMAPA, an Pathian an ringil tâk sik a nit.

²²PUMAPA nung isong tâk murdihei nin rêngkan hong kîr nôk rei; Nangni lei indam a ta, iamomin nangni siam a ti. Nangmanin, “En ta, PUMAPA ziangah kin ihong a nit, ani chu kin Pathian a nit a.

²³Itlângsîpheia kin mirmil isônhei khan ne ṭangpui viat mak a. PUMAPA kin Pathian bang hi Israelhei inzôktu chu a nit.

²⁴Nikhomseh, kin chîn lâi ata kin pahei sinsôl irâ, kin bera lômhei, kin serât lômhei, kin nai nupanghei neh kin nai ipahei tena khom, hi Baal izakpui iom pathian chubai iûn sikin kin ichân zoi tâk a.

²⁵Izakin zâl ṭian kin ta, kin mualinphoina hin ner khû riseh. Keimani neh kin chibulhei hin vuani ten idênin PUMAPA kin Pathian chungah kin isual mai mai a; a thupêkhei rêng rêng kin izôm viat ngai ino a nit,” nin ti a.