Read Biete JEREMIA 30 Bible Online

JEREMIA 30 - Biete bible

JEREMIA 30

¹PUMAPA, Israelhei Pathian thu ki ziangah a zuang tlung a:

²“Ni zianga ki thu sîr murdi khah lekhabuah riziak roh.

³Ringai roh, ki mi Israelhei neh Judahei ken ding nôkna rang zoro a hong tlung thiai tâk e. An chibulhei ram kî pêkah khan anni chu hong ṭhui ikhîr nôk ki ta; khanchu, ram khah lua nôk an ti. Keimah, PUMAPA hin kî ti tâk a nit,” itin.

⁴Amahih Israelhei neh Judahei chungchânga PUMAPA thu sîr chu a nit.

⁵“Iṭi neh lunginzîng khêk irî ki riat a, Lungringamna zel omak e.

⁶Dâirek unla, ringaitua ta u; ipa hih naiha isê a irvoi ngai mani? Îtho tâk im nupang naiha isê angkana, Ipa khan a phûng ai sôm khap a, A mêl ai dông pat tâk?

⁷Nikhua dang neh inrichak thei ino; Nikhua inrît chu a zuang itlung thiai tâk a nit, Ki mihei ta ranga lunginzîng rang zoro chu a nit, Khanniseh, san isua chu nîng an ti.”

⁸PUMAPA Tinrêngthotheia khan, “Kha nikhua khah a hong tlung tenan chu an ringa ringkol ikhiak ki ta, an khuapna zingziri rui khah sût pêk ki ta, ram dang mihei suak ni khâi no nih.

⁹Ki sin tho tâng an ta, PUMAPA an Pathian neh rêng ranga ki înding rang Davida richi lâia mi sin chu tho tâng an ti.

¹⁰“Ki mihei o, ṭi no rei; Israel mihei o, indôp no rei. Ram ilah taka suaka nin itângna rithokah khan nangni sanisuang ki ta; Bôia nin itângna rama rithokah khan nangni ṭhui bûm ki ti. Nin in tiang hong kîr nôk nin ta, thlangam takkan om nin ti; Zôk riam nin ta, tutên nangni inṭi khâi no nih.

¹¹Nin ziangah zuang ki ta, nangni inzôk ki ti. Nangni ke chekindarna rama namhei murdi chu inrimang vang ki ta, Khanniseh, nangni chu nangni that inrimang no ning e. Kuttum nangni tho loiin chu nangni sua no ning a; Khan a zâi iomin nangni ki întuang rang a nit. Keimah, PUMAPA hin kî ti tâk a nit.”

¹²PUMAPA khan a mihei ziangah, “Nin popnahei hih indam thei ni khâi mak a, Nin sâbehei hih indam thei ni khâi mak.

¹³Nin ipân damna rangin nangni enkoltu rang omak a, Damna chu itûng rang ai om khâi ino a nit.

¹⁴Nin tianga ṭang murdîn nangni an ringil tâk a; Nangni an ingaisak khâi ino a nit. Irâl angkan nangni ke phop tâk a, Idîn loi takkan kuttum nangni kî tho a nit, Nin sualna neh nin pualoina a natinsat rai tâk sikin.

¹⁵Nin sâbehei khah riphunpui ki kêng khâi no rei; Nin natna hih indam thei ni khâi mak e. Nin sualnahei a tam a, Nin pualoina a natinsat rai sikin Hi thil hih nin chungah ki îthlun a nit.

¹⁶Khan atûn chu nangni fa inrimangtu murdi ifa inrimang nîng an ta, Nin irâlhei murdi bôia tâng rangin iṭhuipai nîng an ti. Nangni sirdetuhei murdi chu isirden om an ta, Nangni roktuhei murdi chu irokin om tâng an ti.

¹⁷Nangni indam nôk ki ti; Nin irâlhei khan, ‘Zion chu inôlin a om a; Tutên ani chu ngaisak nuam khâi mak,’ ti khom sela, Nin sâbehei chu indam nôk ki ti; Keimah, PUMAPA hin kî ti tâk a nit,” a ti a.

¹⁸PUMAPA khan, “Ki mihei chu an ram ngirah in om nôk ki ta, Insungkua tin chungah khorngaina nei ki ti. Jerusalem chu siaminṭha nôk nîng a ta, A rêng-in khom a mun ngirah inding nôk nîng a ti.

¹⁹Kha muna omhei khan inpâkna lâ sak an ta; Râifân takkan ikhêk suak an ti. Ki ṭhatvurna sikin hong pung tîr tîr an ta; Ki ṭhatvurna khan roinpuina ithlun pêk a ti.

²⁰A nam pumin tianlâia a roinpuina kha insil nôk ki ta, Ki maah idet takkan om an ti. Anmani sirdetuhei chu kuttum kî tho mai rang a nit.

²¹Anmani chipui ngêi ruaitun nei an ta, An lâia rithokin roirêltu hong suak a ti. Ani khan ki fial zoron ne hong nâi a ti; Tu ngân im fialna mu loia hong inâi ngam rang? Anni chu ki mihei nîng an ta, an Pathian nîng ki ti. Keimah, PUMAPA hin kî ti tâk a nit,” a ti a.

²³PUMAPA ningthik chu rua neh phâivua a nit a, phâivosimpui khan mi pualoihei lu chu inuai bit a ti. A thiltumhei khah a tho zoi mâkah chu ringam no nih. Zoro nungkhônah chu hihei hih a mihei khan ifel takkan la rethiam an ti.