Read Biete JEREMIA 31 Bible Online

JEREMIA 31 - Biete bible

JEREMIA 31

¹PUMAPA khan, “Nikhua a hong tlung thiai tâk e; kha tikin chu keimah hih Israel nam pumpui Pathian ni tâng ki ta, anni khom ki mihei nîng an ti.

²Thina zôk mipuihei chungah khan ramchârah lungkhamna ki înlang rang a nit. Israelhein ringamna ram an pan lâiah khan,

³ilah taka rithokin an ziangah ki înlâr a nit. Israel mihei o, lung nangni kî thlung mai a nit, khasikah khan ki lungkhamlianna chu nin chungah ki înlang mai a nit.

⁴Nangni inding thar nôk ki ta, nin khuangte sukin râifân takkan nin ilâm nôk rang tâk a nit.

⁵Samaria tlângheiah grep phun nôk tâng nin ta, â phuntuhei ngêi khan â râ khah an ifâk rang a nit.

⁶A nit, râlvêngtuhein Efraim tlângheia rithoka mihei isam a, ‘Tho rei, PUMAPA ei Pathian ziangah Zion idênin lei fe rei u,’ an ti rang zoro a hong tlung thiai tâk e,” a ti a.

⁷PUMAPA khan hingkan a ti: “Nam tin tinhei lâia nam roinpui tak Israel ta rangin râifânin zâi rei. ‘PUMAPA khan a mihei a saninzôk tâk a; Israel la dam isunhei murdi chu a sanisua tâk,’ itin, Nin chôiinrisângna lâ chu sak rei.

⁸Mâr tianga rithokin anni chu zuang ṭhui nôk ki ta, Rinêng chung kil tina rithokin anni chu ṭhui bûm ki ti. Mitdelhei neh kebâihei khom anmani neh munkan hong an ta, Nai ivonghei neh nai nei rangtohei khom ṭang sâng an ti. Nam roinpui tak chu hi munah hin an hong ikîr nôk rang a nit.

⁹Ṭap pumin hong kîr nôk an ta, Thlangam sak ki ta, anni chu iruai ki ti. Vadung rikamheiah khan anni chu ṭhui ki ta, Lamthluana an ibâ nona rang lampui inâmah khan ṭhui ki ti. Israelhei ta rangin Pa nîng ki ta, Efraim chu ki nai lutîr a nit.”

¹⁰PUMAPA khan hingkan a ti: “Namhei o, ki thu ringai unla, Tuikhanglian rikam ilah takheiah ki thu puangindar rei. Ki mihei chu ke chekindar a, khan ṭhui bûm nôk ki ta, Berapu angkan anni chu enkol ki ti.

¹¹Ki mi Israelhei chu ken zalen tâk a, Nam irâthei kuta rithokin kî saninzôk tâk a nit.

¹²Râifân takkan lâ sak pumin Zion tlângah hong an ta, PUMAPA ṭhatna sikah khan lôm tak tak an ti. Buhei, uainhei, oliv riakhei, berahei neh sialhei; Ki thiltlongpêk sikah khan lôm an ti. Anni chu tui ikhopchît rikul angkah nîng an ta; Lungkângna boiin lêng tâng an ti.

¹³Nungâkhei chu râiifân takkan lâm an ta, Tlangvâlhei neh itarhei khom lôm tak tak an ti. Anni chu thlangam sak ki ta, An ngaisiatna chu lômna inchang pêk ki ta, An beidongna khah râifânna inchang pêk ki ti.

¹⁴Thiampuhei chu fâknêk itui takin inkhop ki ta, Ki mihei chu ki ṭhatnan khopitlâi takkan in-om ki ti. Keimah, PUMAPA hin kî ti tâk a nit.”

¹⁵PUMAPA khan hingkan a ti: “Rama khuaah rihu iria a nit a, Lungiseh takka iṭap ngûi ngûi rihu chu; Rakili khan a naihei a ṭâ a; An om khâi no sikin ithlâi thei ai nit ino a nit.

¹⁶Ni ṭap chu mong inla, Ni mitrithlihei kha ruh roh. Ni naihei ta ranga nî sintho murdi chu, Ṭhatnaa thung loiin om no nih. Irâl rama rithokin hong kîr nôk an ti.

¹⁷Ni sûn matiang ni dingmun la ṭha tak tak a ta; Mahni ram ngêiah ni naihei chu hong kîr nôk an ti. Keimah, PUMAPA hin kî ti tâk a nit.

¹⁸Ngaisiat puma Israel mihei irung chu ki riat a, ‘PUMAPA, la sôi ngai ino sechaltuai angkah kin nit a Khannisela, nangman thu zôm rangin ni ne sôi a. Ne ṭhui ikhîr nôk roh; PUMAPA, kin Pathian, Ni zianga hong ikîr nôk rangin kin irfo diam a nit.

¹⁹Ni zianga rithokin lâizâm kin tho tâk a, Kin riatthiam nungin rilet [42] kin nuam tâk a. Dengthei ni nen tuang zoi nungah khan, Ngaiinsian kin luhei kin ikhûn ṭian a. Kin vânglâia kin sualna sikin, Mualinphoi neh izak takkan ki iom a nit.’

²⁰Israel, nang chu ki nai lungthlung tak, Ki îduam tak tak ni nit a. Ner ming ki sâm ikipah, ki lungrilah ni châm mai a, Nang ki riat leng leng a, ki lungkhamna chu ni chungah dâi no nih.

²¹Lampui richikna siam inla, Lampui indangna rang ritlek phun roh. Israel mipuihei o, hong kîr nôk rei, Nin khopui mâk tâkheiah hin hong kîr nôk rei.

²²O iamom ino mihei, itena sôt im nin la irvuak rang? Thil ithar neh danglam kî siam tâk a nit, Nupangin ipa ai lên tâk angkana danglam a nit.”

²³PUMAPA Tinrêngthothei, Israelhei Pathian khan hingkan a ti: “Suaka an itângna ata ki ṭhui kîr nôk tenan chu Judai ram neh a khopuiheiah khan hingkana ṭongkam hih mang nôk tâng an ti: “Anni khan, ‘PUMAPA khan Zion tlâng rithiang chu ṭhatvur sela, Jerusalema ama omna mun rithiang ngêi chu ṭhatvur riseh,’ itin.

²⁴Judai ram neh a khopuiheiah khan loineituhei neh berapuhei chu munkan om tâng an ti.

²⁵Mi rizalhei chu inhar nôk ki ta, ṭâmsôl rivoihei chu inkhop ki ti.

²⁶Khanchu, mihei khan, ‘Ki zâl a, ki in thlar a, idam takkan ki thoi nôk tâk,’ tîng an ti.

²⁷“Keimah, PUMAPA hin kî ti a nit, zoro chu a hong itlung thiai tâk a nit, Israel ram neh Judai ramah khan miriam neh ran ki înpung rang a nit.

²⁸Anmani iphâi suak rang hei, inlîr rang hei, intlôm rang hei, isim rang hei neh isehchit rang heia ki irdîp ṭian ngai angkah khan atûn chu anmani iphun rang neh idet taka siam inding rangin kî enkol mai rang tâk a nit.

²⁹Kha zoro khah a hong tlung tenan chu mihein, ‘Pahei grep thûr fâkah, naihei ha a lei ṭim e,’ ti khâi no nih.

³⁰Mi tu khom grep thûr ifa kan an ha ṭim a ta, mi tin mahni sualna khah an ithipui rang a nit.”

³¹PUMAPA khan hingkan a ti: “Ringai roh, Israel insungkuahei neh Juda insungkuahei chu thuthlung ithar ki siampui rang nikhua a hong itlung thiai tâk a nit.

³²An chibulhei Aigupta rama rithoka ṭhui isua ranga an kut ngêia ke ruai lâia ki thuthlung angkah kha ni khâi no nih. Annihei ta rangin pasal angkah ki nit pum khomin ki thuthlung khah an ivong indik ino a nit a.

³³Thuthlung thar Israel insungkuahei neh ki siam rang chu amahih a nit. An lungrilah ki Dân siang ki ta, an lungsungah riziak sâng ki ti. An Pathian nîng ki ta, ki mihei nîng an ti.

³⁴PUMAPA chu ireh rangin tutên a bungtualbômhei neh a suapuihei khah inrisei nang khâi no nih. Â chîn taka rithokin a lian tak idênin an ne iriat rang tâk a nit. Khanchu, an pualoinahei ngaidam ki ta, an sualnahei chu remai khâi no ning. Keimah, PUMAPA hin kî ti tâk a nit.”

³⁵PUMAPA khan sûna vâr rangin inî a sia a, Zâna vâr rangin ithla neh ârsihei ai sia a nit. Tuikhanglian chu irî vung vung rangin ân risok a; Arming chu PUMAPA Tinrêngthothei a nit.

³⁶Hi thilhei nit rang lam inkunga om hi a mong mâkah, Israel namhei khom an îding mai rang a nit.

³⁷Chungtiang rivân khi nin rikhî thei a, Nuaitiang rinêng ringatna nin zong suak thei tenan, Israel richihei chu an sinthohei sikah khan ai heng rang a nit. PUMAPA khan ai ti tâk a nit.

³⁸PUMAPA khan hingkan a ti: “Nikhua a hong tlung thiai tâk e, Hananela in risânga [43] rithokin Kulikil Kotbâi ten idênin Jerusalem, ki khopui chu siaminṭha nôk nîng a ti.

³⁹A ramrî chu Gareb tlâng idênin ithlun takkan fêng a ta, Goah tiang kôi a ti.

⁴⁰Mithi phûmna neh nimnok paina phâizôl pumpui neh a kôlvêl ram murdi, Kidron vadung idênin, sak tiang panga Sakor Kotbâi ikil idênin ki ta ranga inran rang a nit. Khopui khah tiklâi khomin iṭhet a, isehchit ni khâi no nih.”