Read Biete JEREMIA 32 Bible Online

JEREMIA 32 - Biete bible

JEREMIA 32

¹Juda rêng Zedekia inlal kum sômnaah khan PUMAPA thu ki ziangah a zuang tlung a; amakhah Babilon ramah Nebukadnezara inlal kum sômleiiriatna kum a nit.

²Kha zoro takah khan Babilon rêng sipaihei khan Jerusalem an hong hual a, kei chu rêng-in vêngtuhei omna munah intâng ki nit a.

³Kha munah khan Juda rêng Zedekia khan a ne întâng a nit a, ki ziangah, “PUMAPA khan, ‘Hi khopui hih Babilon rêng kutah pêng ki ta, ai lâk rang a nit.

⁴Juda rêng Zedekia khom zôk no nia, Babilon rêng kutah ipe nîng a ta; mâiritong ngêiin ani chu risônpui a ti.

⁵Zedekia chu Babilon ramah iṭhuiin om a ta, amah ki ngaitua nôk mâkah chu amakhan om mai a ti. Babilon mihei chu risualpui khom sela, lo tluk no nih. Keimah, PUMAPA hin kî ti a nit,’ itin ithôm thu ni înpuang?” a ti a.

⁶PUMAPA thu ki ziangah a zuang tlung a, hingkan a ti a:

⁷“Ringai roh, ni pangâk, Saluma naipa Hananela chu ni ziangah hong a ta, ‘Nangmah ki rêlrui rimunpui [44] ni nit a; khasikin, Benjamin ram huala, Anathot muna ki loi iom hi richoh roh,’ nang hong tîng a ti,” a ti a.

⁸Khanchu, PUMAPA ti lam angkah takah khan Hananela chu vêngtu rikul sungah ki ziangah a hong a, a loi khah richoh pêk rangin a ne ti a, khaangkan PUMAPA ne îsôn a nit ngêt iti ki riat tâk a.

⁹Hananela zianga rithokin loi chu ker chôk a, a man rangin sum kha ki var a, tangkarua sekel sômleisarikah [45] a nit.

¹⁰Kin thil tho khah lekhaah kin riziak infel a, kin ipip khap a, riatpuitu ki koi a; khante, sum khah kin var tâk a.

¹¹Khanungchu, ram richôkna lekha khah ki lâk a, ram rilan dân tinrêng chuangna a nit a, khatkah ke pip khap a, a dang chu ipip khap ino a nit.

¹²Kha lekhahei khah Hananela mitmuah neh riatpuitu, ram richôkna lekhaa riming riziaktuhei neh rikul sunga vêngtu, Juda ṭhunghei mitmuah khan Neria naipa Baruka, Maaseia tupa kutah ki pêk a.

¹³An rêngka riatah Baruka ziangah hingkan ki ti a,

¹⁴“PUMAPA Tinrêngthothei, Israelhei Pathian khan, ‘Hi ram richôk dân risinsiana ipip khap neh ipip ino hih ila a, kum itam takka nung khomah a siat nona ranga ipil bêla iṭha takka rê inṭha rangin thu nang ai pêk a nit.

¹⁵PUMAPA Tinrêngthothei, Israelhei Pathian khan hi ramah hin inhei, loihei, grep rikulhei richo la ni nôk a ti,’ ai ti a nit.” itin.

¹⁶Neria naipa Baruka ziangah ram richôkna lekha ki pêk zoiah khan hingkan ki ṭongṭai a,

¹⁷“O PUMAPA Pathian, ni sinthotheina roinpui tak neh ni râtna mangin rinêng neh rivân ni siam a; nangma rangin chu thil intak îte zel omak.

¹⁸Sâng itam taka chungah lungkhamna nen lang ngai a; khanniseh, pahei sualna naihei idêna kuttum itho ngai, O Pathian roinpui neh sinithothei, nang chu PUMAPA Tinrêngthothei ni nit.

¹⁹Nang chu roisaktu roinpui neh sin ithothei tak, miriamhei vângsak dân tinrêng ni mu riai a. Mi tin an om dân neh an sintho lam angkah takin an loman nî pêk ngai a nit.

²⁰Aigupta rama sinrikhêl neh risinsianahei ni tho a, vuansûn ten khoma Israel ramah neh nam danghei lâiah ni la tho mai a; khasikin, atûn tenan mun tinah nang an iriat a nit.

²¹Sinrikhêlhei neh risinsianahein kin irâlhei nen ṭi a, kut irât tak neh bân ipharin ni mihei chu Aigupta rama rithokin ni ṭhui isua a.

²²An chibulhei zianga ipe ni lei înkung hi ram, khuaitui neh dût luangna ram hih ni pêk tâk a.

²³Khanniseh, hi ramah hin an hong a, an lua tenan chu ni thupêkhei zôm mak a, ni Dân khom zôm mak a. Itho ranga ni thupêk rêng rêng îte an itho no a nit. Khasikah khan hi thil ṭha no hih an chungah ni îṭhum tâk a nit.

²⁴“Babilonhei khan khopui ilah rangin â vêlkan rinêng an vur inpông a, an irûn tâk a nit. Khandaihei, iṭâmhei, ripuihei an tuang sikin khopui chu a hong irûntuhei kutah ai om tâk a nit. Nî mu angkan ni lei înpuang murdihei kha ai tlung idik tâk a nit.

²⁵O Pumapa PATHIAN, khopui lak Babilonhei kutah imanin ai om rang a nit a; khanniseh, loi khah riatpuituhei mitmuah a man ipea richoh ranga thu ne petu lak chu nangmah ni nit a,” ki ti a.

²⁶PUMAPA thu ki ziangah a zuang tlung a:

²⁷“Keimah hi PUMAPA mi murdi Pathian ki nit. Keima ta rangin chu thil intak îte zel omak.

²⁸Hi khopui hih rêng Nebukadnezara neh a sipai lôm kutah pêng ki ta, anni khan lâng an ti.

²⁹Hi khopui irûntu Babilonhei chu lût an ta, khopui hih hâl vang an ti. Ki ninginthik ranga an in chungsîpa Baal zianga namhoi an lannahei, pathian danghei zianga uain thillan an bunsuakna murdihei chu kâng vang a ti.

³⁰An vânglâi ata Israel mihei neh Juda mihei khan ki mitmuah thil ṭha no korong an tho ngai a. An sinthohei khan ki ning an înthik ngai a nit.

³¹Hi khopui hih, â ding phuta rithokin atûn tenah hin a sunga mihei hin ningmur ne sakin, lunghoi inoa ne siamtu an lai nit mai a nit. Ama khopui hih ki îsiatchit rang tâk a nit.

³²Judai ram mihei neh Jerusalema omhei hin thil ṭha no an tho sikin ki ning an inthik a, an rênghei, ruaituhei, thiampuhei, zânthlahei, an rêngkan ningmur an ne isak a nit.

³³Ki tiang ngat loiin nung an ne song riai tâk a; ṭhatnemringai takka ken risei khomin ringai nuam mak a, ki rilna khom ipom nuam mak.

³⁴An mirmil porinche takhei kha ki Tempil rithiang sungah an sia a, an înbor tâk a nit.

³⁵Moleka [46] zianga ribôlnaa an naipahei, an nainuhei an lanna rangin Hinom Phâiah khan Baal mâichâmhei an siam a. Hi thil porinche an itho hih ki thupêk ni mak a, khangkana thil ithon Juda mipui ṭhui insual an ti, iti khom kî ngaitua tlak ngai ino a nit,” itin.

³⁶PUMAPA, Israelhei Pathianin ki ziangah hingkan a ti a: “Jeremia, hi khopui hih Babilon rêng kutah ipe nîng a ta, khandaihei, iṭâmhei, ripuihei tuang a ti, iti a lei nit tâk a. Atûnah hin keiman iti rua ki lai nei hih ringai roh.

³⁷Ki ningthik neh ningmur sika ki lei chekindarna ramheia rithokin ki mihei chu kî bûm nôk rang a nit, anni chu hi munah hin hong ṭhui ikhîr nôk ki ta, izôkriamkan inlêng ki ti.

³⁸Khanchu, ki mihei nîng an ta, keimah an Pathian nîng ki ti.

³⁹Lungril inpum takkan munkan inlêng ki ta, kumkhuakan ne chôiinrisâng tâng an ta, amakhah anmani ta rang neh an richi suanpârhei ta ranga ṭha a nit.

⁴⁰Kumtluang thuthlung siampui ki ta; tiklâi khomin an ta ranga thil iṭha sin bâng no ning e. An lungril murdia ne ṭi rangin anni chu siam ki ta; khanchu, tiklâi khomin nung ne song tlak khâi no nih.

⁴¹An ta ranga thil iṭha tho chu ki lômna tak nîng a ta, hi ramah hin idet takka om rangin inding ki ti.

⁴²“Hi mihei chunga vânduaina inrît tak ki îṭhum angkah hin an ta ranga thil iṭha ipeh rang ki înkunghei chu kî pêk rang a nit.

⁴³Mihein, ‘Hi ram hih ramchâr, miriam neh ramsahei om nona mun, Babilonhei kutah ipen la om a ti,’ an ti ngai a. Nikhomsela, hi ramah hin loi munhei richo la ni nôk a ti.

⁴⁴Benjamin ram hualheiah, Jerusalem kôlvêl khuaheiah, Judai ram khuaheiah, tlângram khuaheiah, thlang tiang tuipui rikamheiah, Judai ram sim tiangheiah, sumin loihei richông an ta; richôkna lekhahei siam an ta, ipip khap an ta, riatpuituhei om an ti. An ram ngêiah khan ki mihei chu inding thar nôk ki ti. Keimah, PUMAPA hin kî ti tâk a nit.”