Read Biete JEREMIA 33 Bible Online

JEREMIA 33 - Biete bible

JEREMIA 33

¹PUMAPA thucha chu vêngtuhei rikul sunga mi tâng ki la nit mai lâiah khan a zuang tlung nôk a.

²PUMAPA rinêng isiam a, inrifoma, indettu, arming PUMAPA ngêi khan a ne sôn a:

³“Nê sam inla, nang sâm ki ti; nî riat ngai ino thil roinpui neh inril tak nang iril ki ti.

⁴Keimah, PUMAPA, Israelhei Pathianin kî ti a nit, hi khosunga ṭangmun khuarna rangin Jerusalema inhei neh Juda rêng-inhei chu iṭhetchit nîng a ti.

⁵Ki ningthik natinsat tak sikin anni chu kuttum thông ki ta, Babilonhei khah vân doi ki ta, an ruakhei khan khopui ki însip rang a nit. An isual natinsat rai tâk sikin hi khopui hih nung kî song tâk a nit.

⁶Nikhomsela, hi khopui neh a mihei chu damna neh risêlna peh nôk ki ta, ki mihei chu indam nôk ki ta, thlangam tak neh izôkriamkan in-om ki ti.

⁷Juda neh Israel chu vâng isakin in-om ki ta, zoro masaa an om dân angkah khan inding thar nôk ki ti.

⁸Ki chunga an sualna neh siatna murdi thâr inrithiang ki ta, ki chunga an rihelnahei, an sualnahei neh an pualoina murdihei chu izâ tâng ki ti.

⁹Jerusalem chu ki ta rangin râifânna, chôiinrisângna neh inthangna nîng a ta; Jerusalem mihei ta ranga thil iṭha kî tho murdihei neh khopui chunga vângsakna ki îthlun thu an lei riat tenan chu rammuala nam tin chu iṭin an înthing rang a nit.”

¹⁰PUMAPA khan, “Hi mun iram tâk, miriam neh ranhei om khâi nona mun an lei iti ngai neh Judai ram khopuihei, Jerusalem kotsuahei iram tâk, miriam neh ranhei om nona mun an itiheiah khan,

¹¹ilôm neh râifân khêk irîhei, rineina ruaiṭhe rîhoihei, ki Tempila lômna thillanhei an lan puma mihei la sak irî chu la reh nôk nin ta; “Mihei khan, ‘PUMAPA Tinrêngthothei ziangah lômthu ril unla, Ani chu a ṭhat a, a lungkhamlianna chu kumkhuakan om a ti,’ tîng an ti. Zoro masaa a vângsak lam angkah takin ram hi siaminthar nôk ki ti. Keimah, PUMAPA hin kî ti tâk a nit.”

¹²PUMAPA Tinrêngthothei khan hingkan a ti: “Hi mun neh khopui iram tâk, ramchâr angkana om tâk murdi, miriam neh ranhei om khâi nona ramah hin berapuhei chu an berahei neh om nôk an ti.

¹³Tlângram khopuiheiah, thlang tiang tuipui rikam khopuiheiah, sim tiang khopuiheiah, Benjamin ram hualheiah, Jerusalem kôlvêl khuaheiah, Judai ram khopuiheiah khan berapuhein an berahei la tep nôk an ti. Keimah, PUMAPA hin kî ti tâk a nit.”

¹⁴PUMAPA khan hingka hin a ti: “Israel insungkuahei neh Juda insungkuahei zianga ki ṭonginkung ki len rang nikhua chu a hong itlung thiai tâk a nit.

¹⁵Khatikin chu Davida richia rithokin rêng iṭha tak ki irthlang suak rang a nit. Kha rêng khan a ram pumpuiah idik tak neh ifel takkan roi rêl a ti.

¹⁶Juda mihei neh Jerusalema omhei chu sanisua nîng an ta, izôkriamkan om tâng an ti. Khopui chu, ‘PUMAPA Ei Saninringna’[47] itia koi ni tâng a ti.

¹⁷Keimah, PUMAPA ngêiin ṭong ki înkung a nit, ‘Davida richia mi Israelhei rêng rang risamin om no nia;

¹⁸ki sin itho a, hâlrivâm thillanhei, bubâl thillanhei neh ribôlnahei ilan rang Levia richi, thiampuhei khom om mai an ti,’ kî ti a nit.”

¹⁹PUMAPA khan ki ziangah hingkan a ti a:

²⁰“Sûn neh zân iom rangin thuthlung ki siam a, an zoro vong indik thap rangin thu ki thlung a, kha thuthlung khah indanglam thei ni no nih.

²¹Khaangkah takah khan Davida zianga ki thuthlung, ‘Archihei rêng an hong ichang mai rang a nit’ iti thu neh ‘Levia richi thiampuhein ki sin an itho mai rang a nit’ itia ki thuthlung khah indanglam ni thei tlak no nih.

²²Ke som Davida richihei neh ki sin itho ngai Levia richi thiampuhei chu ki înpung rang a nit. Rivâna ârsihei neh tuipui rikama ṭiai tep zoi loi dôrkan ki înpung rang a nit.”

²³PUMAPA khan ki ziangah hingkan a ti a:

²⁴“Ki irthlang insungkua inikahei, Israel neh Juda chu kî heng an nit tâk itia mihein an îsîr hih ni lei riat tâk im? Khasikin, ki mihei chu musitin an en a, nam angkah khomin an ibe khâi ino a nit.

²⁵Nikhomsela, Keimah PUMAPA hin sûn neh zân iom rangin thuthlung ki siam a, rinêng neh rivân om rang dânhei chu keima înrifûk a nit.

²⁶Ama ki thil tho hih ai det angkan Jakoba richihei neh ke som Davida zianga ki thuthlung chu ki îndet mai rang a nit. Abrahama, Isaka neh Jakoba richihei chunga roiirêl rangin Davida richihei lâia rithokin mi khatkah ki irthlang rang a nit. Ki mihei chungah khorngaina nei ki ta, anni chu vângisakin siam nôk ki ti.”