Read Biete JEREMIA 34 Bible Online

JEREMIA 34 - Biete bible

JEREMIA 34

¹Babilon rêng Nebukadnezara neh a sipai lôm murdihei banah ama thloptu, a thunuaia rêngram sunga nam tin chi tinhein, Jerusalem neh a kôlvêl khuahei an doi lâiah khan PUMAPA thu chu ki ziangah a zuang tlung a.

²PUMAPA, Israelhei Pathian khan rêng Zedekia ziangah ife a, a zianga thu ril rangin a ne tir a: “Keimah, PUMAPA hin hi khopui hih Babilon rêng kutah lan ki ta, ani khan meiin ai hâl vang rang a nit.

³Zôk tlak no tin a; nang man an ta, a ziangah nang lan an ti. Babilon rêng neh mâiritongin risôn nin ta, Babilon ramah nang ṭhui a ti.

⁴O Juda rêng Zedekia, ni chungchâng thu ki îsîr hih ringai roh. Ridoina munah ithat ni no tin e.

⁵Thlangam takkan thîng ni ta; khante, ni chibul, ni matona rêng lei ichanghei an phûm zoroa mipuiin namhoi an ihâl pêk ngai angkan nang khom namhoi nang hâl pêk an ti. Nang ṭâ an ta, ‘Ei rêng chu a thi tâka na!’ tîng an ti. Keimah, PUMAPA hin kî ti tâk a nit.”

⁶Khanungchu, hi thu murdi hih Jerusalema Juda rêng Zedekia ke ril riai a.

⁷Babilon rêng sipai lômin khopui an doi lâi takah khan Judai rama khopui kul inei a la om isun Lakis khua neh Azeka khua khom khah sipai lômhei khan an doi a.

⁸Rêng Zedekia neh Jerusalema mi murdi khan bôisuakna thu an inpuang a,

⁹mi tinin an Hebrai suak, ipa neh nupang khom an isua rang a nit iti thuthlungna an siam a. Tutên a chipui Israel khah bôiin a mang rang ni mak.

¹⁰Khanchu, mipuihei neh ruaituhei, thuthlung ipomtu murdi khan an bôinuhei, an bôipahei kha an isua a, irên mai khâi loi rangin ṭha an ti thlâng a; an isua tâk a.

¹¹Khanniseh, itôiteka nungah chu an lungril indanglamin an bôinu neh an bôipa an îsua tâkhei khah an ṭhui kîr nôk a, zâlrâtin suak an inchang nôk tâk a.

¹²Khanchu, PUMAPA thu chu ki ziangah a zuang tlung nôk a.

¹³Israelhei Pathian khan hingka hin a ti a: “Aigupta rithoka sanisua a, bôi ata ken zalen lâiah khan nin chibulhei neh thuthlung kî siam a nit.

¹⁴Tukhomin, a kum sarina kipah, a Hebrai champui bôia a irchôk khah â sua rang a nit. Kum irukka sung sin a tho tâkin chu isua ngêt ngêt rang a nit. Khanniseh, nin chibulhei khan ki thu khah ringai mak a, an ne ingaisak viat ino a nit.

¹⁵Sûn sôt inote sungah khan nin rilet a, ki mitmuah thil dik nin tho a. Nin rêngkan nin suapui Israelhei nin inzalen tâk thu nin inpuang a. Ker ming rilamna ngai mun ki Tempil ngêiah, ki maah thuthlungna nin nei a.

¹⁶Khanniseh, nin lungril nin thleng a, ker ming nin isiat a. Nin înzalen tâkhei khah nin rêngkan nin ṭhui ikhîr nôk a, nin bôia om nôk rangin zâlrâtin nin iṭhui nôk tâk a nit.

¹⁷Khasikin, keimah, PUMAPA hin kî ti a nit; atûnah hin ki thu zôm mak chei a, nin chipui Israelhei ta rangin zalenna thu inpuang mak chei. Keiman chu nin ta rang zalenna thu ki înpuang tâk a nit: khandaihei, ripuihei, iṭâmheia nin thina rang ata zalenna chu a nit. Nin chunga ki sintho sikah khan rammuala nam tin tinhei ṭisimin nangni siam ki ti.

¹⁸Juda milianhei, Jerusalema milianhei, rêng-ina milianhei, thiampuhei, ruaituhei murdi, an rêngkan serâtchal phalinika an ikhoi kâra lônin keimah neh thuthlung an isiam a nit. Khanniseh, thuthlung khah an ikhiak a, an izôm ino a nit. Khasikin, serâtchal phalinika an ikhoi angkah takah khan ki mihei chungah hin kî tho rang a nit.

²⁰Anmani that itumtu, an irâlhei kutah pêng ki ta, an ruakhei chu ivahei neh ramsahein fâng an ti.

²¹Juda rêng Zedekia neh a milianhei khom an irâl, anmani that itumtuhei kutah pêng ki ti. Babilon rêng sipai lôm, anmani doi ringam tâkhei kutah anni chu kî lan rang a nit.

²²Hi khopuia hong ilût nôk rangin anni chu thu pêng ki ti. Hong rûn an ta, hong la riai an ta, hâl inrivâm vang an ti. Judai ram khopuihei chu luatu om ino ramchâr angkan siam ki ti. Keimah, PUMAPA hin kî ti tâk a nit.”