Read Biete JEREMIA 36 Bible Online

JEREMIA 36 - Biete bible

JEREMIA 36

¹Juda rêng Josia naipa Jehoiakima inlal kum ilinaah khan PUMAPA thu ki ziangah a zuang tlung a.

²“Lekhazuat lan la, Israelhei chungchâng, Judahei neh nam danghei chungchâng ni zianga ki îsîr murdi kha riziak roh. Josia inlal lâia ni ziangah thu ke sîr phutnî-a rithoka vuani tena ki thu sîrhei kha riziak vang roh.

³Juda mihei khan an chunga vânduaina inrît ithlun ranga kî tumhei kha lei irian an om dân isualhei an rilet duai lôiim; an riletin chu an pualoina neh an sualna chu ngaidam ki ti,” a ti a.

⁴Khanchu, Neria naipa Baruka chu ki koi a, a ziangah PUMAPA thu sîr a rêngkan ke sîr pêk a, amakhah Barukan lekhazuatah a lei riziak a.

⁵Khanungchu, Baruka chu hingkan he ki be a, “Keimah chu Tempila lût rangin iphal ni khâi mang a,

⁶Khasikin, zoro nôkah mipuihei bu an ngei tikin Tempilah ni fe rang a nit. PUMAPA thu, lekhazuata nang ki înriziak khah Tempila omhei murdîn an riat theina rangin iring takkan ni tep rang a nit. Juda mi, an khopuihei ata hong murdihei riatah khom ni tep pêk rang a nit.

⁷Mihei khan an om dân isualhei riletin PUMAPA ziangah ngaidam an ngên duai lôiim. PUMAPA thunpuang, a mihei chunga a ningthik neh ningmur natinsat tak lak hih a înrît a nit a,” ki ti a.

⁸Khanchu, Neria naipa Baruka khan PUMAPA thuhei chu ke ril lam angkah takin a tep suak tâk a.

⁹Juda rêng Josia naipa Jehoiakima inlal kum ringana, a thla kuaknaah khan PUMAPA lunginhoina rangin mihei khan bu an ngei a. Jerusalema om murdihei neh Judai ram khopuiheia rithoka Jerusalema honghei khan bungei nikhua an châm tâk a.

¹⁰Khanchu, Baruka khan lekhazuata ki thu sîrhei murdi khah Tempila ziaktu Safana naipa Gemaria chontana rithokah khan mi murdi riatah a tep a. Kha chontan khah Tempil chuanchung lûtna Kotbâi Ithar kôla om a nit.

¹¹Safana nai Gemaria naipa Mikaia khan lekhazuata PUMAPA thu Baruka itep murdi khah a lei riat a.

¹²Rêng-inah a fe a, ziaktu chontanah khan a lût a; amakhan milianhei murdi roiirêlin an lei iṭhung a. Kha mihei khah ziaktu Elisama, Semaia naipa Delaia, Akbora naipa Elnathana, Safana naipa Gemaria, Hanania naipa Zedekia neh ulian dang danghei an nit.

¹³Barukan mipui zianga lekhazuat ai tepa rithoka ai riat murdi khah Mikaia khan anni chu â ril a.

¹⁴Milianhei khan Nathania naipa Jehudia (Jehudia kha Kusia nai Selemia naipa Nathania nai a nit) kha Baruka ziangah an tir a, mipui riata ai tep lekhazuat khah zuang ichôia zuang rangin an iril a. Baruka khan lekhazuat ichôiin an ziangah a fe a.

¹⁵Anni khan a ziangah, “Iṭhung inla, kin riatah lekhazuat kha ne tep pêk roh,” an ti a. Khante, Baruka khan an ti lam angkah takin a tep pêk tâk a.

¹⁶A tep pêk zoiin chu an ri-en a, Baruka ziangah khan, “Hi thu hih rêng ziangah isîr ngêt kin ti,” an ti a.

¹⁷Khanchu, Baruka kha an ridon a, “Hi thuhei hih ingkana ni irziak im ne ril roh, Jeremia thusuak ngêt a nit na?” an ti a.

¹⁸Baruka khan a sâm a, “Jeremian hi thuhei hih a rêngkan ki ziangah a ril a, keiman hi lekhazuatah hin ki lei irziak a nit,” a ti a.

¹⁹Khanungchu, a ziangah khan, “Suak inla, Jeremia neh nin ribîk ngêt rang a nit, nin omna khah tutên an riat rang ni mak,” an ti a.

²⁰Khante, ulianhei khan ziaktu Elisama chontanah khan lekhazuat khah an sia a, rêng-in rikul sungah an lût a, amakhan rêng kha an thu riat murdi chu an iril a.

²¹Rêng khan Jehudia kha lekhazuat va la rangin a tir a. Elisama chontana rithokin a va lâk suak a; Jehudia khan rêng neh a kôla ding milianhei murdi riatah khan a tep tâk a.

²²Thla kuakna a nit a, phalbi zoro a nit sikin rêng kha phalbi inah khan mei kôlah â ṭhung a.

²³Jehudia khan lekhazuat rân ithumka manih, rân ilika manih a tep zoiin chu rêng khan chemten a ât thlêra, meiah a vôr a, lekhazuat khah a kâng riai tâk a.

²⁴Rêng neh a ulianhei, kha thu murdi iretuhei khan iṭi mêl riput mak a, an puanhei khom potthlêr mak.

²⁵Elnathana hei, Delaia hei, Gemaria hein lekhazuat hâl iloi ranga rêng kha an ngên ngit khomin ani khan îten a irngai pêk ino a nit.

²⁶Khanchu, rêng khan keimah neh Baruka man rangin rêng naipa Jerameela hei, Azariela naipa Seraia hei, Abdeela naipa Selemia hei kha thu a pêk tâk a. Nikhomsela, PUMAPA khan kin ruaika khan a ne thup tâk a.

²⁷Rêng Jehoiakiman ki thu sîr suak Barukan lekhazuata a lei irziak murdi a hâl zoi nungah khan,

²⁸PUMAPA khan lekhazuat dang ila nôk a, lekhazuat masaa lei ichuang murdi riziak nôk rangin a ne ril a.

²⁹PUMAPA khan Juda rêng Jehoiakima chungchâng thu-ah hingka hin a ti a: “Babilon rêng ihongin hi ram hih isehchit a ta, a mihei neh ranhei khom that riai a ti, itin îtho ranga Jeremia khan a irziak im itin chu ner don a, lekhazuat khah ni hâl a.

³⁰Khasikin, atûnah hin nangmah Juda rêng Jehoiakima ziangah hin keimah, PUMAPA hin kî ti a nit: Ner chihei lâi ata Davida rêngṭhungmuna ṭhung rang mi inzir no nih. Ni ruak chu sûn nîsa lum neh zân idâi ituang rangin ipai nîng a ti.

³¹Nin sual sikin nangmah neh ner chihei, ni milianhei chu kuttum nangni kî tho rang a nit. Nangman manih, Jerusalem neh Judai rama mihein manih nin chunga siatna zuang itlung rang nangni ki îril khah ngaisak mak chei a. Khasikah khan nangni ki lei iṭhina ngai vânduaina inrît murdi chu nin chungah ki îṭhum rang a nit,” a ti a.

³²Khanchu, lekhazuat dang ki lâk nôk a, ziaktu Baruka ziangah ki pêk a, ani khan ki ṭongbâi suak murdi a lei riziak a. Lekhazuat masaa riziak tâk, Jehoiakiman ai hâl tâk thuhei neh ar-angpui thu danghei khom arziak tâk a.