Read Biete JEREMIA 37 Bible Online

JEREMIA 37 - Biete bible

JEREMIA 37

¹Babilon rêng Nebukadnezaran Judai ram rêng ranga ai phun Josia naipa Zedekia chu Jehoiakima naipa Jehoiakina rithûlin a hong inlal tâk a.

²Khanniseh, Zedekia neh a milianhei neh a rama mipuihei khomin PUMAPA thucha ne pêk khah an izôm nuam ino a nit.

³Rêng Zedekia khan Selemia naipa Jehukala neh Maaseia naipa thiampu Zefania kha a nampum rithûla PUMAPA kin Pathian zianga ṭongṭai pêk ranga ne ngên rangin ki ziangah a hong tir a.

⁴Tâng inah ikhum la ni mang a, mipui lâiah zalen takkan ki la lêng thei mai lâi tak a nit a.

⁵Babilon sipai lôm khan Jerusalem kha an hual khap a; khanniseh, Faroa sipaihei khah Aigupta ramrî an hong khêl tâk iti an riatin chu Babilon sipaihei kha an inungtiang an kîr nôk tâk a.

⁶Khanchu, PUMAPA Israelhei Pathianin Zedekia zianga iti pêk rang thu

⁷a ne ril a, “Ringai roh, Faroa sipai, nang isan ranga hong rithokhei chu an ram Aiguptaah kîr nôk an ti.

⁸Khanchu, Babilonhei hong kîr nôk an ta, hi khopui hih doi an ta, lâng an ta, an ihâl insiat riai rang a nit.

⁹Keimah, PUMAPA hin nang kî ti a nit: Babilonhei hong kîr khâi no nih itin nin khâtin rilêm no rei. Babilonhei chu an hong ikîr nôk ngêt rang a nit.

¹⁰Nangmani hong idoitu Babilon sipai lôm hih inê vang khom unla, an lâia popliam itong, an puan-ina zâlhei khom kha, hong thoi nôk an ta, hi khopui hih an ihâl isiat riai rang a nit, itin iril roh,” a ti a.

¹¹Faroa sipai lôm an hong nâi sika Babilon sipai lôm Jerusalema rithoka nung an ritol lâiah khan,

¹²Kei chu insungkua richon ata ki rangtum ilah rangin Jerusalem ata Benjamin ram hualah ki fe a.

¹³Khanniseh, Benjamin Kotbâi ki tlungin chu vêngtu lâia ruaitu, arming Irija, Selemia naipa, Hanania tupa khan a ne lei idan a, “Babilonhei ziangah iro nî tum a nit,” a ti a.

¹⁴Keiman, “Khangkan ni mak, Babilonhei ziangah iro tum mang e,” ki ti a. Khanniseh, Irija khan ki thu sîr khah ringai nuam mak a, a ne man a, ulianhei ziangah a ne ṭhui tâk a.

¹⁵Ruaituhei chu ki chungah ningmur an rilâk a, an ne tôk a, ziaktu Jonathana inah an ne khum a, kha in khah tâng-ina an imang a nit.

¹⁶Rinêng ril chontan inthim takah sûn itam takkah isian ki om a.

¹⁷Nungah chu rêng Zedekia khan a ne koi suak a, rêng khan inrûkkan a inah khan thu a ner don a, “PUMAPA ziang ata thu imani lua a om im?” a ti a. “O a om, Babilon rêng kutah ipen om ni ti,” itin ki sâm a.

¹⁸Khanchu, keiman rêng Zedekia ziangah khan, “Ni chunga manih, ni milianhei chunga manih, mipuihei chunga manih, im thonchâina kî nei, îtho sika tâng ina ikhum kî nit im?

¹⁹‘Babilon rêng chu nangmah neh hi ram doi no nih,’ itia nang iril ngai ni zânthlahei khah taktiang im an iom tâk?

²⁰Khasikin, atûnah hin, Epu marit iomtak, ringaiihoi takkan ki ṭong hih ringai inla, ki ngênna hih ne phal pêk roh. Ngaihoi takkan ziaktu Jonathana inah khan ne tir kîr nôk tlak khâi no roh, ni ne tir kîr nôkin chu kha munah khan kî thi ngêt rang a nit,” ki ti a.

²¹Khanchu, rêng Zedekia khan vêngtu rikul sunga ne khum rangin thu a pêk a. Ibai isiamtuhei zianga rithokin sûn tin ibai thliamkah, khopuia ibai a hek mâkah chu ipen ki om a. Khangkah khan vêngtu rikul sungah khan ki om mai tâk a.