Read Biete JEREMIA 38 Bible Online

JEREMIA 38 - Biete bible

JEREMIA 38

¹Matana naipa Sefatia, Pasura naipa Gedalia, Selemia naipa Jehukala, Malkia naipa Pasura hei khan mipuihei zianga ki thu ril kha an riat a.

²PUMAPA khan, “Khopuia omhei chu khandaihei, iṭâmhei, ripuihein thîng an ta; Babilonhei zianga ripehei chu zôk an ta, imanin om an ta; khanniseh, an ringna chu izua nîng an ti,” ai ti a nit.

³“Hi khopui hih Babilon rêng sipaihei kutah pêng ki ta, an ilâk rang a nit, PUMAPA khan ai ti a nit,” itin anni chu ke ril a.

⁴Khanungchu, ruaituhei khan rêng ziangah, “Hi mi hih ithat ngêt rang a nit hih. Hi khopuia sipaihei neh mipuihei hih hingkana a thu sîr sikah hin thâiindôpin an om zoi tâk a. Hi mi hin mipui ṭhatna rang zong loiin an siatna rang bang ai zong a nit,” an ti a.

⁵Rêng Zedekia khan a sâm a, “Ringai rei, ani chu nin kuta om a nit a, a chungah nin nuam lam takkan tho rei; rêng hin nangni khap no nih,” a ti a.

⁶Khanchu, an ne ṭhui a, rêng naipa Malkia tuisunsua khurah khan ruiin an ne ṭhul a, amakhah vêngtu rikul sunga om a nit. Tuisunsua khurah khan dialipok ti no chu tui zel omak a, dialdôka khan ki ṭul tâk a.

⁷Nikhomsela, Ethiopia mi, thâinuzel, rêng ina om ngai Ebedmeleka khan tuisunsua khurah an ne ṭhul iti a lei riat a. Kha zoro takah khan rêng chu Benjamin Kotbâiah roi a rêl a.

⁸Ebedmeleka kha rêng in ata a suak a, rêng ziangah khan,

⁹“Epu marit iomtak, hi mihei hin Jeremia chungah thil dik ino tak an itho a nit. Jeremia chu tuisunsua khurah an iṭhul a, khopuia lak fâknêk om khâi mak a; khasikin, amakhan voniṭâmin ai thi ngêt rang a nit,” a ti a.

¹⁰Khanchu, rêng khan Ebedmeleka kha thu a pêk a, “Mi dang ithumkah ṭhui inla, zânthla Jeremia chu a thi man tuisunsua khur ata zu kêlisua rei,” a ti pêk a.

¹¹Khanchu, Ebedmeleka khan mihei kha a ṭhui a, rêng neinun siana munah khan an fe a, puan iṭet tâk kha an va lâk a, tuisunsua khurah khan ruirual an ne zuk iṭhul pêk a.

¹²Ruirual khan a nen nat nona rangin puanṭet khah ke zak nuaia kep rangin a ne ril a, khangkah khan ki tho a.

¹³Khanchu, tuisunsua khur ata kha an ne kâi isua tâk a. Kha rizoin chu vêngtu rikul sungah khan an ne sia tâk a.

¹⁴Rêng Zedekia khan a ne koi a, Tempil kotbâi â thumnaah khan an ne ṭhui a. Rêng khan ki ziangah, “Thu nang ridon ki ta, ki ziangah thudik îte thup no roh dua,” a ti a.

¹⁵Keiman rêng khah ki sâm a, “Thudik nang ke ril lakin ne that ni ta, lungvâr nang sak khom inlang nî ngaisak ino rang a nit a,” ki ti a.

¹⁶Khanchu, Rêng Zedekia khan inrûkkan ṭong a nen kung a, ki ziangah, “Pathian iring, ringna ne petu rimingin ṭong ki irkhâm a nit, nang that tlak no ning a, hi nang ithat itumtuhei kutah khom nang lan tlak no ning e,” a ti a.

¹⁷Khanungchu, Zedekia kha PUMAPA Tinrêngthothei, Israelhei Pathianin ai ti murdi chu ke ril a, “Babilon sipai ulianhei kutah ner pêkin chu ni ringna chu izuan om a ta, hi khopui hih ihâl vangin om no nih. Nangmah neh ni insungkua khom izuan om nin ti.

¹⁸Khannisela, Babilon rêng sipai kutah ner pêk nuam non chu hi khopui hih Babilon mihei kutah ipe nîng a ta, hâl vang an ta, nang khom an kuta rithokin zôk no tin e,” ki ti a.

¹⁹Khanniseh, Rêng khan a ne sâm a, “Babilon mihei zianga ripe Judahei hih kî ṭi a nit. Anni khan an kutah ne lan duai an ta, deng an ne înthei ral rang a nit,” a ti a.

²⁰Keiman, “Anni khan an kutah nang lan tlak no nih. PUMAPA thu nang ki îril hih zôm roh; amakhah ni ta rangin ṭhâng a ta, ni ringna khom izuan ai om rang a nit.

²¹Khanniseh, ner pêk nuam non chu thil hong itlung rang kha PUMAPA khan a ne înmu thlâm tâk a nit.

²²Juda rêng ina nupang la om murdi chu Babilon rêng sipai ulianhei ziangah ṭhui an ta, kha nupanghei khan ni ziangah, “‘Rêng rualṭhahei khan ani chu an lêm a, An thunuaiah an sia tâk a. Atûn dialdôkah a ke â ôk tenan chu, A rualhein an imâk tâk a nit,’ tîng an ti.

²³“Ni nupuihei neh ni naihei chu Babilonah ṭhui riai an ta, nangmah khom an kut ata zôk tlak no tin e. Babilon rêngin nang man a ta, hi khopui hih hâl inrivâm vang nîng a ti,” ki ti a.

²⁴Rêng Zedekia khan a ne sâm a, “Hi thuhei hih tutên reh no riseh; khanchu, ni ringna inrimangin om no nih.

²⁵Ruaituhein nang ker sônpui iti an riatin chu ni ziangah hong an ta, ‘Rêng ziangah im ni îsîr a, rêngin ni ziangah im a îsîr, ne ril roh, îte thup no roh, nang that no ning ung e,’ an tin chu,

²⁶nangman an ziangah, ‘Rêng kha tâng-ina thi rangin chu ne tir kîr nôk khâi loi rangin kî ngên a nit,’ ti roh,” a ti a.

²⁷Khaangkah takin ruaituhei kha an rêngkan ki ziangah an hong a, an ne hong ridon a; rêngin he a ne be lam angkah takin anni chu ki lei iril a. Khanchu, rêng neh kin risônna thu khah tutên an riat no sikin ki ziangah îte ti ual mai khâi mak a.

²⁸Jerusalem ila a nit mâkah chu vêngtu rikul sungah khan isian ki om mai tâk a.