Read Biete JEREMIA 4 Bible Online

JEREMIA 4 - Biete bible

JEREMIA 4

¹PUMAPA khan hingkan a ti: “Israel mihei o, hong ikîr nôk nin inuam a nitin chu, ki ziangah hong kîr nôk rei. Nin mirmil porinche tak takhei kha ki makung ata nin khâipaih a, keimaah iamomin nin omin chu,

²keima riminga ṭongrikhâmna nin inei rang khah thil dik nîng a ti.[7] Khangkan a nitin chu nam tinrêngin anmani khom ṭhat ivur rangin ne ngên an ta, ne chôiinrisâng an ti.”

³PUMAPA khan Judai rama mihei neh Jerusalema mihei ziangah hingkan a ti: “Nin rinêng la tuk inohei khah tuk unla; nin chimuhei kha riling kârheiah rithe no rei.

⁴Nangmani Judai rama mihei neh Jerusalema omhei o, Keimah, nin PUMAPA ta rangin riser rithiang unla, nin lungril ser tan rei. Khanonchu, nin thil isual thohei sikah khan ki ningthik a ta, mei angkan ai chok rang a nit. Kâng a ta, â that thei tute om no nih.”

⁵Bekul chu rampumpuia tum unla, Iring tak neh ifiang takkan inpuang rei. Judai rama mihei neh Jerusalema omhei chu, Kul inei khopuiheiah itlân lût rangin iril rei.

⁶Zion tiang ikhinin risinsiana târ rei. Zôkna zongin itlân unla, rivuak no rei. PUMAPA khan vânduaina rikhêl tak neh, Rimang ripna mâr tianga rithokin a zuang îthlun rang a nit.

⁷Sakeibaknei â pûk ata hong isuak angkan, Namhei isehchit rangtu chu a zuang ilang tâk. Judai ram isehchit rangin a hong tâk a, Judai ram khopuihei chu inramin om a ta, An sungah khan tute lêng no nih.

⁸Khasikin, borapuan sil unla, Ringaiinsia ṭapin irung rei. PUMAPA ningthik inrît tak khah, Judai ram ata a la irkiang ino a nit.

⁹PUMAPA khan, “Kha nikhuaah khan chu rênghei neh milianhei lungril chu indôp a ta, thiampuhei buai tak tak an ta, zânthlahei khom an ilung zîng tak tak a ti,” a ti a.

¹⁰Khanchu, keiman, “Pumapa PATHIAN, Jerusalem mihei hi nî lêm tâk kêng a nit hite! ‘Thlangamna om a ti,’ ni lei ti a. Khanniseh, khandai ringat ṭian tâk kêng an nit hite,” ki ti a.

¹¹Kha tikin chu hi mihei neh Jerusalema omhei hingka hin iril roh: “Ramchâra rithokin phâivua lum ki mihei tiang a hong râng a, farsi sêm infâi ngai phâivua râng phiai angkah pai ni no,

¹²phâivosimpui chu PUMAPA thupêkin a hong irâng rang a nit. A mihei chungthu rêltu chu PUMAPA ngêi kha a nit,” itin.

¹³En ta, sûmpui angkan irâlhei chu an hong lian e. An sakor tâlihei chu thlisim angkah a nit a, an sakorhei khom mupui nêkan an rât ual a. Ei chung ân khôk e! Armang ei nit tâk hih!

¹⁴O Jerusalem, ni lungril isual risûnfâi roh; khanchu, saninzôkin om ni ti. Itena sôt im ngaituana insual ni lâi nei mai rang hi?

¹⁵Dana khopui ata neh Efraim tlângramhei ata siatna hong itlung rang thang an hong inthei e.

¹⁶Namhei iril unla, Jerusalemah inpuang rei. Ram ilah taka rithokin hualtuhei an hong e. Judai ram khopuihei irûn rangin ipâi an ti.

¹⁷Loi irungtuhei angkan Jerusalem chu â vêlkan hual khap an ti. PUMAPA chungah an rihel tâk sika a nit. PUMAPA khan ai ti a nit.

¹⁸Judai ram, ni omdân neh ni thil thohein amahih ni chungah ni îthlun tâk a nit. Ni sualna khan nang ân tuang a; ne lung ai sun tâk a nit hih.

¹⁹A nat vang na! A nat vang na! Tuang zoi khâi mang e! O ki lungril a nat vang na, ke lung a buai zoi tâk e! Dâirek thei khâi mang e; Bekul irîhei neh ridoina rihuhei lak ki riat tâk a.

²⁰Vânduaina rikhêl tak a hong tlung zut zut a; Ram pumpui chu a siat zoi tâk a. Mitkhap kârkan kin puan inhei a siat a, A puanzârhei a thlêr zoi tâk.

²¹Itena sôt im ridoi ilum [8] hih ki lai mu maiin bekul irîhei ki lai riat mai rang?

²²PUMAPA khan hingkan a ti: “Ki mihei chu an intlôk tak tak a, an ne iriat ino a nit. Naipang intlo angkah an nit a, riatthiamna nei mak e. Thil ṭhano tho chu an thiam zap a, Thil iṭha tho rangin chu lo an samna korong a nit.”

²³Rinêng chung ki thlîr vêl a, ringai ta, îte omak a, a khorong a nit; Rivânah khom ivâr rêng rêng om viat mak.

²⁴Itlânghei ki en a, ringai ta, an inîng dur dur a, Mualhei khom an risoi dût dût a.

²⁵Ki hang en a, kha munheiah khan miriam zel mu mang a; Ivahei tena lua khom an vuang rot vang tâk a.

²⁶Ram iṭha tak kha ramchâr a chang zoi tâk a; PUMAPA ningmur rikhêl tak sikah khan, Khopui murdi khom a ram zoi tâk.

²⁷(PUMAPA khan, “A ram pumpui chu sekhola sia nîng a ta; khanniseh, a rêngkan iseh vang no nih,” a ti a.)

²⁸Khasikah khan rinêng hi ngûi ruai a ta, Rivân khom zîng khap a ti. PUMAPA khan a ti tâk a, a lungril thleng khâi no nih. Thu thlûkna a siam zoi tâk a, inrilek khâi no nih.

²⁹Sakor chungchuang mihei neh thal ichôi ngaihei rihu khan, Mi tin lâizâm inthông a ta, Ṭhenkah rampui nuaia itlân an ta, A ṭhen lungpui kârheiah lût an ta, Khopui murdi ram zoi a ta, luatu zel om khâi no nih.

³⁰Jerusalem, isehripa om tâk, Îtho rang im puan seninlâra ni la irvo mai? Îtho rang im rângkachaka ni la irvo a, ni mithei ni la înduk mai kha? Â tlonga ni irvo a nit, ni îdithei khan nang an nôl a, Nang ithat an itum a nit tâk.

³¹Zion nainu khêk ngûi ngûi irî ki riat a, Nupang naiha isêa khêk irî, Nai lutîr nei rang naiha isê rung vong vong irî angkah a nit. Amah khah Jerusalem rithuak risama khêk irî a nit a, Â bân a phar a, “Ki chung ân khôk e! Ne that rang an hong tâk hi,” a ti a.