Read Biete JEREMIA 40 Bible Online

JEREMIA 40 - Biete bible

JEREMIA 40

¹Sipai iruitu Nebuzaradana khan Rama khuaa rithoka a ne sua zoi nungah khan PUMAPA thu ki ziangah a zuang tlung a. Kei khom Judai ram neh Jerusalema rithoka bôia an iman, zingziri inbun puma Babilon ram tianga an iṭhuihei lâiah khan kî ṭang sa a nit.

²Sipai iruitu khan a ne ṭhui infiar a, ki ziangah, “PUMAPA ni Pathianin hi muna vânduaina tlung rang hih a lei inpuang tâk a.

³Atûnah hin a lei iti angkah ngêiin a îthlun tâk a nit hih. PUMAPA chungah thil nin thonsual a, a thu nin zôm no sikin hihei hih a zuang itlung tâk a nit hih.

⁴Khanniseh, nang chu, vuaninta rithokin ni zingziri bun hi nang kî sûtpêk tâk a nit. Ni nuamin chu ki ziangah Babilonah fen la, keiman nang enkol ki ti. Ni nuam non chu zuang no roh, ni nuamna tiang takah fe thei ni ti,” a ti a.

⁵Keiman ki la sâm man Nebuzaradana khan, “Babilon rêngin Juda khuahei iop ranga ai phun, Safana nai, Ahikama naipa Gedalia ziangah kîr nôk inla, a zianga om roh, a nit nole chu ife ranga ni nuamna takah khan fe roh,” a ti nôk a. Khanchu, sipai iruitu khan ifah rang neh thilpêk ṭhenkah a ne pêk a, a nen fe tâk a.

⁶Gedalia ziangah Mizpah khuaah ki fe a, ramsunga a la châm isunhei lâiah ki om sa tâk a.

⁷Sipai ruaituhei neh mi dang, arpenohei tlângrama om murdihei khan Babilon rêngin Ahikama naipa Gedalia chu ram optu, ram sunga mi inrianghei, nupanghei neh naipanghei, Babilon rama bôia iṭhuia om inohei enkoltu rangin a phun iti an lei riat a.

⁸Mizpah khuaah Gedalia rimupui rangin hi mi, Nathania naipa Ismaela, Korea naipa Johanana, Tanhumeta naipa Seraia, Netofa mi Efaia naipahei, Makath mi Jezania neh mi danghei an hong a.

⁹Gedalia khan an ziangah neh an mihei ziangah khan, “Kaldaihei [50] sin itho chu ṭi tlak no rei, hi ram hih lua unla, Babilon rêng sintho unla, nin ta rangin ṭhâng a ti.

¹⁰Keimah khom nin rithûla Babilon mihei maa ding rangin Mizpa khuaah hin om ki ta, nangmanin uain hei, fûr thei hei, oliv riak hei ritik bûm unla, nin bêlheiah rihung unla, nin khua luaheiah khan om mai rei,” itin an ziangah thu archa a.

¹¹Khangkah ngirin, Moab rama Juda om murdihei, Edom rama omhei neh ram danga Juda om murdihei khan Babilon rêngin mi iroichekah Judai rama a mâk thu neh Ahikama naipa Gedalia, Safana tupa kha khahei ioptu rangin an phun iti an lei riat a.

¹²Khanchu, an rithek indarna ram ata Judahei chu Judai ramah an hong kîr a. Mizpah khuaa om Gedalia ziangah an hong tlung a, uain neh fûr thei itam takkah an hong chôi pêk a.

¹³Korea naipa Johanana neh sipai ruaitu arpe no tlângrama omhei khom khah Mizpa khuaah Gedalia ziangah an hong a.

¹⁴A ziangah, “Amon mihei rêng Baalisa khan Nethania naipa Ismaela chu nang ithat rangin a tir iti nî riat ino mani?” an ti a. Khanniseh, Gedalia khan kha thu khah iam mak a.

¹⁵Khanchu, Johanana khan inrûkkan Mizpa khuaa om Gedalia ziangah khan, “Nethania naipa Ismaela that rangin nen fe ro ba, tu ithat im ai nit reh no nih. Îtho rang im ni ringna ai lâk rang? Nangma ribêla Juda mi murdi neh Judai rama a la châm isunhei kha rithek indarin an irmang riai rang a nit,” a ti a.

¹⁶Khanniseh, Gedalia khan a sâm a, “Kha thil khah tho no roh, Ismaela chungchâng thu ni îsîr hih thudik ni mak,” a lei ti a.