Read Biete JEREMIA 41 Bible Online

JEREMIA 41 - Biete bible

JEREMIA 41

¹Kha kum a thla sarinaah khan Elisama nai, Nethania naipa Ismaela, rêng richi, rêng milianhei lâia khatkah khan mi sômkah a ṭhui a, Mizpa khuaah Gedalia mu rangin an hong a. Mizpa khuaah khan an rêngkan munkan bu an nêk a.

²Ismaela chu a mi hong ṭhui sômkahei neh khan voikazelin an khandaihei an thuat a, Gedalia chu an that tâk a.

³Ismaela khan Mizpa khuaa Gedalia zianga Juda om murdi neh Babilon sipai, kha muna omhei khom khah a that riai a.

⁴A tûkah, Gedalia thi thu tutên an la riat maah khan,

⁵Sekema rithok hei, Siloa rithok hei, Samaria rithok hein mi sômiriatkah an hong a. An rikhamulhei an voi vang a, an puanhei an ipotthlêr a, an taksahei an ât iphop [51] a. PUMAPA Ina ibai neh namhoi ilan ranga hong an nit.

⁶Khanchu, Ismaela chu iṭap thiai pumin anmani don rangin Mizpaa rithokin a fe a. Anni khah a va tongin chu an ziangah, “Ngaihoi takkan Gedalia mu rangin hong rei,” a ti a.

⁷Khopui sung an hong lûtin chu Ismaela neh a mihei khan anni chu an lei that a, an ruakhei kha khurpuiah an pai a.

⁸Khanniseh, kha mihei lâiah khan mi sômkahei khan chu Ismaela ziangah khan, “Ngaihoi takkan ne that no roh. Buhei, barlihei, riakhei neh khuaituihei itamkah loiah kin ithup a nit,” an ti a. Khanchu, anni khah a zua a, an mal danghei lâiah khan ai that sa khâi ino a nit.

⁹Ismaelan a mi thathei ruak a paina khurpui khah Israel rêng Baasa khan a doi lâia rirungna ranga rêng Asa ichoi a nit. Ismaela khan a mi thathei ruakin khurpui khah ân sip khap a.

¹⁰Khante, Ismaela khan Mizpaa mi la om murdi, rêng nainuhei, sipai ruaitu Nebuzaradanan Gedalia enkolna nuaia Mizpa khuaa ai siahei murdi kha an rêngkan a man a, bôiin a siam tâk a. Ismaela khan anni chu Amon ramhual tiang a ṭhui tâk a.

¹¹Korea naipa Johanana neh sipai ruaitu, a zianga om murdihei khan Ismaela thil thonsualhei khah an riat tâk a.

¹²Khanchu, Ismaela doi rangin an mihei an bûm a, an rizûl tâk a. Gibeon kho kôla dîl ilianpa kôlah khan an va môk a.

¹³Ismaelan bôi ranga ai ṭhui mipuihei khan Johanana neh a zianga sipai ruaitu omhei khah an mun chu an lôm tak tak a.

¹⁴An rêngkan an hong kîr a, Johanana tiang an ṭang riai tâk a.

¹⁵Khanniseh, Ismaela neh a lôma mi iriatkahei kha chu Johanana kuta rithoka zôkin Amon mihei ziangah lâizâm an tho tâk a.

¹⁶Johanana neh sipai ruaituhei khan Ismaelan Gedalia a that zoi nunga Mizpaa rithoka bôia ai man murdi sipaihei, nupanghei, naipanghei neh thâinuzelhei kha Gibeona rithokin an ṭhui kîr nôk riai tâk a.

¹⁷Babilon rêngin ram optu ranga ai siam Gedalia kha Ismaelan a that sikah khan Babilonhei chu an iṭi a nit. Khasikin, Babilonheia rithoka zôk rangin Aigupta tiang ipanin an fe tâk a, Bethlehem kôl Gerut Kimham ngam munah khan an ringam a.