Read Biete JEREMIA 42 Bible Online

JEREMIA 42 - Biete bible

JEREMIA 42

¹Korea naipa Johanana, Hosaia naipa Azaria banah sipai ruaituhei murdi neh mipui, â chîn taka rithoka â lian tak idênin an hong a,

²ki ziangah, “Kin ngênna hih ner ngai pêk inla, PUMAPA ei Pathian ziangah mi a la dam isunhei murdi ta ranga hin ne ṭongṭai pêk roh. Nî mu angkah hin zoro thlenga mi itam takkah lei inih ngai khah atûn chu iroichekah bang imarakin kin iom tâk a nit.

³PUMAPA ni Pathianin kin lampui rang hei, kin sin rang hei a nen riat theina rangin ne ṭongṭai pêk roh,” an ti a.

⁴Keiman ki sâm a, “A ṭhat, atûnah hin PUMAPA nin Pathian ziangah nin ngên lam takin nangni ṭongṭai pêk ki ti, PUMAPA khan nin zianga ai ti murdi chu nangni ril ki ti. Îte nangni thlip no ning e,” ki ti a.

⁵Anni khan ki ziangah, “PUMAPA ni Pathianin kin ta ranga thu nang a îril angkana kin tho non chu PUMAPA chu kin chunga thuretu dik neh iamom tak ni riseh.

⁶Ṭongṭai ranga nang kin tirna PUMAPA kin Pathian thu chu â sia â ṭha khom ni sela kin izôm rang a nit. PUMAPA, kin Pathian thu kin zôm maiin chu thil tinrêng kin ta rangin ai ṭhat rang a nit,” an ti a.

⁷Sûn sômka nungah PUMAPA thu ki ziangah a zuang tlung a.

⁸Khanchu, Korea naipa Johanana neh a zianga sipai ruaitu om murdihei banah mipui an rêngkan ki koi bûm a.

⁹An ziangah, “PUMAPA, Israelhei Pathian a zianga ṭongṭai ranga nin ne tirna khan hingkan a ti:

¹⁰‘Hi rama hin iom mai nin nuamin chu nangni siaminding ki ta, nangni chekindar no ning e. Nangni phun ki ta, nangni phâi suak no ning e. Nin chungah thil ṭha no ki îthlun sikah khan ke lung ai nat a nit.

¹¹Nin iṭi ngai Babilon rêng hih ṭi khâi no rei. Nin ziangah ki om a; a thuneina rithokin nangni sanisuang ki ti.

¹²Lung nangni inkham ki ta, ani khom nin chungah lungkhamna nei rangin siam ki ta; khanchu, nin ramah hin om mai nin ti. Keimah, PUMAPA hin kî ti a nit.’

¹³“Nikhomsela, nangmani Judai rama la om isunhei PUMAPA nin Pathian thu zôm loiin, ‘Hi ramah hin om khâi no min e, Aigupta ramah fêng ei ti; amakhan chu ridoi irîhei, bekul irîhei neh iṭâmhei reh loiin om ei ti,’ nin tin chu Tinrêngthothei PUMAPA, Israelhei Pathian khan hingkan ai ti a nit: ‘Aigupta rama fe nin tum ngitin chu

¹⁶khandai nin iṭi tak ngêi khan Aigupta ramah nangni môk phâk a ta, iṭâm nin iṭi tak tak khan nangni rizûl thal a ta, Aigupta ram ngêiah khan thîng nin ti.

¹⁷Aigupta rama fe ranga tum ngit mihei chu an rêngkan khandaihei, iṭâmhei, ripuihei ituangin an ithi rang a nit. Thil ṭha no an chunga ke ṭhum ranga rithokin an lâia khatka lua khom izôkin damsuak no nih.’

¹⁸“Tinrêngthothei PUMAPA, Israelhei Pathian khan hingkan a ti: ‘Ki ningthik neh ningmur ritêl Jerusalema mihei chunga ki îṭhum angkah khan Aigupta fehei chungah khom ki îṭhum rang a nit. En inkhôk takkan om nin ta; vânisalnahei, musitnahei, sîrinsiatnahei tuang nin ta, nin riming chu vâni sâmnan mang an ti. Hi ram hih mu nôk tlak khâi no tin u.’

¹⁹“Juda mi la dam isunhei o, Aigupta ramah fe loi rangin PUMAPA khan nangni a îril a nit. Khasikin, vuaninta ki thu nangni ril hih ringai poimo rei.

²⁰Ithipui rak rang sual ilian tak nin itho tâk a nit. PUMAPA ei Pathian zianga nangni ṭongṭai pêk rangin nin ne ngên a, ‘PUMAPA ei Pathian ziangah ne ṭongṭai pêk inla, kin sin ranga ai ti murdi chu itho rangin ṭong kin înkung a nit,’ nin ti a.

²¹Khanniseh, atûnah hin nin zianga ki înpuang PUMAPA ei Pathianin a ne îril kha nin izôm nôk ino a nit.

²²Khasikin, amahih reh rei; nin om nuamna ram ngêiah khan khandaihei, iṭâmhei, ripuihei ituangin nin ithi rang a nit,” ki ti a.