Read Biete JEREMIA 43 Bible Online

JEREMIA 43 - Biete bible

JEREMIA 43

¹PUMAPA an Pathianin mi tin zianga isîr ranga a ne tir lam angkah takin PUMAPA an Pathian thu chu mi murdi ke ril zoi tâk a.

²Khanchu, Hosaia naipa Azaria neh Korea naipa Johanana neh mi risonghei khan, “Milak nî tho a nit, PUMAPA ei Pathianin Aigupta ramah fe loi rangin neh amakhan om loi ranga ne ril rangin nang tir mak.

³Kaldai mihein ne mana an ne that theina rangin manih, Babilona bôia an ne ṭhui theina rangin manih Neria naipa Baruka khan nang a îthor a nit hih,” an ti a.

⁴Khanchu, Korea naipa Johanana hei, sipai ruaituhei neh mipuihei murdi khan Judai rama om mai ranga PUMAPA thupêk khah zôm khâi mak a.

⁵Korea naipa Johanana neh sipai ruaituhei murdi khan Juda mi a la dam isun, nam tin lâia an rithekindarna ata Judai rama om ranga hong ikîrhei chu an ṭhui a.

⁶Khahei khah ipa hei, nupang hei, naipang hei, rêng nainu hei an nit. Sipai ruaitu Nebuzaradanan Gedalia enkolna nuaia om ranga ai mâk mipuihei banah keimah neh Baruka itep san an ṭhui riai a.

⁷PUMAPA thupêk zôm loiin Aigupta ramah khan an lût a, Tapanhes khua dênin an fe a.

⁸Tapanhes khuaah khan PUMAPA thu ki ziangah a zuang tlung a,

⁹“Juda mihei mu chung ngêiah lung ilian pa pa lan la, Tapanhes muna Faroa in panna lam an isiam sîra idial rinâtah khan phûm roh.

¹⁰Khanungchu, an ziangah hingkan ti roh, Tinrêngthothei PUMAPA, Israelhei Pathianin hingka hin a ti: Ke som Babilon rêng Nebukadnezara chu hi munah hin hong ṭhui ki ta, hi lung nang ki înphûmhei chungah hin a rêngṭhungmun inṭhung a ta, a rêng puan-in khom zar a ti.

¹¹Nebukadnezara chu hong a ta, Aigupta ram hi a hong ilâk rang a nit. Ripuia thi ranga inkunghei chu ripuiin thîng an ta, bôia ṭhui ranga inkunghei chu bôia iṭhui nîng an ta, khandaia thi ranga inkunghei chu khandaiin thîng an ti.

¹²Aigupta mihei pathian biakna inhei chu hâl a ta, an pathianhei chu ai nuamkah hâl a ta, ai nuamkah chu chôi vang a ti. Berapun a zakua ata parik ai en infâi ngai angkan Aigupta ram chu Babilon rêngin phît infâi liai a ta, lung itluk riamkan kîr a ti.

¹³Aigupta rama Heliopolis khopuia[52] inî pathian an biakna lungphun rithianghei chu isehchit a ta, Aigupta pathianhei biak inhei chu hâl vang a ti,” a ti a.