Read Biete JEREMIA 46 Bible Online

JEREMIA 46 - Biete bible

JEREMIA 46

¹Nam danghei chungchânga ki zianga PUMAPA thu zuang itlung chu:

²Aigupta chungthu: Juda rêng Josia naipa Jehoiakima inlal kum ilina Babilon rêng Nebukadnezaran Eufratis vadung rikam Karkhemis[56] muna a înê tâk, Aigupta rêng Neko Faroa sipai lôm chungchâng thu chu:

³“Aigupta sipai ruaituhei chu an ikhêk a, Nin iphohei siam diam unla, Ridoi rangin matiang kalchôi rei.

⁴Nin sakorhei inrithluk unla, an chungah chuang rei. Thîr lukhum ikhumin inrân unla, Nin ifeihei itât inngaih unla, thîr zakua ihâk rei.

⁵Îtho tâk mani? An mihâihei an ilîr a, Rimot takkan lâizâm an tho zoi tâk a, Nungtiang ngat viat loiin an ibak ilêngin an itlân a; Ram tinah iṭi rilônthingnan a sip zoi tâk,” PUMAPA khan a ti.

⁶“Châng iranghei khom lâizâm tho phâk mak a, Mi râthei khom zôk thei ual mak. Mâr tiang Eufratis vadung pangah khan an ibâa an ilîr a.

⁷Nail vadung angkana hong ilian tâk hih tûm ai nit? Tuiilian vakuang zuang idîl zut zut angkana hi?

⁸Aigupta chu Nail vadung angkan a zuang lian a, Vadungpui tui zuang iluang zut zut angkah hin. Aigupta khan, ‘Rifôn zut zut ki ta, rammual rikhûng ki ti; Khopuihei neh a sunga mi omhei chu inrimang vang ki ti.

⁹Sakorhei o, mâtong rei, sakor tâlihei o, itlân rei. Nangni sipai ihâi, Ethiopia mihei, Put mi ipho chôituhei, Ludia rama rithokin thal ikâp thiamhei o, mâtong mai rei,’ a ti,” itin.

¹⁰Kha nikhua khah Tinrêngthothei PUMAPA, Pathian ta a nit: Vuanah hin phuba lâng a ta; Vuanah hin â râlhei kuttum ai tho rang a nit. A khandai khan anni chu a nuam dôrkah fâng a ta An thisen khom a khop dôrkan in a ti. Mâr tiang Eufratis vadung rikamah son, Vuanah hin Tinrêngthothei khan ribôlnan, Mi itam takkah ai lan tâk a nit.

¹¹O Aigupta nainu, nungâk rithiang, Gileadah fen la, Thingnâi damdôi hang la roh. Ni damdôi ritho murdi khan ni chungah sintho mak a, Damna nang ithlun pêk tlak no nih.

¹²Nam tinhein ni mualinphoina an riat a, Mi tinin ni ṭap irî an iriat a nit. Sipai khatkah neh sipai dang khah an risik a, An ruaikan nuaiah an ikûi tâk a.

¹³Babilon rêng Nebukadnezara kha Aigupta idoi ranga a hong lâiah khan PUMAPA khan ki zianga thu a îsîr chu:

¹⁴“Aigupta ram khopuiheiah inpuang inla, Migdolheiah, Nofheiah, Tapanhesheiah inpuang roh: ‘Intûng ṭian unla, rirung inṭha rei, Nin thil nei murdi ridoinaah isehchit ai nit rang a nit.

¹⁵Îtho sika nin pathian irât Apis [57] chu a îlîr tâk mani? Iding thei khâi mak, PUMAPA inam inlîr a nit,’ itin.

¹⁶Nin sipaihei chu an ibâa an ilîr zoi tâk a; Mi tinin mi dang ziangah, ‘Rimot roh, ei mihei ziangah ei ram tiang fêng ei ta, Irâlhei khandai ata hi lei zôk rei,’ an riti a.

¹⁷Aigupta rêng chu riming ithar sak inla, ‘Rêng risong, a zoron ṭum ichântu’ itin be roh.

¹⁸Keimah, PUMAPA Tinrêngthothei hih rêng ki nit a, Keimah hi Pathian iring chu ki nit. Itlânghei chunga Tabor tlâng ai chuanglûr angkan, Karmel tlâng chu tuipui rikamah a îding lûr angkan, Nang idoitu ritha neizia chu khangkah takah khan nîng a ti.

¹⁹Nangmani Aigupta mihei o, bôia tâng rangin risiam thlâm ta rei, Nof khua chu ram vang a ta, sehchit a ti. Â luatu rêng rêng om no nih.

²⁰Aigupta chu serla ṭha tak angkah a nit a, Khanniseh, mâr tiang ata rithlip hong ivuangin hong idôk a ti.

²¹An sipai manghei khom sialtete angkan îte an itho thei ino an nit. Sirsan ilan doi thei mak a, nungritolin lâizâm an tho riai a. An chung inkhôk nikhua a hong tlung tâk a, An siatchitna zoro a hong itlung tâk a nit.

²²Irâlhei an hong nâi thiai mai lâiah khan, Aiguptahei chu irûl angkan lâizâm an tho tâk. Thing iphûrtu angkan reipui neh an hong idoi a,

²³Rampui rivât iṭhiam tak angkah hin. An sipaihei chu tep zoi loi an nit a, Khâifapôl intâm nêkan an itam ual a nit.

²⁴Aigupta mihei chu an mualinphoi tâk, Mâr tiang mihei khan an înê tâk a nit. Keimah, PUMAPA hin kî ti tâk a nit.”

²⁵Tinrêngthothei PUMAPA, Israelhei Pathian khan hingka hin a ti: “Ringai rei, Thebes khua pathian Amona rualin Aigupta neh a pathianhei, an rênghei neh Faroa chunga ringattu murdihei chu kuttum kî tho rang a nit.

²⁶Anmani that itumtu Babilon rêng Nebukadnezara neh a sipai lômhei kutah pêng ki ti. Khanniseh, kha rizoi nungah khan chu Aigupta ramah, zoro thlenga an lei om ngai lam angkan om nôk an ti. Keimah, PUMAPA hin kî ti tâk a nit.

²⁷“Ki mihei, ṭi tlak no rei, O Israel mihei, indôp tlak no rei. Ram ilah tak ata nangni sanisuang ki ta, Bôia nin itângna rama rithokin nangni ṭhui suak ki ti. In tiang hong kîr nôk nin ta, thlangam tak neh izôkriamkan om nin ta; Tutên thlavâi nangni sak khâi no nih.

²⁸Nin ziangah zuang ki ta, nangni inzôk ki ti. Nangni ke chekindarna nam murdi chu that inrimang ki ta, Khanniseh, nangni chu nangni that inrimang no ning e. Kuttum chu nangni tho ngêt ki ta, Khanniseh, nangni ken tuang khomin, A zâi iomin nangni intuang ki ti. Keimah, PUMAPA hin kî ti tâk a nit,” itin.