Read Biete JEREMIA 48 Bible Online

JEREMIA 48 - Biete bible

JEREMIA 48

¹Moab chungchângah Tinrêngthothei PUMAPA khan hingka hin a ti: “Nebo mihei chung ân khôk e, an khopui chu a siat zoi tâk. Kiriathaim chu inê a nit tâk a, A kul roinpui chu a chim zoi tâk a; A mihei chu mualinphoiin an om tâk.

²Moab riming inthangna a boi tâk, Irâlhein Hesbon khua an lâk tâk a, Moab nam that inrimangna rang an rêl. Madmena khua chu inthim val tâng a ti; Â doiin sipai lômhei kal an ichôi rang a nit.

³Horonaim ata khêk irî, Siatna natinsat tak khêk irî chu ringai rei.

⁴Moab chu a siatchit tâk a; Naipanghei ṭap irî chu ringai ta u.

⁵Luhitah iṭap pumin an fe a, Horonaim lamsukah lungzîng ṭap irî iria a nit.

⁶‘Rimot unla, nin ringna inzôk rangin itlân ta rei, Ramchâr sakuartung angkan itlân rei,’ an ti a.

⁷Moab, ner tharât neh ner chonah ner ngat a, Atûn chu nangmah khom irûnin om ni ta; Ni pathian, Khemosa [59] chu a ruaituhei neh thiampuhei neh khan, Bôia tâng rangin iṭhui nîng an ti.

⁸Khopui tinah â sehtu rang hong tlung a ta, Khua khatkah khomin lôi tlak no nih. Mun richam neh phâizôl khom isehchit nîng a ti. Keimah, PUMAPA hin kî ti tâk a nit.

⁹Moab ta rang thlânlung inrifûk ta rei; Itôiteka nungah chu isehchit ni tâng a ti. A khopuihei chu inram nîng a ta, Tute om khâi no nih,” itin.

¹⁰(Lungril murdia PUMAPA sin tho no chu vânisalin om riseh. Thisen isuana ranga a khandai vai nuam ino chu vânisalin om riseh.)

¹¹PUMAPA khan, “Moab chu a thuarbap lâi ata ihoi takka omin, bôiah khom lei hong itâng ngai mak a. Moab chu bêl tina sung inrilût diai ino uain, inchâng loia om ṭian angkah hi a nit. A thlum dân khom a ngaingir mai a, â nam hoina [60] khom boi tlak mak a.

¹²“Khasikin, uain angkana Moab chu â thâl suaktu ki tir rang zoro chu a hong itlung tâk a nit. A bêl ata thâl suak an ta, a bêl chu inrong an ta, ito khoi chit an ti.

¹³Israelhein an ringatna tak Bethel an îzakpui angkah khan Moab mihei khomin an ringatna pathian Khemosa chu izakpui tâng an ti.

¹⁴“Moab mihei o, ingkan im pasalṭha, Ridoina muna sipai ihâi nin irti thei hi?

¹⁵Moab neh a khopuihei chu isehchit a nit tâk a, An tlangvâl iṭhahei khom ithat an nit zoi tâk. Keimah hi rêng ki nit a, PUMAPA Tinrêngthothei ki nit, Keiman kî ti tâk a nit.

¹⁶Moab siatchitna rang chu a hong tlung thiai tâk a, A ram vangna rang kha a hong nâi teng tâk.

¹⁷A kôlvêla om murdihein ani chu ṭâ riseh, Arming inthangzia â retu murdihei khan, ‘Ingkan im, irol ikhir neh iṭha chu a kiak a, A roinpuina neh a râtna chu a boi tâk tlia o,’ ti riseh.

¹⁸O nangmani, Dibon mihei, Nin kho roinpui tak ata zuang suak unla, Rinêng ipil kârah hin iṭhung rei. Moab inrimangtu chu hin a om tâk a, A kulpuihei khom a hong siatchit tâk.

¹⁹Aroera omhei o, lamsîrheiah iding unla, ngâk ṭian rei; Lâizâm ithohei khah lei isôn unla, An zianga rithokin im thil â tlung ridon suak rei.

²⁰‘Moab chu â lîr tâk, ngaisiatin ṭap rei; Mualphoina lian tak a nit. Arnon vadung thluanin, Moab ilîr tâk thu chu inpuang rei,’ itin nangni sâm an ti.

²¹“Tlângsîp chung richama khopui, Holon hei, Jahza hei, Mefaat hei,

²²Dibon hei, Nebo hei, Beth Diblathaim hei,

²³Kiriathaim hei, Beth-Gamul hei, Beth-Meon hei,

²⁴Keriot hei, Bozra hei, Moab rama khua murdihei, ram ikil taka omhei idênin an chungah roirêlna a zuang tlung tâk.

²⁵Moab riki chu tan inbûl a nit a, â bân khom ikhiak a nit tâk. Keimah, PUMAPA hin kî ti tâk a nit.”

²⁶PUMAPA khan, “Moab chu inruiin siam roh, ki chungah arhel tâk a. Moab chu â luak ngirah khan itâl a ta, mi nuizabûrin om a ti.

²⁷Moab, Israelhei ni nuiso ngai dân kha nî riat khâi ino mani? Inru lâia ṭang im an init, an thurchi ne sîr ikipah nî phengsan ngai hi?

²⁸“Nangmani, Moaba omhei o, nin khopuihei mah ta rei. Fe unla, lungpui kârheiah om ta rei. Ikhoi inrâna ribu nei ngai vaṭhu angkan om rei.

²⁹Moab chu ripâk titak a nit. An ripâkzia hei, an risongzia hei, an thilinthalzia hei, ṭha an ritizia hei, inchung oka an ribezia hei murdi kî riat a nit.

³⁰Keimah, PUMAPA hin an ripâkzia kî riat riai a nit. An risongnahei chu chanlamboi a nit a, an thil tho khah thluantlung no nih.

³¹Khasikah khan Moaba om murdihei ta rangin ki ṭap a, Kir Heres mihei ta rangin mitrithli sôm ki ti.

³²Jazer kho mihei ta rang nêka natinsat ualin Sibmah kho mihei ta rangin ṭap ki ti. O Sibmah khopui, nang chu grep kung, â ṭanghei Tuipui Ithi khêl Jazer idêna rizâm angkah ni nit. Khanniseh, atûn chu ni fûr theihei neh grephei chu isehchitin an om tâk a.

³³Moab ram iṭha taka rithokin lômna neh râifânna chu a boi zoi tâk. Grep sômna khurhei ata uain iluang ken ringam tâk a; tutên râiifân takkan grep sôm khâi no nih. An ikhêk irî khom râifân khêk irî ni khâi mak.

³⁴“Hesbon neh Eleale mihei khêk rihu chu Jahaz tenan khom iria a nit; Zoar mihei khomin an lei riat a, Horonaim neh Eglath-Selisia idên khomin an lei iriat a nit. Nimrim vadunghei tena khom a kang zoi tâk a.

³⁵Moab mihei chu an bôlkuangheia hâlrivâm thillan neh an pathianhei zianga ribôlna an ilanhei chu ki înringam rang a nit. Keimah, PUMAPA hin kî ti tâk a nit.

³⁶“Lusûnhei ta ranga theile tum irî angkan Moab sikin ki bei a dong a, Kir Heres mihei ta rangin ki ngûi zoi tâk. An richon nei murdi an îchân zoi tâk a nit.

³⁷An rêngkan an lu an mêt inkol a, an rikhamulhei an voi infâi zoi tâk. An kuthei an ât a, mi tinin borapuan an sil tâk a.

³⁸Moabhei inchung richam murdiah neh a tolâiheiah khan an ṭap ngûi ngûi a; bêl isia angkan Moab chu ke khoi zoi tâk a.

³⁹Moab chu a siatchit tâk na! Ṭap ngûi ngûi rei. Moab chu a mualinphoi tâk a. A ram zoi tâk a, a kôlvêla nam tinin an inuiso tâk a nit. Keimah, PUMAPA hin kî ti tâk a nit,” a ti.

⁴⁰PUMAPA khan ṭong ân kung a, mupui angkan nam khatkah hong vuang a ta, Moab chu a zuk îbô rang a nit.

⁴¹Khopuihei neh kulpuihei chu ilah vang nîng an ti. Kha nikhuaah khan chu Moab sipaihei chu nupang naiha isê rithlavâi angkah takah hin om an ti.

⁴²Moab chu ki chungah arhel sikah khan isehchitin om a ta, nama tep inrup khom ni khâi no nih.

⁴³Thil inrît hei, dîp hei, châng hei khan Moab mihei chu a lei îruang ṭian a nit. PUMAPA khan ai ti tâk a nit.

⁴⁴Thil inrît ata lâizâm ithotuhei kha dîpah ṭul an ta, dîp ata suak nôk chu chângah iôk an ti. PUMAPA khan Moab siatchit rang zoro chu a îthlun rang a nit.

⁴⁵Hesbonah khan irâl iṭia lâizâm ithohei khan ribîkna an zong a. Khanniseh, Hesbona rithokin mei a hong suak a, rêng Sihona ina rithokin meipui a suak a, Moab mihei ibaksam a kâng a, risual inuam mihei lusîp samhei chu ai kâng a nit.

⁴⁶Moab mihei chu lungkham an om vang na! Khemosa chubai iûn ngaihei chu an rimang zoi tâk a, an nainuhei an naipahei chu bôia ṭhuiin an om zoi tâk.

⁴⁷Khanniseh, zoro nungkhônah chu PUMAPA khan Moab dingmun chu siaminṭha nôk a ti. Hihei murdi hih PUMAPA khan Moab chunga tlung ranga ai ti chu a nit.