Read Biete JEREMIA 49 Bible Online

JEREMIA 49 - Biete bible

JEREMIA 49

¹PUMAPA khan Amon mihei chungchâng thu hingka hin a ti: “Israel mihei taktiang im an iom tâk? An ram inzôk rangin tute an iom khâi ino mani? Îtho sik im Gada namhei ram chu Milkoma [61] chubai iûn ngaihei khan an ilâkin an inlua tâk hi?

²Khanniseh, nikhua a hong itlung thiai tâk a nit; kha tikin chu ridoi irî inriang ki ta, Amon mihei khopui Raba an rûn irî khah. Kha khua khah inram chitin om a ta, a kôlvêl khuahei khom ihâl vang nîng a ti. Khanchu, Israelhei khan anmani ûmisuatuheia rithokin an ram chu la kîr nôk an ti.

³Hesbon mihei o, ikhêk suak rei. Ai khua chu a siatchit tâk. Raba nupanghei o, sûn ta rei. Borapuan sil unla, ṭâ ta rei. Lungidongin rikul sungah khan rilong diai rei. Nin pathian Milkoma chu a thiampuhei neh a ruaituhei neh bôia tâng rangin an iṭhui rang a nit.

⁴Nai iamom inohei o, îtho ranga nin irpâk mani? Nin ritha â ṭuai zoi a nit tâk. Îtho rang sika nin neina song a, ‘Tutên ne doi ngam no nih,’ nin iti mani?

⁵Kil tina rithokin nin chungah thil inrît ki hong îthlun rang a nit. Nin rêngkan lâizâm tho vang nin ti. Mi tin mahni ringna inzôk rangin itlân an ta, tutên â tlân indarhei khah koibûm nôk khâi no nih.

⁶“Kha rizoiin chu Amon mihei dingmun chu siaminṭha nôk ki ti. Keimah, PUMAPA hin kî ti tâk a nit.”

⁷Tinrêngthothei PUMAPA khan Edom chungchâng thu hingka hin a ti: “Edom mihei thil sût thiamna kha an îchân tâk mani? An lâiah roisak ithiam an iom khâi ino mani? An vârna kha ai boi zoi tâk mani?

⁸Dedan mihei o, kîr unla, lâizâm tho ta rei. ṭênkhuruk kârah ribih rei. Esauva richihei chungah siatna ki îthlun rang a nit, anmani kuttum ki tho rang zoro a tlung tâk.

⁹Grep irâ rimaltuhei khan â râ ichînkah chu an la zua ngai a. Zânah inruhei khomin an inuamkah bang an ilâk ngai ni mak im a?

¹⁰Khanniseh, Esauva richihei chu an inei murdi khêng vang ki ta, an ribîkna mun chu inlang riai ki ta; khanchu, ribîkna rang nei khâi no nia, an naihei, an suapuihei, an bungtualbômhei, an rêngkan rimang riai an ta, khatka lua zua no ning e.

¹¹Nin lâia naifara omhei chu ki ziangah mah unla, anni chu keiman enkol ki ti. Nin numeihei khom keimaah hin ringat riseh.

¹²“Kuttum ituang ranga rinangna nei inohei khomin kilât khah an in inteh, nangmani vâng hiteh kuttum tuang loia zôk rangin nin irbe mani? Lôi tlak no tin u, kilâta rithokin nin iin ngêt rang a nit.

¹³Keimah ngêiin ṭong ki irkhâm a nit, Bozra khopui chu iṭiom neh ramchâr chang a ta, mihein nuiso an ta, arming chu vânisâmnan mang an ti. A kôlvêla khuahei khom ram mai tâng an ti. Keimah, PUMAPA hin kî ti tâk a nit.”

¹⁴Khante, keiman, “Edom, PUMAPA zianga rithokin thucha kî dong a nit. Nam tin tinhei chu an sipaihei ibûma nang idoi ranga ril rangin palâi ai tir a nit.

¹⁵PUMAPA khan namhei lâia â chîn tak, mihei lâia musit iom takin nang siam a ti.

¹⁶Ner pâkna hin nang ai lêm a nit. Nang an iṭi inia ni be dôrkah khah tutên nang ṭi mak. Itlângsîp risâng tak, lungpui ikak kâra om ngai ni nit a; khanniseh, mupui angkan risâng takah ribu kâi man inla, PUMAPA khan nang kâi isim a ti. PUMAPA thusuak a nit,” ki ti a.

¹⁷PUMAPA khan, “Edom chunga siatripna zuang itlung inrît rang tlia chu mi â thleng rilôihei murdîn ilâirak an ta, a siat natinsat tak tak sikin an idang ichek vong vong an ti.

¹⁸Sodom neh Gomora neh a kôlvêla khuahei isehchit ai nit angkah khan Edom chungah khom tlung a ti. A sungah tute zel om khâi no nih. Keimah, PUMAPA hin kî ti tâk a nit.

¹⁹Rampui ata sakeibakneiin Jordan dung hong izuia sûl ringna muala bera lêng a hong iṭhông thut ngai angkan hong ki ta, voikazelin Edom mihei chu an ram ata ûm rizûl ki ti. Khanchu, an chunga thuneitu rang kî nuam nuam siang ki ta, an chungah khan roirêl a ti. Keima angkana hi tûm â om? Tûm ne doi ngam rang a? Ner khalpui ngam berapu tu ngân im â om?

²⁰Khasikin, Edom mihei chunga ki thiltum neh Teman kho mihei chunga itho ranga ki înrifûk hih ringai rei. An naihei tena khom ikâinâl nîng an ta, mi tin rilônthingin om an ti.

²¹An ilîr irî-ah khan rinêng inîng a ta, an ṭap irî khom Tuipui Sen idênin riang an ti.

²²En ta u, Bozra chu irâlhei khan mupui angkan an îbô rang a nit. Kha nikhuaah khan chu Edom sipaihei chu nupang naiha isê rithlavâi angka hin om an ti,” a ti a.

²³PUMAPA khan Damaska chungchângah hingka hin a ti: “Hamath neh Arpad kho mihei chu thurchi ṭhano an lei riat sikin an ilung a kâng a, an buai tâk a. Lungkângna chu tuipui angkan an chungah arsok a, an iom ṭian thei khâi ino a nit.

²⁴Damaska mipuihei chu an rizal a, iṭin lâizâm an tho tâk. Lungzîngnan a del rikhû a, nupang naiha isê angkan an iom tâk a nit.

²⁵Khopui riming inthang, nen lômtu khah a siat zoi tâk.

²⁶Kha nikhuaah khan chu a tlangvâlhei kha khopui kotsuaheiah ithatin om an ta, a sipaihei khom rimang riai an ti.

²⁷Damaska kulbanghei hâl ki ta, an rêng Benhadada inhei khom kâng vang a ti. Keimah, Tinrêngthotheia PUMAPA hin kî ti tâk a nit,” itin.

²⁸Kedar nam neh Hazor ram, Babilon rêng Nebukadnezaran ai lâkhei chungchângah PUMAPA khan hingka hin a ti: “Thoi inla, Kedar mihei chu rûn inla, khosak tianga mihei inrimang riai roh.

²⁹An puan inhei, an berahei, an puan in puanzârhei neh puan in sunga thil iomhei lah pêk riai roh. An saringseihei ilah pêkin mipuihei ziangah, ‘Nin rikhîl kan iṭirua ai om a nit,’ itin iril roh.

³⁰“Hazor mihei o, itlân suak unla, ipûkheiah ribih ṭian rei. Keimah, PUMAPA hin nangni ki îril a nit. Babilon rêng Nebukadnezaran nangni a phiarrûk a, hingkan ai ti a nit,

³¹‘Tho hong rei, lungrinîk riam neh izôkriamka om ngai, kul dâikot khârhei neh â kalna khom nei ino, ningibei riamka om ngai namhei chu la va doi rei u,’ itin.

³²“An saringseihei neh an ranhei chu lah pêk vang rei. An sam ep intôi ngai mihei chu kil tinah ithekindar ki ta, kil tina rithokin an chungah vânduaina iṭhum pêk ki ti.

³³Hazor chu kumkhuakan ramchâr chang tâng a ta, sihalhei lêngna mun chang tâng a ti. A sungah tute zel om khâi no nih. Keimah, PUMAPA hin kî ti tâk a nit.”

³⁴Judai ramah Zedekia rêng a chang phuta Elam ram chungchânga PUMAPA thu, ki ziangah a zuang tlung a.

³⁵Tinrêngthothei PUMAPA khan, “Elam thalngul, a râtna ritharui chu ki îkhiak rang a nit.

³⁶Kôlkil tina rithokin Elam chu phâivosimpui insêm ki ta, kil tinah chekindar ki ti. Elam mi ki îchekindarhei chu an ivâi nona ram zel om no nih.

³⁷An irâl, anmani that itumtuhei maah khan Elam mihei chu indôpin siam ki ta; ki ningthik natinsat takin an chungah thil ṭha no tak ki îthlun rang a nit. Ken rimang phar mâkah chu khandai inrizûl mai ki ti.

³⁸An rênghei neh ruaituhei that inrimang ki ta, Elamah khan ki rêngṭhungmun inṭhung ki ti.

³⁹Khanniseh, zoro nungkhônah chu Elam chu inding nôk ki ta, siaminṭha nôk ki ti. Keimah, PUMAPA hin kî ti tâk a nit,” a ti a.