Read Biete JEREMIA 5 Bible Online

JEREMIA 5 - Biete bible

JEREMIA 5

¹Jerusalem mihei, kotsua tinah itlân vêl unla, Thlîr vêl unla, nangmani ngêiin en rei; A tolâi murdiheiah khom zong unla, Mi khatka lua thil dik tak isin a, Pathian ta ranga iamom itum khatka lua nin mun chu, PUMAPA khan Jerusalem hih ngaidam a ti.

²PUMAPA chubai iûnin ribe ngai khom unla, Lungril taka chubai nin iûn ni mak.

³Adik takkan PUMAPA khan iamomna kha ai zong a nit. Nangni a hêm a, khan îten be mak chei a; Nangni a chîlpol a, khan â sôina zôm nuam mak chei. Tuklul ilian nin nit a, nin sualhei ata rilet nuam mak chei.

⁴Khanchu, keiman, “Hi mihei hih inmôl neh inriang tak an nit. PUMAPA lampui khom reh mak a; An Pathian roisakpêk khom an iriat ino a nit, PUMAPA khan im itho ranga ai nuam khom reh mak e.

⁵Milianhei ziangah fêng ki ta, anni chu va ṭongpui ki ti. Anmani khan chu PUMAPA dân neh, An Pathian roisak kha an riat ngêt khate,” ki ti a. Khannisela, an rêngkan PUMAPA thuneina an nôl a, A thu zôm an inuam ino a nit.

⁶Khasikin, rampuia sakeibakneiin anni chu sê that a ta, Ramchâr iniahein anni chu sânphor neng an ti. Keiârsihei an khosungheiah rilong diai an ta, Tual isuak murdi lei sânphor an ti. An sualhei chu a natinsat rai tâk a, A zoro kipah Pathian nung an isong ngai a nit.

⁷PUMAPA khan, “Îtho rangin im ki mihei sualna chu ki izâ rang? An ne heng a, pathian dik ni viat inohei chubai an ûn tâk a. Fâknêk ikhop takka ken fâk khomin inrê an song a, Nochizuar inheiah an lêng suai suai a.

⁸Sakorchal vâiinthâi rizukna sip angkan, Mahni bungtualbôm nupui an rizuk ngai a.

⁹Hi thilhei sikah hin anni chu kuttum kî tho no rang mani? Hingkana nam chungah hin phuba kî lâk ino rang im ai nit?

¹⁰Ki mihei grep rikul rivât pêk chit rangin irâlhei tir ki ta, Khannisela, a rêngkan chu iseh vang no nih. Â ṭanghei chu isât pai rangin iril ki ti, Kha â ṭanghei kha chu ki ta ni mak e.

¹¹Israel neh Juda mihei kha ki chungah an iiamom ino titak a nit. Keimah, PUMAPA hin kî ti a nit,” a ti a.

¹²PUMAPA mihein ani chu an nôl a, “Îte tho tak tak no nih.[9] Intak zoro khom sik no min a; ridoi manih, iṭâm manih khom tong no min e,” an ti a.

¹³“Zânthlahei khom PUMAPA zianga rithoka thucha nei ino, thurchi lutna boi isapsua ngai an nit,” an ti a. PUMAPA, Tinrêngthothei Pathian khan ki ziangah, “Jeremia, hi mihei hin hingkan an ti sikin ni bâiah khan ki thuhei mei angkan siam ki ti. Mipuihei hi thing angkan nîng an ta, mei khan kâng rivâm riai a ti,” a ti a.

¹⁵Israel mihei o, nangmani doi rangin ram ilah taka rithokin nam khatkah PUMAPA khan a hong iṭhui rang a nit. Tianlâi ata nam rilun irât tak, an ṭong khom nin iriat ngai ino, an thu sîr khom nin iriat thiam inohei chu.

¹⁶An thal bômhei chu thlân ri-ong a nit a, an thal kâptuhei chu mi rât neh mi hâi an nit.

¹⁷Nin chimuhei neh nin buhei fah vang an ta; nin nainuhei neh nin naipahei chu that an ti. Nin berahei neh nin serât lomhei that an ta, nin grep kunghei neh theipui kunghei iseh vang an ti. Nin ringatna, kulpui inei khopuihei chu irâlhei khan isehchit an ti.

¹⁸PUMAPA khan, “Kha nikhuaheiah khan ki mihei chu nangni inrimang riai no ning a.

¹⁹Jeremi, ‘Îtho sika hihei hih ki thôm ai nit,’ iti nang an ridonin chu hingkan sâm roh. ‘Keimah, PUMAPA hih nung an ne song a, an ram ngêiah ram dang pathianhei sin an tho a; khasikin, an ram nino ngêiah khan ram dang mihei sin an itho rang a nit,’ itin anni chu iril roh,” a ti a.

²⁰PUMAPA khan hingkan a ti, “Jakoba richihei chu iril unla, Juda mipuihei chu iril rei.

²¹Nangmani mi intlo, riatthiamna nei inohei, amahih lei ringai rei; mithei inei ṭianka mu thei inoa, ikuarhei inei ṭianka a reh thei ino hei.

²²Nin ne iṭi no rang mani? Keimah hi PUMAPA chu ki nit hih; ki makungah hin nin înthing ino rang im ai nit? Tuipui chîm phâk ten indangna rangin ṭiaiphoi ki siam a, ai khêl thei tlak ino rang ramrî det ki khang pêk a. Tuipui risok khan khêl thei no nia; tui rifôn dur dur khom seh vakuang khah ilêt thei tlak no nih.

²³Khanniseh, nangmani mipui hi tuklul ilian, rihel irât nin nit; kal nin phêt a, nin ipêt rimang tâk a nit.

²⁴A zoro takah rua nangni ki pêk a, rua masa neh rua nungkhôn nangni ken sûr pêk a, bubâl ritik bûm zoro nangni ki pêk ngai khomin nê chôiinrisâng rangin ngaitua tlak ngai mak chei.

²⁵Khasikin, hi nin thil ṭhano thohei sikah hin hi thilhei hih a boi zoi a, nin sualna sikin thil iṭha nin îchân zoi tâk a nit.

²⁶“Ki mihei lâiah mi sual an om; chângidotuhei angkan mihei an ridîp ṭian a, an châng kamah mihei an in-ôk ngai.

²⁷Ivaa sip kok angkan an inhei khom inru thilin an însip a nit. Khasik taka khan kêng an hong richong a, thuneina an inei a nit.

²⁸An hong thâi a, an hong rimût khap a, inruptôk zel nei loiin thil ṭhano an sin a. Farahei dongtum an irên pêk a, inrianghei khom rirêlna dik inmu ngai mak e.

²⁹“Keimah, PUMAPA hin, hi thilhei sikah hin anni chu intuang ki ta, hi nam chungah hin phuba kî lak rang a nit.

³⁰Hi ramah hin thil inrît neh pangzat iomhei a tlung tâk a.

³¹Zânthlahei khan milakin thu an ril a; thiampuhei chu zânthlahei thupêkin roi an rêl a, khangkana khah ki mihei lôm lam tak a nit. Nikhua nungkhônah khan ingkan im an iom rang tâk?” a ti.