Read Biete JEREMIA 50 Bible Online

JEREMIA 50 - Biete bible

JEREMIA 50

¹Babilon khopui neh a mihei chungchânga PUMAPA thu, ki zianga zuang itlung chu hihei hih a nit:

²“Namhei ziangah thurchi ril unla, inpuang rei, Ritlek târ unla, inpuang rei, îte ip no rei. ‘Babilon chu â lîr tâk a, A pathian Marduka chu arzal neng a, Babilon mirmil Bela chu a mualinphoi a, 2 A pathian rilim porinchehei chu a siat zoi tâk,’ itin.

³“Babilon idoi rangin mâr tiang nam khatkah a hong tâk a, a ram chu a hong îsiatchit rang a nit. Miriam neh ramsahei lâizâm tho riai an ta, tute amakhan om khâi no nih.”

⁴PUMAPA khan, “Kha nikhua khah a hong tlungin chu Israel mihei neh Juda mihei chu iṭap pumin hong an ta, an Pathian ne hong zong an ti.

⁵Zion panna lampui ridon an ta, kha tiang pan an ti. Keimah neh kumtluang thuthlung siam an ta, ikhiak tlak khâi no nih.

⁶“Ki mihei chu bera rimang angkah an nit, anmani enkoltuhein an ṭhui inrimang a, itlângheiah an ivâi a, mual tin tlâng tinah ivâiin an in khom an iriat khâi ino a nit.

⁷Â mu murdîn anni chu an doi a; an irâlhei khan, ‘PUMAPA chungah thil an thonsual a, eimani hin îte thonsual mang me. An chibulhei khan PUMAPA chungah an ringat ngit a, anmani khom hin iamom takkan an om rang kêng ai nit,’ an ti a.

⁸“Israel mihei o, Babilon khua ata ro ta rei. Kaldai ram chu mah ta rei. A lôm lâia kêlchal angkan ma iruai rei.

⁹Ringai rei, Babilon zuang idoi rangin mâr tiang ata nam irâthei chu ithor ki ta, Babilon chu doi an ti. Kha mihei khan Babilon idoi rangin inrân an ta, an zuang irûn rang a nit. Râl idoi ithiam tak an nit a, an thalkâphei khan an itin loi tlak ngai mak.

¹⁰Khanchu, Babilonhei kha irok an ta, â roktuhei khan an inuam murdi lâng an ti. Keimah, PUMAPA hin kî ti tâk a nit,” a ti a.

¹¹PUMAPA khan, “Babilon mihei, ki nam rithlang irûntu, ni râi a fânin ni lôm tak tak a, serâtrila loisûl rinoi muna lêng [62] angkan neh sakor irâm ngur ngur angkah hi ni nit a.

¹²Khanniseh, nin khopui roinpui ngêi khah mualinphoiin neh mâimôkin om a ti. Babilon ram chu nam lâia â chîn tak nîng a ta; ramchâr iṭôl chang a ti.

¹³Ki ningthikna sikin Babilon khuaah tute om khâi no ni a; ram vang a ta, â thleng rilôi murdîn rikhêl tîng an ta, an idang ichek vong vong an ti.

¹⁴“Thalkâp mi murdihei o, Babilon idoi rangin inrân unla, hual rei. Keimah, PUMAPA chungah an isual tâk sikin nin thalhein Babilon chu kâp unla, rep viat no rei.

¹⁵Khopui ihualin ridoina huaizâm isam rei. Babilon chu arpêk tâk a. A kulbanghei chu a kak a, a chim tâk. Babilonhei chungah phuba kî lâk tâk a nit. Khaangkan nangni khomin nin phuba chu la unla, mi danghei a tho ngai lam takkan a chungah khom tho rei.

¹⁶Kha ramah khan chi inchôi no unla, bu khom in-ât no rei. Kha muna ram dang mi om murdihei khan a hong idoitu sipai lôm kha ṭîng an ta, mahni ram tiang chit kîr nôk an ti,” a ti a.

¹⁷PUMAPA khan, “Israel mihei chu bera lôm, sakeibaknei irzûl a, a îchekindar angkah hi an nit. A phut takah Asuria rêngin a fâk a, khanung Babilon rêng Nebukadnezaran an ru â rêt nôk a.

¹⁸Hi sikah hin keimah, Tinrêngthothei PUMAPA, Israelhei Pathian hin Asuria ram kuttum ki tho lam angkan Babilon rêng Nebukadnezara neh a ram chu kuttum kî tho rang a nit a.

¹⁹Israel mihei chu an ram ngêiah ṭhui nôk ki ta, Karmel tlâng neh Basan rama fâk ivânghei chu fâng an ta, Efraim neh Gilead ramhuala fâknêk ivânghei chu an inuam nuam fâng an ti.

²⁰Kha zoro khah a hong tlungin chu Israel ramah pualoina imu ni khâi no ni a; Judai ramah khom imu ni khâi no nih. Ki mi zua, a la dam isunhei chu kî ngaidam rang tâk a nit. Keimah, PUMAPA hin kî ti tâk a nit,” a ti a.

²¹PUMAPA khan, “Merethaim ram neh Pekod [63] mihei chu doi rei. That unla, inrimang vang rei. Thu nangni ki pêk lam angkah takin tho rei. Keimah, PUMAPA hin kî ti tâk a nit.

²²Kha ramah khan ridoi rihu iria a nit a, siatchitna rikhêl tak ai om a nit.

²³Babilon ram khan rammual pumpui chu chungchôiin a suk inrinôi chit a, atûn chu kha chungchôi khah a kiak tâk. Babilon ram chunga thil itlung khah nam tinin rikhêl an iti a nit.

²⁴O Babilon, ni ne doi sikin ne ôkna rang châng ki kam a, amakhan ni î-ôk tâk a nit hih. Khan laka reh viat mak che a.

²⁵Ki râlthluk siana mun chu ke ong a, ki ningthikin râlthlukhei ki lâk suak tâk a. Keimah, Tinrêngthothei PUMAPA ngêi hin Babilon ram sungah sin itho rang kî nei a nit.

²⁶Kil tina rithokin doi unla, a fasiarhei chu iong rei. Râllâk thilhei chu bupông angkan inpông unla; ram chu isehchit unla, îte zel zua no rei.

²⁷A sipaihei chu that vang unla, richan nôi rei. Babilon ram mihei chung chu ân khôk e! Anmani kuttum ki tho rang zoro chu a hong itlung tâk a nit.”

²⁸Babilon rama rithoka hong izôka Jerusalema honghei khan Tempil isehtu Babilonhei chunga PUMAPA ei Pathianin phuba a lâk tâk thu Zionah khan an inpuang tâk a.

²⁹“Babilon idoi rangin iril unla, phel neh thal imang thei murdi tir suak rei. Khopui kha hual khap unla, tute inzôk no rei. A thil lei tho lam angkah takin thung unla, mihei chunga a tho ngai lam angkah takin tho rei. Keimah, PUMAPA, Israel Mi Rithianga chungah hin risong takkan ai châng a nit.

³⁰Khasikin, an tlangvâlhei chu khopui kotsuaheiah ilîr an ta, an sipaihei khom kha nikhuaah khan chu ithat inrimang vang nîng an ti. Keimah, PUMAPA hin kî ti tâk a nit.

³¹“Babilon ram, ripâkna sip ni nit; kha sik takah khan Keimah, PUMAPA Tinrêngthothei, Pathian hin nang kî doi a nit. Kuttum nang ki tho rang zoro a hong itlung tâk a nit hih.

³²Nam ripâk tak chu pêm a ta, ilîr a ta, tutên kâiithoi no nih. Ni khopui chu hâl ki ta, a kôlvêla om murdi kâng riai a ti,” a ti a.

³³Tinrêngthothei PUMAPA khan, “Israel mihei neh Juda mihei chu isirden an om a, â mantuhein an itûk khap a, isua nuam mak a.

³⁴Khanniseh, anmani ritlantu chu mi rât tak a nit a, arming chu Tinrêngthothei PUMAPA a nit. Ani khan thlop ngit a ta, rinêngah ringeina inlêng a ta, Babilon mihei chungah khan chu buaina ithlun a ti,” ai ti a nit.

³⁵PUMAPA khan, “Kaldai mihei chungah khandai a lêng e, Babilon mihei, an ruaituhei, an mi vârhei chungah ringat chak a nit.

³⁶A zânthla derhei chungah khandai a lêng e, An lei intlôk vang na! A sipaihei chungah khandai a lêng e, An rilo ân thing vang na!

³⁷A sakorhei neh tâlihei chungah khom khandai a lêng e, Nam dang sipai an îruaihei khom, An rizal vang tâk na! An richonhei chu isehchit unla, Irok unla, râllâk thilin la vang rei.

³⁸A ram chungah khua kang sela, A vadunghei châr vang riseh. Babilon ram chu mirmil inrît tamna a nit a, Khahei khan mihei invêtin an isiam a nit.

³⁹“Khasikin, Babilonah khan sangarhei neh iniahei [64] bang om an ta, varingseihei khom om an ti. Amakhan tute om khâi no nia, tute zelin lua tlak khâi no nih.

⁴⁰Sodom hei, Gomora hei neh a kôlvêl khuahei ki înram angkah takah khan thil ai tlung nôk rang a nit. Amakhan tute om khâi no nia, tutên lua tlak khâi no nih. Keimah, PUMAPA hin kî ti tâk a nit.

⁴¹“Mâr tiang rama rithokin mi an zuang, Nam irât tak neh rêng itam takkah, Kôlkil ata ridoi ranga hong rithokhei chu.

⁴²An thalhei neh khandaihei an chôi a; Nuniter neh lungkhamna nei ino an nit. An irî chu tuipui rifôn irî vung vung angkah a nit a, An sakor chungah an hong chuang. Mihei chu risiam diamkan an hong, O Babilon mihei, nangni an idoi rang a nit.

⁴³Babilon rêngin an thurchi a lei riat a, A kuthei chu arzal zoi tâk. Nupang naiha isê angkan lungzîngna neh natnan â bô tâk.

⁴⁴“Rampui ata sakeibaknei ihong a, Jordan dung hong irûl a, loisûl ringna mual tlânga bera lôm ilêng hong iṭhông thut angkan Keimah, PUMAPA hong ki ta, voikazelin Babilonhei chu an khopui ata ûmrizûl ki ta; khanchu, an chunga thuneitu rang kî nuam nuam phun ki ti. Keima angkana hi tûm â om? Tûm a ne doi ngam rang? Ner khalpui ngam berapu tûm â om rang a?

⁴⁵Khasikin, Babilon khopui chunga ki thiltum neh Kaldai mihei chunga itho ranga kî tum hih ringai rei. An naihei chu ikâinâl nîng an ta, mi tin rilo inthing tak tak a ti.

⁴⁶Babilon â lîr tikin chu irî natinsat tak khan rinêng pumpui inîng a ta, an ṭap khêk irî chu nam danghei khan riang an ti,” a ti a.