Read Biete JEREMIA 51 Bible Online

JEREMIA 51 - Biete bible

JEREMIA 51

¹PUMAPA khan hingka hin a ti: “Babilon rama mihei idoiin ithlisia[65] ki hong înrâng rang a nit.

²Anmani sêm infâi a, an ram a khoronga siam rang nam danghei Babilon ramah khan kî tir rang a nit. Kha nikhuaah khan chu siatrimangna khan kil tina rithokin doi a ta, ram pumpui chu a khorongin mâng an ti.

³A sipaihei kha an thalhei kâp phâk loiin neh an thîr zakua khom ihâk phâk loiin om riseh. Tlangvâlhei chu zua no unla, sipaihei khom that vang rei.

⁴An ram ngêiah iphopin om an ta, an khopui kotsuaheiah inrît takkan thîng an ti.

⁵Israel neh Juda chu Israela Mi Rithiangah, ki chungah hin lei isual ngai khom sela Keimah, Tinrêngthotheia PUMAPA, Pathian hin ki îthla no a nit.

⁶Babilon ram ata ro ta rei, Nin ringna inzôk rangin itlân ta rei. Babilon ram sualna sikah khan ithatin om no rei. Ki phuba lâk zoro a tlung tâk a, an nit lam takkan kuttum kî tho rang a nit.

⁷Babilon ram chu ki kuta rângkachak kilât angkah a nit a, rammual pumpui kên in inrui a. Nam tinin a uain an in a, an invêt zoi tâk a.

⁸Babilon ram chu voikazelin â lîr a, a koi chit tâk a. Ani chu ṭâ ta rei. A sâbeheiah thingnâi damdôi nâl pêk unla, a dam duai khom a la nit thei.

⁹Ram dang mi omhei khan, ‘Babilon ram chu iṭangpui rang kin nuam a, khan â thlâi rai tâk. Tho ani chu marak ei ta, ei ram chitah lei fe ta rei u. A thiamnonan rivân a sun a, sûm nêka risâng a nit,’ tîng an ti,” a ti a.

¹⁰PUMAPA khan, “Ki mihei chu ikhêk suakin, ‘PUMAPA khan ei idikzia a târ inlang tâk. Tho Jerusalemah fêng ei ta, PUMAPA ei Pathian sintho hih Zionah mihei lei iril rei u,’ tîng an ti,” a ti a.

¹¹PUMAPA khan Babilon ram chu isehchit a tum sikin Media rênghei a îthor an nit. A Tempil siatna phuba khah khangkah khan ai lâk rang a nit. Babilon hong idoitu sipai ulianhei khan, “Nin thalhei itât inngaih unla, nin iphohei siam thlâm ta rei.

¹²Babilon kulbang iṭhet rangin ririatna ripeh rei. Vêngtu intam ual unla, enthlâttu seh unla, inrûkka lei iruang ṭian rang mi seh rei,” itin thu pêng an ti. PUMAPA khan Babilon ram mihei chunga itho ranga ai tum chu ai len tâk a nit.

¹³Kha ram khan vadung itam takka neh sumpuan itam takkah a nei a; khanniseh, a mongna a tlung tâk a, a ringna rui chu isatin ai om tâk a nit.

¹⁴Tinrêngthothei PUMAPA ngêi khan ama riming ichingin khâifapôl intâm angkan Babilon ram idoi rangin mi itam takkah hong iṭhui rangin ṭong arkhâm a, anmani khan nêna thlâng an îsam rang a nit.

¹⁵PUMAPA khan a sinthotheinan rinêng a siam a, A vârnan rammual ân ding a, a riatnan rivân ai kâiphar a nit.

¹⁶Thu a pêk a, tuihei chu an irî vung vung a; Kôlkomonga rithokin sûmhei a hong ṭhui a, Rua ân sûr a, khothlâr ân rilek a, A siana muna rithokin phâivua ân râng suak ngai a.

¹⁷Amakhah an mun chu mi tin inmôl neh, Riatna nei ino an nit iti an ririat a; Mirmil isiamtuhei chu an izak tâk a, An pathian siamhei khah a lem, ringna nei ino an nit a.

¹⁸Lutna nei ino an nit a, musit iom an nit. PUMAPA khan kuttum a tho tikin chu rimang vang an ti.

¹⁹Jakoba Pathian chu hihei angkah hi ni mak a; Ani chu tinrêng siamtu a nit; Israelhei khom ama nam rithlang bîk an nit. Arming chu Tinrêngthothei PUMAPA a nit.

²⁰PUMAPA khan, “Babilon ram, nang chu ki chemsei, ridoina râlthluk ni nit. Nangma mangin namhei chu ke chekindar a, Nangma mangin rêngramhei chu ki îsiat ngai a nit.

²¹Nangma mangin sakor neh a chunga chuanghei inuaichit ki ta, Nangma mangin sakor tâli neh a chunga chuanghei nôi chit ki ti.

²²Nangma mangin ipahei neh nupanghei that ki ta, Nangma mangin itarhei neh vânglâihei inrimang ki ta, Nangma mangin tlangvâlhei neh nungâkhei that ki ti.

²³Nangma mangin berapuhei neh berahei that ki ta, Nangma mangin loineituhei neh an ran manghei that ki ta, Nangma mangin Ram-optuhei neh ruaituhei inrimang ki ti,” a ti a.

²⁴PUMAPA khan, “Jerusalem chunga a thil thonsualhei sika Babilon ram neh a mihei ki thung lâi chu mûng nin ti.

²⁵Babilon ram, nang chu rammual pumpui isehtu tlângilian angkah ni nit a; khanniseh, Keimah, PUMAPA hi ne râl ki nit tâk. Nang idoi rangin ni chungah ki kut ilek ki ta, rinêngah nang iphek ki ta, mual ikâng vang rivâmin a irkhû angkan nang siam ki ti.

²⁶Ni mun iram ata lung rêng rêng in sinna mang rangin ila ni tlak khâi no nih. Kumkhuakan ramchâr angkah ni mai tâng ni ti. Keimah, PUMAPA hin kî ti tâk a nit.

²⁷“Ridoi rangin ririatna peh unla, namhei riat rangin bekul tum rei. Babilon idoi rangin namhei chu inrithluk unla; Ararat ram hei, Mini ram hei, Askenaz ram hei kha Babilon idoi rangin iril rei. An ruaitu rang phun unla, ikhâi intâm angkah dôra tam sakor hong bûm rei.

²⁸Babilon idoi rangin namhei chu inrithluk unla, Media rênghei, Ram-optuhei, an ruaituhei neh an ram op sunga sipai murdi koibûm rei.

²⁹Babilon chu ramchâr, mi tute om nona muna siam ranga PUMAPA khan a thiltum a len tâk sikah khan rinêng chu a înîng tâk a nit.

³⁰Babilon sipaihei chu risual an bâng a, an kulpui sungah an iom ṭian tâk a nit. An thâi ân dôp zoi tâk a, nupang angkah pai an nit tâk. Khopui dâikothei chu a siat a, an inhei chu a kâng zoi tâk.

³¹A khopui chu kil tinah a chim zoi tâk iti Babilon rêng iril rangin thangkoitu an rizom zat tâk a.

³²Irâlhein vadung rikannahei chu an lâk a, kulpuihei chu an hâl zoi tâk. Babilon sipaihei chu iṭi rilônthingin an om tâk.

³³Zoro sôt inote sungin irâlhein anni chu sâtnôi an ta, rîzôla bu chîl angkah hin an ichîlpol rang a nit. Keimah, TinrêngthotheiPUMAPA, Israelhei Pathian hin kî ti tâk a nit,” a ti a.

³⁴Babilon rêng Nebukadnezaran Jerusalem chu archan nôi a, A fâk zoi tâk a. Khopui kha bêl angkan ân rong vang a, Rûlpui angkan â lem riai a, Ai nuamkah a chôi a, a danghei chu â virpai tâk a.

³⁵Ziona omhei khan, “Ei chunga a tho lam angkah takin Babilon chungah khom itho ni riseh,” ti sela, Jerusalema omhei khomin, “Ei thisen mo Babilonhein pêl riseh,” ti riseh.

³⁶Khaangkan PUMAPA khan Jerusalem mihei ziangah hingka hin ai ti a nit: “Ringai rei, nin tiang ṭang ki ta, nin phuba chu keiman nangni la pêk ki ti. Babilon ram tuipui [66] chu inkang ki ta, a vadunghei khom inkang pêk riai ki ti.

³⁷Kha ram khah in ram nimnok ribuk, ramsahei lêngna chang a ti. Mihei imusit neh inrît tak nîng a ta; mi rêng rêng om khâi no nia; mi tin â mu kan an rilo inthing a ti.

³⁸Babilonhei chu an rêngkan sakeibaknei angkan irâm an ta, sakeibaknei tehei angkan irâm an ti.

³⁹An inrôp [67] lâi takin an ta rangin ruai inrifûk pêk ki ta, inrui neh râifânin siam ki ti. Zâl an ta, in an ta, har tlak khâi no nih.

⁴⁰Beratehei, kêlhei, berachalhei angkana ithat rangin anni chu ṭhui isuang ki ti. Keimah, PUMAPA hin kî ti tâk a nit,” itin.

⁴¹PUMAPA khan Babilon chungchâng thu hingka hin a ti: “Sesak [68] chu iman a nit tâk, rammual pumpui înpâk ngai khopui chu a tlôm tâk. Nam tinin Babilon dingmun chu rikhêl an iti a nit.

⁴²Babilon chu tuipuiin chîm a ta, tui rifôn natinsat tak khan rikhû riai a ti.

⁴³A khopuihei chu ram riai a ta, ramchâr tui boina, miriam rêng rêng om nona, tute îthlo no ram chang a ti.

⁴⁴Babilon pathian Bela chu kuttum thông ki ta, a îlem tâk khah inluak suak nôk ki ta, namhei khan chubai ûn nôk tlak khâi no nih. “Babilon kulbanghei chu a chim tâk a.

⁴⁵Ki mihei o, a sung ata hong suak rei. Ki ningmurna inrît tak ata nin zôkna rangin itlân suak rei.

⁴⁶Ram sunga ṭong ivuang pai nin riat tikin indôp no unla, ṭi no rei. Kum tin ram sungah buaina thu manih, anitnole rêng neh rêng ridoi thu manih ṭong ivuang a îndar mai ngai a nit.

⁴⁷Khante, Babilon mirmilhei kuttum ki tho rang zoro a hong itlung thiai tâk a nit. A ram pumpui mualinphoiin om a ta, a mihei chu that inrimang vang nîng an ti.

⁴⁸Mâr tianga rithoka â sehtu ranga honghei kutah Babilon ram a tlôm tenan chu rinêng neh rivân neh a sunga om murdi râifânin ipâi an ti.

⁴⁹Babilon ram chu rammual pumpuia mi itam takka thina thluntu a nit a, atûnah hin Israel mihei itam takkah a that sikin Babilon ram chu a îlîr ngêt rang a nit tâk. Keimah, PUMAPA hin kî ti tâk a nit.” itin.

⁵⁰PUMAPA khan Babilon rama Israel mihei ziangah hingka hin a ti: “Nangni khandai izôktuhei, atûn chu fe unla, iding ṭian khâi no rei. Ina rithoka ilah takah nin om khomin keimah, nin PUMAPA hih ne remai unla, Jerusalem khom ringil tlak no rei.

⁵¹Nangmanin, ‘Kin mualinphoi tâk a, an ne musitzia kin riatin kin mâi a môk a; ram dang mihein Tempila mun rithianghei an lua riai tâk sikin ṭangpui kin irngai titak a nit tâk,’ nin ti a.

⁵²Khasikin, kî ti a nit; Babilon mirmilhei kuttum ki tho rang zoro khah a hong itlung thiai tâk a nit, a ram pumpuiah sâbehei ituangin an îrung suai suai rang a nit.

⁵³Babilon chu rivân isunin risâng khom seh, a kulpuihei det khap khom sela, â sehtu rang a ziangah mi la tir ngir ki ti. Keimah, PUMAPA hin kî ti tâk a nit,” itin.

⁵⁴PUMAPA khan, “Babilona ṭap irî chu ringai unla, Kaldai ramsunga rithoka siatripna sika irung irî chu ringai rei.

⁵⁵Babilon chu inrimang vang ki ta, An rihu lum vung vung [69] chu a înthim ruam rang a nit. Sipaihei chu tuirifôn natinsat tak angkana hong ilûtin, Ikhêk vung vungin an hong idoi a nit.

⁵⁶Babilon isehchit ranga hong an nit a; Babilon sipaihei chu man an ta, An phelhei ikhiak pêk vang an ti. Kei chu sual ithung ngai Pathian ki nit a, Babilon chu a nit lam angkah takin intuang ki ti.

⁵⁷A roirêltuhei, mi vârhei, Ram-optuhei chu, An ruaituhei neh sipaihei neh khan inruiin siam ki ta, In thlar an ta, har nôk tlak khâi no nih. Keimah hi Tinrêngthothei PUMAPA ki nit a, Keimah, Rêng hin kî ti tâk a nit

⁵⁸Babilon kulbang isa tak chu chim vang a ta, A dâikot risânghei khom hâlinrivâm riai nîng a ti. Mipui sinsôlna chu â tlong a nit a, Namhei sintho murdi chu meisenpa fâk rang a nit. Keimah, Tinrêngthothei PUMAPA hin kî ti tâk a nit,” a ti a.

⁵⁹Rêng Zedekian ama sin bîka ai mang ngai chu Seraia a nit a, ani khah Maaseia nai Neria naipa a nit. Juda rêng Zedekia inlal kum ilinaa Babilonah a fe lâiin Seraia chu a ziangah a fe sa a, ani chu thu ki pêk a.

⁶⁰Babilon ram chunga siatripna tlung rang murdi neh Babilon ram chungchâng thu dang danghei kha lekhabuah ker ziak a.

⁶¹Seraia ziangah, “Babilon ni tlung tenan hi thu riziaka om murdi hih mihei riatah iring takkan ni tep suak ngêt rang a nit.

⁶²Khanungchu, ṭongṭai inla, ‘PUMAPA, hi nam hih isehchit ni tum thu ni lei inpuang thlâm tâk a; khasikin, tute, miriam neh ramsa khom om khâi no ni a, kumkhuakan ramchâr angkan ni mai tâng a ti,’ ti roh.

⁶³Serai, hi lekhabu hih mipui riatah ni tep zoin chu lungtum neh khit inrikop inla, Eufratis vadungah pai inla,

⁶⁴‘Babilon chu hingka hin rinîk a ta, thoi nôk khâi no nih. A chungah PUMAPA khan siatripna â thlun sikin itâl ṭian tâng a ti,’ itin isîr roh,” a ti a. Jeremia thusîrhei chu amahin ai mong tâk a nit.