Read Biete JEREMIA 52 Bible Online

JEREMIA 52 - Biete bible

JEREMIA 52

¹Kum sôminikakhatkah a nitin Zedekia chu ân lal a, Jerusalemah kum sômleikhatkah roi a rêl a. A nu riming chu Hamutali a nit a, Libna kho mi Jeremia nainu a nit.

²Jehoiakima angkan Zedekia chu PUMAPA mitmun thil isual a tho ngai a,

³PUMAPA chu Jerusalema neh Judai ram mihei chungah a ning a thik sikin a mitmu ata anni chu ai pai suak tâk a nit. Zedekia chu Babilon rêng chungah arhel tâk a,

⁴Zedekia inlal kum ikuakna, a thla sômna, a sûn sômnî-ah khan Babilon rêng Nebukadnezara chu, a sipai murdi neh Jerusalem idoi rangin a hong rithok a. Khopui chu a hual a, a vêlkan ṭangmun an khuar a.

⁵Zedekia inlal kum sômleikhatna dênin khopui chu an ihual khap a nit.

⁶Ṭâm chu a nat tak tak a; a thla lina, a sûn ikuaknî tenan chu ifah rang nei khâi mak a.

⁷Khopui kul banghei khah an iphep a, a sunga sipaihei chu zânah lâizâm an tho vang tâk a. Babilonhei khan khopui chu an hual khap pumin rêng rikul kôl bang inika kâr lampuiah khan an fe a, Jordan phâi tiang ipanin lâizâm an tho a.

⁸Khanniseh, Babilon sipaihei khan an rizûl a, Zedekia chu Jeriko kôl phâiah an môk a, a sipaihei khan an imâk vang tâk a nit.

⁹Khanchu, Zedekia chu an man a, Hamath rama Ribla khuaah Babilon rêng Nebukadnezara ziangah an ṭhui a, ani khan a chungthu a lei rêl a.

¹⁰Ribla khuaah khan Zedekia mu chung ngêiah a naipahei chu a that pêk a, Juda milianhei khom ai that sa a nit.

¹¹Zedekia khom a mitru an ikhel pêk a, thîrkol an inbun a, Babilonah an ṭhui a, a thi nî dênin Zedekia chu lung inah a întâng mai tâk a nit.

¹²Babilon rêng Nebukadnezara inlal kum sômleiikuakna, a thla ringana, a sûn sômnî-ah khan rêng sipai iruitu Nebuzaradana, Babilon rêng roiisakpui ngai chu Jerusalemah a hong lût a.

¹³PUMAPA In neh rêng-in kha a hâl a, Jerusalema in murdi, mi lianhei in murdi a hâl isiat riai a.

¹⁴Babilon sipai lôm, Nebuzaradana nuaia omhei khan Jerusalem khopui kul banghei chu an isiat riai a.

¹⁵Khanchu, Nebuzaradana khan mipui inriang tak tak, khopuia la omhei, kutsinithiam a la om murdihei, Babilon rêng kuta ripehei khah bôiin a ṭhui a.

¹⁶Khanniseh, Nebuzaradana khan Judai rama mi inriang tak tak, îte zel nei ino ṭhenkahei chu a mâk a, grep rikulheiah neh loiheiah sin a întho a nit.

¹⁷Babilonhei khan Tempila dâr chopuihei, arngatna dâr tâlihei, dâr tuipanghei kha an ikhoi riai a. Dâr murdi chu a rêngkan Babilonah an chôi riai a.

¹⁸Bêlhei, vutluakhei, [70] meiser thatnahei, ribôlna sa thisen siana rihûmhei, namhoi hâlna berbuhei neh dâr bûrbêl murdi kha a lâk riai a.

¹⁹Rângkachak neh tangkaruaa siam murdi: berbuhei, khênghei, bêlhei, meiser sianahei, namhoi lanna khêngtehei, uain thillan bunsuaknahei kha an ilâk riai a nit.

²⁰Tempil ranga Solomona isiam dâr chopui inikahei, dâr tâlihei, tuipang neh â ṭhungna serâtchal sômleiinikahhei chu a rik raia ivar thei zât zel ni mak e.

²¹Chopui inikahei chu mûk sômlei mûk iriatka risâng a nit a, a lian dân chu mûk sômlei mûk inikah inrivêl lûm tiakah a nit. A sung arkua a, â sâ dân chu zabokka sâ a nit.

²²A chopui môrah khan a lu bôk mûk ringaka risâng sumsena siam a om a, a vêlkan dârsena siam theisena inrivo a nit.

²³A chopui pangah khan theisen rizakah a om seng seng a, sômikuakka irukka chu nuaia rithoka imu thei seng seng an nit.

²⁴Sipai ruaitu Nebuzaradana khan Thiampu laltak Seraia, a nuai zela thiampu Zefania neh biak in milian ithumkahei kha a man a.

²⁵Khopuia la om sipaihei ruaitu banah rêng roiisakpuitu mi sarikahei, sipai ruaitu nuai zela sipai thurchi riziakna vongtu neh mi lian dang sômirukkah khom a ṭhui sa a.

²⁶Nebuzaradana khan an rêngkan a man a, Ribla khuaah Babilon rêng ziangah a ṭhui a.

²⁷Babilon rêng khan Hamath ramhual sunga om Ribla khuaah khan anni chu dengthei ân tuang a, a that tâk a. Khanchu, Juda mihei chu an ram ata bôia ṭhui an nit tâk a.

²⁸Nebukadnezaran bôia ai ṭhui mipui tam dôr chu hingka hin a nit: Rênga ân lal kum sarinaah khan mi sângithumka neh sôminikah ithumkah a ṭhui a.

²⁹Ân lal kum sômlei kum iriatnaah khan Jerusalema rithokin mi rizariatkah sômithumkah inikah a ṭhui nôk a.

³⁰Ân lal kum sôminika thumnaah khan sipai ruaitu Nebuzaradana khan mi rizasarikah sômilikah ringakah ai ṭhui a nit. An rêngkan mi sângilikah rizarukkah an nit.

³¹Juda rêng Jehoiakina chu kum sômithumkah sarikah bôia â tâng nungin Evil Merodaka chu Babilonah a hong inlal a. Kha kum ngir a thla sômlei inikna, a sûn sôminika ringaka nî-ah khan Juda rêng Jehoiakina chu tâng in ata â sua a, zalen takkan ân om tâk a.

³²Evil Merodaka chu Jehoiakina chungah a ṭhat tak tak a, Babilon rama a zianga om sa rêng danghei nêka dingmun iṭha ualin a siam a.

³³Khanchu, Jehoiakina chu a tâng in thlukthlahei a thleng a, a ring kongkârkah rêng dochamah khalai rikhîlin ai om tâk a nit.

³⁴Sûn tina a thil nanghei chu Babilon rêng khan a pêk ngai a, khangkah khan a ring kongkârkah, a thi dênin iṭha takkan ai enkol a nit.