Read Biete JEREMIA 6 Bible Online

JEREMIA 6 - Biete bible

JEREMIA 6

¹Benjamin mihei o, zôkna zongin itlân ta rei; Jerusalem ata itlân suak rei. Tekoa khuaah bekul tum unla, Beth-Hakerema rithokin inriatna mei inchok rei. Mâr tianga rithokin inkhôkna neh rimangna a zuang itlung thiai rang tâk a nit.

²Zion Khopui enihoi tak chu isehchit ni tâng a ti.

³Rênghei chu an sipailômhei neh zuang rithok an ta, khopui ihualin an puan-inhei la zar an ta, mahni nuamna mun chitah om an ti.

⁴Anni khan, “Jerusalem idoi rangin risiam rei. Intûng ṭian rei. Sûnlâi takah ei idoi rang a nit,” la tîng an ti. Khanniseh, “Â tlâi rai tâk, inî arniam tâk a, kholoi a nit tâk a, â zîng zel rang tâk kêng.

⁵Zânah doi ei ta; khopui kulhei isehchit ei ti,” ti nôk an ti.

⁶PUMAPA Tinrêngthotheia khan kha rênghei ziangah khan thu a pêk a, “Thinghei rikit unla, Jerusalem lûtna rangin rinêng vur inpông rei. Rinuaisianaa sip khopui hih isehchit rang a nit.

⁷Tuikuangah tui ithar lak ai suak mai ngai angkan Jerusalemah khom pualoina thar ai suak mai a nit. Ritôk rihêm neh rirok a tam tak tak a, kuttum ituang neh sâbe tuang imu rang ai om mai a nit.

⁸Jerusalem mihei o, hi buaina hih nin ridînnah ranga riningna nangni chang pêk riseh; khanonchu, nangni marak ki ta, nin khopui khom hih luatu om ino ramchârin kî siam rang a nit,” a ti a.

⁹PUMAPA Tinrêngthotheia khan ki ziangah, “Israel la om isunhei chu grep angkan rimal infâi nîng a ta, grep rimaltun a rêk ikop khom a irmal infâi riai ngai angkan phît infâi liai nîng a ti. Khasikin, zoro a la om lâiah hin nin thei dôrkah chu nin sanisua ngêt rang a nit,” a ti a.

¹⁰Keiman ki sâm a, “An ziangah ti pêk khom inlang, tûm ki thu ril arngai rang a? Tuklulilian neh ni thucha zôm nuam ino an nit a, iti ranga ni neh îril hih an inui an înzat chak a nit.

¹¹PUMAPA, an chungah ni ningthiknaah khan kei khom ki ning a thik sa a, kî tuang zoi khâi ino a nit,” ki ti a. Khanchu, PUMAPA khan ki ziangah, “Ki ningthikna chu tolâia naipang ridâihei chungah iṭhum inla, tlangvâl ribuk khômhei chungah khom iṭhum roh. Pasalhei neh nupuihei chu iṭhui paiin om an ta, ulianhei neh itarhei tena lua khom izua ni no nih.

¹²An inhei chu mi danghei ipe nîng a ta, an loihei neh an nupuihei khom mi dang ipe nîng a ti. Khangkah khan hi rama mihei hih kuttum kî tho rang a nit.

¹³Â chîn taka rithoka â lian tak idênin kuatinkamnan an sip a, zânthlahei neh thiampuhei tena khomin mipui an ilêm ngai a nit.

¹⁴Ki mihei popna sâbe kha nuamningin an tuam pêk a, ‘Dam a ti, dam tâng a ti,’ an ti a, idam lak dam viat mak a.

¹⁵Thil porinche tak an tho khomin izak mak a, izak nachâng rêng rêng reh tlak mak e. Khasik takah khan mi dang â lîrhei angkan ilîr an ta, kuttum ki tho nî tak kha an mongna nîng a ti. Keimah, PUMAPA hin kî ti a nit,” a ti a.

¹⁶PUMAPA khan a mihei ziangah, “Lamṭhuamheiah iding unla, thlîr ta u. Tianlâi lam rilun neh iṭha khah ridon unla, amakhan lôn rei. Khanchu, rithla ringam takkan lêng nin ti,” a ti a. Khanniseh, anni khan, “Kha lampuiah khan fe no ning ung,” an ti a.

¹⁷Khanchu, PUMAPA khan, “Nin ta rangin râlvêngtu ki phun a, a bekul irî kha ringai ving rei,” a ti a. Khanniseh, anni khan, “Ringai no ning ung,” an ti a.

¹⁸Khasikin, PUMAPA khan, “Namhei o, ringai ta u; ki mihei chunga thil zuang itlung rang hi lei reh rei.

¹⁹O leilung, ringai ta, hi mihei chungah hin siatna ki îthlun rang a nit. Ki thuhei ringai mak a, ki dânhei an nôl sikin an ringaituana râ chu an iât rang a nit.

²⁰Seba rama rithoka bero namhoi manih, ram ilah taka rithoka nithal riak namhoi tak an ne hong ichôipêkhei hih, ki ta rangin im a lutna a om a? An hâlrivâm thillanhei iham no ning a, an ribôlnahei khom lôm no ning e.

²¹Khasikin, hi mihei maah hin an ibâna rang seh pêk ki ta, ilîr an ti. Pahei neh naihei an rêngkan thi riai an ta, an mal ṭhahei neh an bungtualbômhei khom rimang an ti,” a ti a.

²²PUMAPA khan, “Ringai roh, mâr tiang rama rithokin mi an zuang e, kôlkila nam roinpui chu râl idoi rangin a irsiam diam tâk a nit.

²³An phelhei neh khandaihei an chôi ṭian tâk a; mi nunter tak, lungkhamna nei ino an nit. An irî chu tuipui irî vung vung angkah a nit a; sakor chungheiah an chuang a, ridoi rangin an înrân bung tâk a nit. O Jerusalem, nangma doi rangin an irsiam diam tâk a nit,” a ti a.

²⁴Jerusalem mihein, “An thuthang kin lei riat a, kin ibânhei arzal zoi tâk a, nupang naiha isê angkan lungdongna neh natnan a ne ide tâk a nit.

²⁵Loi lamah fe ngam khâi mang ung a, lampuiheiah khom lôn[10] ngam khâi mang ung, kin irâlhei chu râlthluka rithluk an nit a, kil tinah ṭinan a ne irkhû tâk a nit,” an ti a.

²⁶PUMAPA khan a mihei ziangah khan, “O ki mihei, borapuan sil unla, rivut kârah itâl rei. Nai ipa neisun isûn angkah takin mitrithli sômin ṭap rei, nangni doi ranga hong khan nangni a hong îbô zel rang a nit.

²⁷Jeremi, tangkarua ner thît infâi rang dân angkah takin ki mihei fian la, im an ang mu suak roh.[11]

²⁸An rêngkan tuklulilian, rihel isong an nit a, sumsen neh thîr angkana khir an nit. An rêngkan thu chanlamboi thekindar ngaihei an nit.

²⁹Sisâr chu hâl inzôi rangin pûmin an zâp ngai a; khanniseh, a êk chu zôi thei loiin arlong diai ngai. Ki mihei rithît infâi itum mai hih rifena boi a nit, mi ṭhanohei khâi inrimang an nit no sikin.[12]

³⁰Anni chu lutna neiino tangkarua êk tîng an ti. Keimah, PUMAPA ngêiin anni chu kî nôl tâk a nit.”