Read Biete JEREMIA 7 Bible Online

JEREMIA 7 - Biete bible

JEREMIA 7

¹PUMAPA khan Tempil kotbâi Juda mihein chubai ûnna ranga an lûtna ngaiah khan a ne tir a. Amakhan idinga, PUMAPA Tinrêngthothei, Israelhei Pathianin thu sîr ranga a ne ipêk khah an zianga inpuang rangin a ne ril a; “Nangni PUMAPA chubai iûn ranga hi kotbâia hong ilût Juda mi murdihei o, PUMAPA thu hih ringai rei. Nin sinthohei, nin omdânhei indanglamin risiam inṭha unla; khanchu, hi munah hin nangni in-om mai ki ti.

⁴‘Ei zôk riam! Amahih PUMAPA Tempil, PUMAPA Tempil a nit, amahih PUMAPA Tempil kêng ai nit!’ iti ringot hih ringatna [13] rang inrup mak e.

⁵“Nin omdânhei, nin sinthohei nin siam inthat titak a nitin chu mi danghei thu khom iṭha takkan ringîk risak pumin rêl rei.

⁶Ram dang mihei, farahei, numeihei nuaisia khâi no rei; hi ramah hin mi ningsiat sin inohei thisen isua khâi no unla, nin siatna rangin pathian danghei chubai ûn khâi no rei.

⁷Khanchu, hi ram, tianlâi ata nin dongtum ranga nin chibulhei zianga kî pêk ramah hin nangni in-om mai ki ti.

⁸“Khanniseh, enta u, rilêmna thuheiah nin irngat ual tâk a nit hih.

⁹Inru nin tho a, mi nin that a, nin inrê a, vâni risâmin milak nin tho a, Baal ziangah ribôlna nin lan a, nin lai riat ngai ino pathianhei chubai nin ûn ngai a.

¹⁰Hi ki thil nelhei hih nin tho a; khanchu, ki makungah, ki Biak inah hong ingîrin, ‘Ei izôkriam a nit,’ nin ti ngai a.

¹¹Hi in ker ming rilamna mun hih inruhei ipûk nin isôn mani? Keimah ngêiin nin thiltho kî mu riai kêng ai nit.

¹²Ker ming rilamna rang muna ki irthlang masa tak Silo khuaah[14] fe unla; ki mi, Israelhei sualna sika ki sinthohei va en rei.

¹³Hi thil isualhei hih nin itho a nit a, vêl itam takkah nin ziangah thu ke sîr khomin ringai nuam mak chei a. Nangni ki koi khomin nin ne isâm nuam ino a nit.

¹⁴Khasikin, Silo khua chunga kî tho angkah khan hi ki Tempil, nin lungringamna ngai chung khomah hin kî tho rang a nit. Hi mun nangmani neh nin chibulhei kî pêk hih Silo khua ke siat lam angkah takin ki îsiat rang a nit.

¹⁵Efraim richi, nin suapui Israelhei kî ûmisua angkah takin ki mitmu ata nangni ûm isuang ki ti. Keimah, PUMAPA hin kî ti a nit,” itin.

¹⁶PUMAPA khan hingkan a ti a: “Jeremia, hi mihei hih ṭongṭai pêk no roh. Ṭap non la, an ta rangin ngên pêk no roh. Ni ngên pêk khoma nang ringai pêk no ning e.

¹⁷Judai ram khopuia an thilthohei, Jerusalem kotsuaa an thilthohei hi nî mu no mani?

¹⁸Naipanghein thing an rikit a, pahein mei an sêm a, nupanghein rivân rêngnu[15] ta ranga ibai isiam rangin ibaidi an imet a, pathian danghei ta rang iin rua thillan uain an thlît suak a; khasikah khan ki ning ai thik titak a nit.

¹⁹Khanniseh, ke lung an înnat titak chu ai nit mani? Ni mak e, an khâtin an rinat risaka mualinphoina an chungah an îṭhum lem a nit.

²⁰Hi sikah hin, Keimah, PUMAPA Pathian hin ki ningthik natinsat tak chu hi Tempil chungah hin iṭhum ki ta; miriamhei, ramsahei, ramnuaia thinghei, chimuhei chungah khom iṭhum ki ti. Ki ningthikna chu mei angkah nîng a ta, tutên that thei no nih.

²¹“Ki mihei o, hâlrivâm thillanhei kha chu a rêngka mâichâma hâl inrivâm rang a nit a, ribôlna thillan dang a ṭhen chu a sa nin fâk ranga iphal khom a om a. Khan Keimah, PUMAPA hin kî ti chu a rêngkan fah riai [16] rei.

²²Nin chibulhei Aigupta ram ata ki ṭhui isua lâiah khan hâlrivâm thillanhei, ribôlna thillanhei ilan rangin thu peh mang e.

²³Khan an Pathian ki nit a, ki mihei an nit theina ranga ki thu zôm rangin thu kî pêk a nit. Khante, lam tinrêngah an hong inṭum mai theina rangin ki thupêk angkah taka ring rangin ki îril a nit.

²⁴Khanniseh, ngaisak loiin zôm nuam mak a. Kha nêkan, an tuklullian an isua a, sual lampui tiang an ri-ôn khap a, ṭhatna tiang malam pan loiin nung an irtol tâk a nit.

²⁵Nin chibulhei Aigupta an mâk nikhuaa rithoka vuani ten idênin ke somhei, zânthlahei nin ziangah ki tir mai ngai a.

²⁶Khanniseh, tutên lei ringaiin lei uksak nuam ngai mak a. Kha nêkan chu nin tuklul nin inlian ual ual a, nin chibulhei nêkan nin îsual ual tâk a nit.

²⁷“Khasikin, Jeremi, hi thuhei hih ki mihei ziangah ril ni ta, khan ringai nuam no nia, isam ni ta, khan nang sâm no nih.

²⁸Keimah, PUMAPA an Pathian thu hih, a nam pumin zôm nuam mak a, ke sôina khom zôm nuam ual mak iti iril roh. Iamomna om khâi mak a, an bâi khomin sâm suak khâi mak e.

²⁹“Ṭâ rei, O Jerusalem mipuihei, Nin sam mêt inkol unla, pai riai rei. Itlângsîpheiah lusûn lâ sak rei, Keimah, PUMAPA hi ki ning a thik a, Ki mihei kî heng tâk a nit.

³⁰“Juda mipuihein thil isual tak an itho tâk a nit. Ker ming chingna ngai ki Tempilah an mirmil porinche kî nel takhei an sia a, ki in chu an înbor tâk a nit.

³¹Ben-Hinom phâizôlah an naipahei, an nainuhei ribôlnaa meia hâlna rangin mâichâm ‘Tofet’[17] an siam a. Hi thil itho ranga hin thu peh mang a, ker ngaituana khom ni tlak mak e.

³²Khasika khan, Tofet manih, Hinom phâi manih itin koi khâi no nia, ‘Rithatna phâizôl’ itia koi ni tâng a ti. Mun dang riphûmna rang a om no sikin mithihei Tofetah khan phûm tâng an ti.

³³Hi mihei ruak hi chungavuang ivahei neh ramsahei bu chang a ta, tutên ûm indar no nih.

³⁴Judai ram khopuiheiah, Jerusalem kotsuaheiah khan râifânna neh lômna rîhei, ilâm irîhei, rineina ruaiṭhe irîhoihei om khâi no nia, ram chu ai ramchit rang tâk a nit.