Read Biete JEREMIA 8 Bible Online

JEREMIA 8 - Biete bible

JEREMIA 8

¹“Khatik tenan chu, Judai ram rêng ruhei, milianhei ruhei, zânthlahei ruhei, mi dang Jerusalema omhei ruhei khom khah an ithlâna rithokin ilah suak nîng a ti.

²Kha ruhei khah iṭha takka bûm a, marit takka phûm ni no nia, rinênga nimnok riting bûm angkah pai nîng an ti. Ringai innah takka a sin an itho a, an izong a, an izuia chubai an iûn ngai inî, ithla neh rivâna ârsi murdi maah khan iphoi suak nîng an ti.

³Khante, hi nam isual tak lâia mi a la dam isunhei khan ke chekindarna munheiah khan idam mai nêkan chu ithi rithlang ual tâng an ti. Keimah, Tinrêngthothei Pumapa hin kî ti a nit,”

⁴PUMAPA khan a mihei ziangah hingkan iti pêk rangin a ne ril a, “Mîn an ibâ tâkin an ithoi nôk ngai ino mani? Mîn lampui an ivâiin an ikîr nôk ngai ino mani?

⁵A nit inteh, O ki mihei ithôm ki tiang kîr khâi loiin nung nin ne isong thal tâk hi? Nin mirmil nin itûk khap a, ki tiang nin ikîr nuam khâi ino a nit.

⁶Nangni ker ngai ving a, khan thudik zel ril mak chei. Tutên nin sual rilet nuam mak chei a, nin lâia a tu khomin, ‘Thil dik ino kî sin tâk mani o?’ ti ngai mak chei. Risual bual ipana sakor itlân angkan mi tinin mahni lampui chit izuiin nin îtlân a nit.

⁷Varingseihei khomin rithon zoro an riat a, vaṭhuhei, peloihei neh vakhoṭhâlhei khomin a zoro takah an hong ilang ngai a. Khanniseh, ki mihei hin chu ki roisak dânhei nin iriat ino a nit.

⁸Ingkan im ivâr nin riti a, ki dânhei khom iriaa nin irbe thei? Nin iriat chu lekha ziaktuhein an iphuatota an irziak bang kha a nit.

⁹Nin mi vârhei chu izak an ta, lungzîngnan rikhû a ti. Ki thuhei an nôl a, vârna îtak im an nei ual rang tâk a.

¹⁰Khasikin, an nupuihei mi dang pêng ki ta, an loihei khom mi dangin dong an ti. Â chîn taka rithoka â lian tak idênin kuatinkamnan an sip a. Zânthlahei neh thiampuhei tena khomin mipui ilêm an isong a nit.

¹¹Ki mihei sâbehei chu ngaisak viat loiin an tuam a, ‘A ṭhat riai, a ṭhat riai,’ an ti a; khanniseh, idam lak dam viat mak a.

¹²Ki mihei o, hi thil porinchehei nin tho khomin izak viat mak chei a, izak nachâng rêng rêng nin iriat khâi ino a nit. Khasikin, mi dang â lîr tâkhei lâiah ilîr sâng nin ta, kuttum nangni ki tho tenan chu nin îdal phar rang a nit. Keimah, PUMAPA hin kî ti tâk a nit.

¹³“Loisintûn a chimuhei a irtik bûm ngai angkan ki mihei ikoi bûm kî nuam tak tak a nit; khanniseh, grep irâ no neh theipui irâ no angkah an nit a, an nâhei khom â thêm tâk angkah an nit. Khasikin, an zianga kî pêk ram chu putianga mihei lâk rangin kî phal tâk a nit,” a ti a.

¹⁴Pathian mihei khan, “Ithôm ei îṭhung ṭian hi? Tho, kulpui inei khuaheiah itlân lût ei ta, amakhan lei thi rei u. A chungah ei isual tâk sikin PUMAPA ei Pathianin ithi rangin thiamno a nen chang tâk a, tûr iin rang a ne ipêk tâk a nit.

¹⁵Thlangamna ei tûnga; khan thil iṭha îte tlung mak a, indam zoro ei thlîr a, khan thlavâina bang a zuang tlung a.

¹⁶Ei irâlhei chu Dana khopuiah an om pial tâk a, an sakorhei nâr không irî khom ei iriat thei tâk a nit. An sakor irâm khan ram pumpui rilo a înthing a nit. Ei irâlhei khah ram neh a sunga thil tinrêng, khopuihei neh a sunga miriam iom murdihei ne sehchit rangin an ihong a nit tâk,” an ti a.

¹⁷PUMAPA khan, “Rining ṭian rei, nin lâiah irûl tûr inei ki hong itir rang a nit, irûl tûr irât vâi inzong thei chi ninohei an nit a, nangni ichuk an ti,” a ti.

¹⁸Ke lungnatna hi indam thei ni mak; Ki lungril a nat vang na!

¹⁹Ringai ta u, ram pumpuiah ki mihei chu an ṭap irung a, “Zionah khan PUMAPA chu ai om khâi ino mani? Amakhan Zion rêng chu ai om khâi ino mani?” an ti a. PUMAPA, an rêng khan a sâm a, “Nin mirmilhei chubai iûnin, Ram dang pathian mangmunboihei makunga lu khûnin, Îtho sik im ki ning nin înthik hi?” a ti a.

²⁰Mipuihei chu an ikhêk suak a, “Kholum a hek a, bôlzoi khom a hong vun tâk a, Saninzôk lak la ni ual mang me a,” an ti a.

²¹Ki mihei ngaisiatna ke tlângpuia, Ki ṭap a, lunginzîng takkan ki om tâk a.

²²Gileadah khan thingnâi damdôi ai om ino mani? Amakhan mîn damtu ai om ino mani? Ithôm ki mihei indam an nit thei no?