Read Biete JEREMIA 9 Bible Online

JEREMIA 9 - Biete bible

JEREMIA 9

¹Ki lu hi tuiin sip sela, ki mit hih mitrithli nâr ni seh ki nuam vang chu! Ki mi, ithata omhei isûnin a sûn a zânin kî ṭap rang pial.

²Khualzinhei rang ramchârah tlungna rang khualtlung-in om sela, Ki mihei marak ki ta, amakhan ki irkiang pêk rang pial. An rêngkan an inrê a, iamom ino lôm an nit.

³An ilei chu milak itho rangin phel kam isai angkan arfo ṭian a; Ram sungah dikna nêkan rilêmna ân lal ual tâk. PUMAPA khan, “Ki mihein thil ṭhano an tho ngit a, An Pathian hi ne reh mak e,” a ti.

⁴Mi tukhom mahni rualṭhaa rithokin ridîn unla, Nin suapuihei khom tute iam no rei. Suapui khom Jakoba angkana mi lêmsia, Rualṭha khom sîrinsehtu a nit.

⁵Rual neh rual an rilêm a, thudik isîr reng omak; Milak itho an risei risak a, Pualoi sin ithon zoro an mang ihek a.

⁶Thonchâina chu thonchâinan a zui a, Rilêmna chu rilêmnan a zui a, ne ria an itum ino a nit. PUMAPA khan ai ti a nit.

⁷Hi sikah hin Tinrêngthothei PUMAPA khan hingka hin a ti: “Tangkarua angkan ki mihei chu rithît ki ta, Anni chu kî fia rang a nit. Ki mihein sual an sin tâk a, An chungah îdang tak im ki tho ual rang tâk a?

⁸An ileihei chu thina thal angkah hi a nit a; Milak an itho mai ngai a nit. An bungtualbômhei ziangah ṭong ithlum tak an tho a,[18] Khanniseh, a ril takah chu châng an ikam pêk ṭian a nit.

⁹Hi thilhei sikah hin anni chu kuttum kî tho no rang mani? Hingkana nam chungah hin phuba kî lâk ino rang mani? Keimah, PUMAPA hin kî ti a nit.”

¹⁰Keiman, “Lusûn angkan mualtlânghei ṭâng ki ta, Sûl iring munhei a châr zoi tâk sikin ṭap ngûi ngûi ki ti; Tute amakhan â fe om khâi mak a, Ran lôm rihu khom iria ni khâi mak a; Chungavuang ivahei neh ramsahei khomin an mâk riai tâk,” ki ti a.

¹¹PUMAPA khan hingkan a ti: “Jerusalem chu in ram ichim inpôngin siam ki ta, Sihalhei rilongna mun nîng a ta, Judai ram khopuihei chu ramchâr chang an ta, Tutên lua khâi no nih.”

¹²Keiman, “PUMAPA, îtho ranga ram chu isehchit a, ramchâr angkana ṭôla siamin, tute inzin khâi loi ranga siam im ai nit? Hihei irethiam theia vâr tûm â om? Mi danghei iril rangin a tu ziangah hin im hi thilhei hih nî rilfia pêk?” ki ti a.

¹³PUMAPA khan a ne sâm a, “Ki mihein, an zianga kî pêk, ki dânhei an nôl sika hi thil hih â tlung a nit. Ki thu ringai mak a, izôm khom an izôm nuam ino a nit.

¹⁴An tuklullian an isua a, an pahein an lei inrisei lam angkan Baal pathian chubai an iûn tâk a nit.

¹⁵Khasikah khan Keimah, PUMAPA Tinrêngthothei, Israel Pathianin an chunga ki tho rang hih ringai roh: Ki mihei hi loisûl ikhâ infâng ki ta, an in rangin tui ikhâ kî pêk rang a nit.

¹⁶Anmani neh an chibulhei khomin an iriat ngai ino namhei lâiah ichekindar ki ta, ken rimang riai mâkah chu khandaiin ki irzûl rang a nit,” a ti a.

¹⁷PUMAPA Tinrêngthotheia khan hingkan a ti: “Im thil â tlung hih ngaitua ta u! Mithi sûna ṭâ lâ sak ithiam nupanghei[19] koi unla, Ṭap ithiamhei ngêi khah koi rei,” itin

¹⁸Mipuihei khan, “Irang takkan hong sela, ne hong ṭâpui riseh; Kin mithei mitrithlin a sip makah, Kin mithei mitrithlin a sip a, â far ngûi ngûi theina rangin,” an ti a.

¹⁹Ziona ṭap irî chu ringai ta u: “Ei siatchit tâk a, mual ei inphoi tâk; Ei ram hi ei imâk ngêt rang tâk a nit; Ei inhei lak chu a chim zoi tâk a,” itin.

²⁰Keiman, “Nupanghei o, PUMAPA thu hih ringai unla, A ṭongbâi suak hi reh rei. Nin nai nupanghei kha ṭâ dân inrisei unla, Nin chamhei kha lusûn lâ sak dân inrisei rei.

²¹Thina chu ei tukverheiah a hong lût a, Ei rêng-in roinpuiheiah a lût tâk a; Naipanghei chu kotsuaheiah a sât inlîr tâk a, Tolâi dungah tlangvâlhei khom a sât inlîr tâk.

²²Nimnok angkan tualah ruak arthek chût tâk a, Fânung angkan imah tâk rikhôm ai nit khâi ngai ino angkah hin, Tutên an irkhôm khâi ino a nit. Amahih a nit, PUMAPA khan inpuang ranga a ne îril chu a nit,” ki ti a.

²³PUMAPA khan hingka hin a ti: “Mi vârin a vârna song no riseh, Mi rât khomin a râtna song no riseh, Mi richong khomin archongna risongpui no riseh.

²⁴Mi tukhom risong a nuamin chu, Rinêng chunga mihei lung ithlunga, An chunga idik tak neh ifel takka roi irêl ngaitu, Ki nit iti riat infelna kha song riseh. Amakhah ki lômlam tak chu a nit. Keimah, PUMAPA hin kî ti a nit.”

²⁵PUMAPA khan hingkan a ti: “Aigupta mihei, Juda mihei, Edom mihei, Amon mihei, Moab mihei neh ramchâra omhei, an lu inbûi ngaihei kuttum ki tho rang nikhua chu a hong itlung thiai tâk a nit. Hi mihei hih sertan chu an nit korong a, khan taksa paia tan an nit a, sertan titak an init ino a nit. Israelhei ngêi khom lungril tianga sertan ino an nit a, ki thuthlung an ivong indik ino a nit.”