Read Biete JEREMIA ṬÂ LÂ 1 Bible Online

JEREMIA ṬÂ LÂ 1 - Biete bible

JEREMIA ṬÂ LÂ 1

¹Îtho tâk im na! Mipuia sip ngai Jerusalem, Khopui khah beidong a om vang tâk tlia na! Nam tinhei lâia roinpui ngai kha numei angkah a hong nit tâk a. Ram bunghei lâia lian tak ngai kha, Siachôi khua a hong chang tâk a.

²Zântluanin ngaiinsian a ṭap a, â biangah mitrithli a luang e. A rual iluihei lâiah thlangam isaktu rang nei mak e. A rual ṭhahei murdîn an phial a, â râl an chang zoi tâk.

³Juda mihei khah dengthei ituangin bôiah an itâng tâk a, Nam danghei rama lêngin ringamna zel tong mak e. Irâlhein mun richêpah an hual de khap a, Zôkna lampui zel omak.

⁴Sûn rithiang nî heiah khan tute Pathian chubai iûn rangin Tempilah hong khâi mak a. Khantaka la sak ngai nungâkhei kha dengthei ituangin an om a, Thiampuhei khom an irung an irung a; Zion khopui lamhei chu a ngûi riai e, A kul kotbâi murdi a ram zoi a, Zion khan natna ai tuang a nit.

⁵Â râlhei kha ruaitu an chang zoi a, Ani chu an thunuaiah an inlêng a, A sualna murdi sikin PUMAPA khan ani kha a întuang a nit; A râichôihei khah â râlhein an man a, Bôiin an ṭhui tâk a.

⁶Jerusalem roinpuina kha mual a khum zoi tâk. A ruaituhei khah sazuk chal lêngna mun nei ino angkah an chang zoi tâk, Anni rizûltuhei maah khan ritha rivun nei loiin lâizâm an tho a.

⁷Jerusalem khan dengthei lungzîng a tuang nungin, A tianlâi roinpuina kha a riat suak a; Â râlhei kutah a mihei an ilîr lâiin, Ani chu tute â san rang omak e. Â râlhei khan â lîrna khah an mun chu an riiam a.

⁸A roinpuina om khâi mak; Korongboin a om a, musitin a om tâk. A nit, beidongin â rung a, mâimôkin a mâi a thup a. Jerusalem chu sual natinsat tak a tho a, Ai Porinche tâk a nit.

⁹A porinchena chu â lang vang a, Khanniseh a sûn maton rang zel ngaitua mak. Khasikah khan rikhêl takkan a tlôm a, Thlangam isaktu zel nei mak e. Â râlhein nêna an chang a, Ani chu PUMAPA ziangah lungkham ingênin a ṭap a.

¹⁰Â râlhei khan a thil ilu murdi an lâk pêk riai a. A mun rithiangah khan an lût a mu a, PUMAPAN Jentailhei lût loi ranga ai khap Tempil ngêiah khan.

¹¹A mihei murdi ifah rang izongin an irung a; An thil iluhei khah an nuk rizomna rangin bu manin an pêk a. “PUMAPA ne en inla, ki dengtheizia hi mu roh,” itin khopui kha a ṭap a.

¹²Thleng rilôihei ziangah khan, “Nangni lampuia thleng rilôi murdihei, Nin ta rangin îte ai nit viat ino mani? Ringai unla, en ta u, ki chunga tlung, Dengtheina angkana dengthei tuangna hi a om ngai im? A ningthik natinsat nî-a PUMAPA nen tuangna angkana hi.

¹³Chungtiang ata mei a zuk tir a, Ki ru sung ikângtu mei kha; Ke ôkna rang châng a kam a, rinêngah a ne ṭhum a. Khanungchu, a ne mâk rak a, Natna tuang pumin a ne imâk tâk a nit.

¹⁴Ki siatnahei murdi artik tap a, An rêngkan â têl bûm a; A nen pêl tâk a, ker tha arzal zoi tâk, PUMAPA khan ke râlhei kutah a ne pêk a, Anni kha kî doi zoi ino a nit.

¹⁵Ki mi râthei murdi PUMAPA khan chanlamboiin a siam a; Ki tlangvâlhei inrimang rangin ki chungah sipai lôm a tir a. Ki mihei chu PUMAPA khan uain sômkhura grep chîl inrinôi angkan a chîl inrinôi a.

¹⁶Hi sikah hin ki ṭap a, Ki mitrithli a luang zun zun a. Tutên thlangam ne sak thei mak a, Tutên ne thor inhar thei mak. Irâlhein an ne tôk a, ki râichôihei chu beidongin an om tâk.

¹⁷Ke bânhei ki phar a; khanniseh, tute ne san rang omak e, PUMAPA khan irâlhei khah ne doi rangin kil tina rithokin a koi a. Anni khan thil porinche angkan an ne îtir a nit.

¹⁸Khanniseh, PUMAPA chu a fel a, Keiman a thupêk kî zôm ino kêng ai nit. Mipui murdihei o, ringai unla, Ki tuang lâi hih en rei. Ki nungâk neh tlangvâl hei bôiin an ṭhui zoi tâk.

¹⁹Ki thu inrualpui ngaihei ki koi a, Khanniseh, ne san nuam khâi mak. An ringna ranga bu an zong lâia khan, Thiampuhei neh ruaituhei kha khopui kotsuaheiah an thi zoi tâk.

²⁰O PUMAPA, en ta, ki dengthei tlia hi, Ki ringna a buai zoi tâk. Ki siatnahei sikin ki lungril khom ngaisiatin a koi tâk. Kotsuaheiah rithatna a om a, in sungah khom thina ai lêng a nit.

²¹Ke rung irî hi ringai rei, thlangam ne sak rang zel nei mang e. Ni ne întuang a nit iti ke râlhein an riat a, an ilôm tak tak a nit. Ni sûn inkung kha ithlun inla; Ke râlhei kha ki tuang lam angkan tuang riseh.

²²An sualna murdi ni makung hong tlung riseh; Ki siatnahei sika kuttum ni ne tho lam angkah hin kuttum tho roh. Ngaisiatin ke rung a, Ki lungril arzal zoi tâk,” a ti a.