Read Biete JEREMIA ṬÂ LÂ 2 Bible Online

JEREMIA ṬÂ LÂ 2 - Biete bible

JEREMIA ṬÂ LÂ 2

¹PUMAPA khan a ningmurin Zion chu izîng ân rikhû tâk a. Israel roinpuina kha rivân ata rinêngah a paih iṭhul a; A ningthik nî-ah khan a Tempil khom a irngil tâk a nit.

²PUMAPA khan Judai ram khuahei murdi kha lungkhamna boi riai kan ân rimang zoi a, A ningthikin an kulpui idethei kha a kâi isim a. A ram neh a ruaituhei kha ân tlôm tâk a.

³A ningthikin Israel râtna murdi chu a tukisat a; Irâlhei an hong lâiah khan eimani ne san nuam mak a. Meichok a vêl kâng infâitu angkan Jakobhei chungah a ningthik chu a chok suak a.

⁴Irâl angkan ei tiang a phel a tin a, Ei lômna neh ei fânna ngaihei murdi kha a that a. A nit, Jerusalemah hin mei angkan a ningthikna ai bun a nit.

⁵Irâl angkan PUMAPA khan Israelhei ân rimang zoi tâk a, A rêng in roinpui murdi neh a kulpuihei kha isehchit kan a mâk a, Juda mipuihei chungah khan ngaisiatna mongtik nei ino kha a îthlun tâk a nit.

⁶Tempil, amah chubai ûnna ngai mun kha â sim isiat pêk a, PUMAPA khan Ziona inkhômpui hunbi neihei neh sabatnîhei kha ân mong a. Rêng neh thiampuhei khan a ningthik rihu kha an tuang korong a.

⁷PUMAPA khan a mâichâm a nôl a, A mun rithiang kha a mâk tâk a. A in roinpui rikulhei kha irâlhei kutah a pêk tâk a. Ruaiṭhe nî angkah dôran PUMAPA inah khan an iuai dur dur a.

⁸PUMAPA khan Zion kulpuihei kha isim a tum ngit tâk a; Isehchit riai a nit ngêtna rangin arkhî diam a. Râlrungbûkhei neh kulpuihei kha atûn chu ai chim riai tâk a nit.

⁹A kul dâikothei kha rinêngah nimnok kârah arphûm zoi tâk a, A thîr dâikalhei kha a kiak bong rem rum a. Rêng neh ruaituhei khah ram dangah bôiin an om tâk a. Dân lak chu inrisei ni khâi mak a, Zânthlahei lakin PUMAPA ata inlârna zel mu khâi mak a.

¹⁰Jerusalema kho ulianhei kha ṭong loiin nuaiah an iṭhung a, An luah rivut an phul a, borapuan an sil a. Jerusalem nungâkhei kha lingisikin an ibok a.

¹¹Ki ṭapnan ki mit â vung zoi a; Ki sungril khom a buai zoi tâk. Ki mihei inrimanga an omnaah ngaisiatin ki irzal zoi tâk a nit. Naipanghei neh rinu nêklâihei kha khopui kotsuaheiah khan rizalin an itâl ṭian tâk a.

¹²Vonṭâm neh tuirihâlin an nuhei makungah an ṭap a, Kotsuaheia popliam ituang angkan an ilîr a, An nuhei iṭâng chungah an rang a chat a.

¹³O Jerusalem, ki lungthlung Jerusalem, Im ki ti rang tâk na! Ingkan im thlangam nang ki sak rang tâk o? Hingka hin chu tutên la tuang ngai mak. Ni chunga siatna tlung hi tuikhanglian angkan a lian a, Tûm nang indam thei rang tâk na?

¹⁴Ni zânthlahei lakin milak ti no nang iril rang nei mak a, Ner let theina rangin ni siatnahei inlang mak a. Inlârna an imuhei kha thil chanlamboi neh rilêmna korong a nit a.

¹⁵Lampuia fe rilong murdi khan an kuthei nang an inṭâk a. Jerusalem siatchitna chungah hin an inui a, an lu an ithing a. “Hi Khopui hih na khopui en ihoi tak, Amahih na rammual pumpui isongtak chu,” an ti a.

¹⁶Ne râlhei murdîn nang an phengsan a, Theimâk takkan nang an en a. An ner an phen a, an rikam an irôt a, “Ei isiat chit tâk; Hi nikhua hih ei ithlîr ngai kha a nit, ei mu tak e,” an ti a.

¹⁷PUMAPA khan a thil tum kha a tho zoi a: Tiana a înkung angkan lungkhamna boi viat kan a ne siat tâk. Ei irâlhei kha ei chungah nêna a pêk a, Ei ilîrnaah lômna a pêk tâk.

¹⁸O Jerusalem, ni kulpuihei ngêi kha Rêngpa ziangah ṭap suak riseh. Ni mitrithli chu vadung angkan a sûn a zânin luang ngûi ngûi riseh. Ni ngaisiatna neh ṭapnaah khan isôl neng kan om roh.

¹⁹Zântluanin PUMAPA zianga ṭap suak rangin voi izâkah thoi roh; PUMAPA makungah khan ni lungril kha tui angkan bun suak inla, Kotsua tina vonṭâma danginda ni nainetehei ringna ranga khan, Ama tiang ni kuthei iphar ngên roh.

²⁰O PUMAPA, dengthei ni întuanghei hi en ta. Nupanghein an irila râ, an nai lungthlunghei sa kha an ifâk rang im ai nit? Thiampuhei neh zânthlahei kha Tempil zelah khan ithatin an iom rang im ai nit tâk?

²¹Vânglâi neh itarhei kha kotsuaheiah khan an thi a, Nungâkhei neh tlangvâlhei kha irâlhei khandaiin an ithi tâk a nit. Nangman ni ningthik nî-ah khan lungkhamna boi viat kan ner vât that riai a.

²²Ruaiṭhepui nî angkan ke râlhei kha kil tin ata ni koi a, PUMAPA, ni ningthik nî-ah khan tute â zôk thei zel omak. Ki naihei, ki lungthlung, kî don inlianhei kha ke râlhein an inrimang zoi tâk a.