Read Biete JEREMIA ṬÂ LÂ 3 Bible Online

JEREMIA ṬÂ LÂ 3 - Biete bible

JEREMIA ṬÂ LÂ 3

¹A ningthikna rola kuttum ituangtu ki nit.

²Izîng richel chitna tiangah khan a ne ûm inlat tîr tîr a, ivâr zel omak a,

³Sûntluanin ki chungah a kut a tlâk mai a.

⁴Ki taksa neh vun hei â potthlêr a, Ki ruhei â khiak a.

⁵Inkhôkna neh dengtheina dâipui sungah a ne khum khap a.

⁶Lei ithi tâkhei angkan mun zîng richel chitah a nen om a.

⁷Zingzirin a ne khuap a, Zôk thei tlak ino ranga tâng ki nit.

⁸Ne san rangin ke khêk a, Khannisela, PUMAPA khan ner ngai pêk nuam khâi mak.

⁹Ki lôn pumin hong rino ker no a; Ker hêlna tiang tiang pial bang arsung khap a.

¹⁰Ivom angkan a ne ruang ṭian a; Sakeibaknei angkan a ne bô a.

¹¹Lampui ata a ner zûl inpêt a, A ne sânphor a, a ne mâk rak tâk a.

¹²A phel a sân a, a thalah khan a ne tin a.

¹³A thal kha ki takpumah a kâp lût khap a.

¹⁴Mihei khan sûntluanin an ne nui a, An ta ranga nuizabûr ki nit tâk.

¹⁵Ki rôlah thil ikhâ tak tui a thun a, Thil ikhâ ringotin a ne însip tâk a nit.

¹⁶Ki mâi rinêngah a ne tât pêk a, Lungin ki hâhei a nen thlam pêk a.

¹⁷Damna hei, thlangamna hei, râifânna hei hi im ai nit khom reh khâi mang e.

¹⁸Ki roinpuina om khâi mak, PUMAPA chunga ki tûngna khom a boi zoi tak a.

¹⁹Ki tuangna neh ke vâina, Ireh suak hi tûr ikhâ tak a nit.

²⁰Khahei kha ki ngaitua mai a, Ker thla khom ki sungah hin ai buai a nit.

²¹Nikhomsela, hi thil khatkah hih ki riat suakin tûngna a nen nei nôk ngai a:

²²Inrimanga ei iom ino hih PUMAPA lungkhamna a nit, A lungkhamlianna kha kang ngai mak.

²³A thar mai ngai zîng tinin, a iamomna chu a roinpui e.

²⁴PUMAPA hi ki neisun a nit a, Ama chungah ki tûngna ki irngat a nit.

²⁵PUMAPA chu ama chunga iamna ringattuhei rangin a ṭhat a, Ama zongtuhei chung ngêiah khan.

²⁶Khasikin, PUMAPA saninringna ngâk ngêi ngêi hi â ṭha a nit.

²⁷Mi a vânglâia ringkol ribât chu ai ṭhat a nit.

²⁸Tuang lâiin chu khât banga ṭhung a, idâirek rang a nit.

²⁹Ribeiriamka khûn rang a nit, Tûngna a la om duai khom a nit thei.

³⁰Mualphoina neh kuttum tuang khomin ipom riam rang a nit.

³¹PUMAPA chu lungkhamnaa sip a nit a, Kumkhuakan ne pai thal no nih.

³²Ngaisiatna ne thlun pêk ngai khom sela, Ei chunga a lungkhamna chu a detin ai natinsat a nit.

³³Miriam naihei deng inthei neh ngaisiat isak hi a nuamlam ni mak e.

³⁴Rinênga mi tânghei murdi sirdea an omin;

³⁵Ân chungtak mitmua mi â dikna inôl pêka a omin;

³⁶Roirêl munah thudik ihenga a omin; PUMAPA khan ai mu riai a nit.

³⁷Tiklâi khomin PUMAPA lungdo bang kha â thleng thal ngai a nit.

³⁸Thil iṭha neh ṭha no hi Ân chungtaka thupêka tlung a nit.

³⁹Ei dam sungah hin ei sual sika kuttum ei tuangin riphun rang ei nit im a?

⁴⁰Ei lampuihei sût nôk ei ta, PUMAPA ziangah lei kîr nôk ta rei.

⁴¹Ei lungrilhei kha rivân Pathian tiang iongin ṭongṭai ei ta:

⁴²“Kin isual a, kin rihel tâk a, O PUMAPA nangman ni ne îzâ no a nit.

⁴³Ni ner zûl a, ni ne that a; Ni ningthikna khan ni lungkhamna kha arkhû zoi tâk a,

⁴⁴Ningthikna sûmpui isâ tak sikah khan, Kin ṭongṭaina ni ziang ai tlung thei ino a nit.

⁴⁵Nam tin lâiah hin porche neh nimnokin ni ne siam tâk a.

⁴⁶Kin irâlhei murdi khan an ne phengsan a, an ne musit a.

⁴⁷Ṭina neh inrîtin a ne zâp a, Siatna neh rimangna a hong tlung a.

⁴⁸Ki mihei rimangna sikin ki mitrithli chu vadung tui angkan a luang tâk a.

⁴⁹Ki mitrithli chu mong loi chât loiin a luang ngûi ngûi a,

⁵⁰PUMAPA khan rivân ata a ne zuk en a, a ne mu mâkah kha chu.

⁵¹Ki Khopuia nupanghei chunga thil itlung kha ki mun, Ki lungril ngaisiat a sak a.

⁵²Irâlhei khan a bi om viat loiin iva angkan an nen ôk a.

⁵³Ke ringin khurah an ne paih a, Lungin an sîng khap a.

⁵⁴Tuiin a ne chîm rikhum a, Kî thi ngêt rang tâk a nit, ki ti a.

⁵⁵Khur inthûk tak monga rithokin, O PUMAPA, nang ke sam a.

⁵⁶Ki ṭapna ner ngai pêk ranga ki ngên lâiin ki rôl kha ni riat a.

⁵⁷Nangman ni ne sâm a, ṭi loi rangin ni ne ti a.

⁵⁸O Rêngpa ne saninzôk rangin ni zuang a, Ki ringna nen zôk tâk a.

⁵⁹O PUMAPA, ki chunga thil dik ino tlunghei hi ni mu a, Ki thu hi ne rêl pêk roh.

⁶⁰Ke râlhei ne nel tlia neh an ne phiarrûk tlia kha ni mu riai a.

⁶¹O PUMAPA an ne sîrinsiatna neh an thu phanhei murdi kha ni riat a.

⁶²Sûn thluanin an ne sîr inpor a, chanlamboi an phan a.

⁶³En ta, an iṭhung lâi neh an iding lâi khomin an bâi rihângna ki nit.

⁶⁴O PUMAPA an sintho angkah takin thung roh.

⁶⁵Vâni sâm inla, beidongnan insip roh.

⁶⁶Ningthikin ûm rizûl inla, vân nuai ata inrimang roh.”