Read Biete JEREMIA ṬÂ LÂ 4 Bible Online

JEREMIA ṬÂ LÂ 4 - Biete bible

JEREMIA ṬÂ LÂ 4

¹Kin rângkachak ritle kha a nûm zoi tâk a, Tempila lunghei kha kotsuaheiah chekindarin a om tâk.

²Zion tlangvâlhei kha kin ta rangin chu rângkachak angkah dôra lu an nit a, Khannisela, atûn chu ipilbêl angkah paia be an nit tâk.

³Sihalhei ilua manin an tehei kha rinu innen an don a; Khannisela, ki mihei chu ramchâra varingsei, Nunisehtakhei angkan an naihei chungah an iom a nit.

⁴Rinu nêklâi naitehei vonṭâm tuihâlin an om a; An naihei khan bu an ngên a, peh nuam mak a.

⁵Fâk iṭha fah ngaihei kha kotsuaheiah ṭâmsôlin an thi a, Silbom iṭha sila seilianhei khan ifah rua zongin nimnok bukhei an chên a.

⁶Pathian kut ata voikazela ṭul rimanga om Sodom khua omhei nêkan khom, Ki mihei kuttum tuang hi ai natinsat a nit.

⁷Kin rêng naihei kha ivur angkana vâr, Dût angkana ngoi ual an nit a; An taksa chu rubi angkana khir, Safir lung angkana nâm an nit ngai a.

⁸Atûn chu an mâihei kha meihol nêkan khom a mûk ual a, Kotsuaheiah khan iria ni khâi mak; An vun kha an ruheiah khan a kop ringot a, thingbong angkan an ichâr a nit.

⁹Râltuk buala thihei kha vonṭâm dangindaa thihei nêkan chu an vân ai ṭhat ual a nit.

¹⁰Ki mihei chunga siatna tlung hi rikhêl inrît tak a nit; Lungkhamna sip nupanghei khan an naihei ngêi khom kha bua rin rangin an suang a.

¹¹PUMAPA khan a ningthik inrît kha a bun suak a, Zionah khan a ningthik mei ân chok a, a lungphûmhei tena a kângrivâm a.

¹²Nuaia rênghei neh rammuala om murdihein, Rûntu irâlhei kha Jerusalem khua lût thei an ti iti, tutên iam ngai mak.

¹³Khannisela, a zânthlahei isual sik neh a thiampuhei pualoina sikin, A nit, a sunga mi fel thisen an isuana sikin khahei khah ai tlung a nit.

¹⁴A ruaituhei kha mitdelhei angkan kotsuaheiah an rivâk vêl a; An silbom thisen a kop rai sikin tutên an itôn thei ino a nit.

¹⁵Mipuihei khan, “Ro rei, rithiang ino hei. Ne tôn no rei,” itin an ikhêk a. Khanchu, nam tin lâiah lêng ivâi an hong nit tâk a, Tute lakin an ziangah lei in-om nuam mak a.

¹⁶PUMAPA ngêi khan uksak khâi mak a, â thekindar a. Thiampuhei neh ruaituhei kha ditsak khâi mak e.

¹⁷Ṭangpuina tlung ino rang ithlîrin kin mit â vâi zoi tâk, Ne saninzôk thei ino nam kha â tlonga kin ingâk ngit ngit a nit.

¹⁸Irâlhein an ner dîp ṭian a, tualheiah khom kin ilêng thei ino a nit. Kin sûnhei a hek a, kin mongna a tlung tâk.

¹⁹Vânlâizôl ata mupui îtika bô rang nêkan ner zûltuhei kha an rât ual a; Itlângheiah khan an ner zûl a, ramchârheiah an ne ruang a.

²⁰Kin ringna nâr, PUMAPA riak nâl rêng kha an man tâk a, Namhei kârah khom ama zil nuaiah om ei ti, kin lei iti ngaia khah.

²¹Edom mihei neh Uz mihei, nin inui thei lâiah hin inui unla, râifânin lôm rei. Siat rimangna kha nin ziangah khom la hong tlung a ti; Nangni khom korongboia omin izak lar mûng nin ti.

²²Zion khan a sualna loman kha a mu tâk a; PUMAPA khan bôiah nen tâng mai khâi no nih. Khannisela, Edom, PUMAPA khan kuttum nang thông a ta; Ni sualhei kha inlang a ti.