Read Biete JEREMIA ṬÂ LÂ 5 Bible Online

JEREMIA ṬÂ LÂ 5 - Biete bible

JEREMIA ṬÂ LÂ 5

¹O PUMAPA, kin chunga thil itlung hi remai roh. Kin tiang ngat inla, kin mualinphoina hi en ta.

²Kin richon kha nam danghei kutah a om zoi tâk a, Mêlriatloi mihei khan kin inhei an lua tâk.

³Kin pahei kha irâlhein an that riai a, Kin nuhei chu numei an chang zoi tâk.

⁴Kin tui idâi inhei ten khom a man ipe a nang tâk a, Kin thingtuahei khom richo a nang tâk.

⁵Kin ringah ringkol inribâta omin, rizûl tôm kin nit a, Kin sôl tak taka khan ringamna zel mu mang ung e.

⁶Nuk rizoma ifâk muna rangin, Aiguptahei neh Asuriahei ziangah kut kin do a.

⁷Kin chibulhei kha an lei isual a, Khan anni kha om khâi mak a, An sualnahei sikin kin ituang a nit.

⁸Suakhei kha kin chungah an inlal a; An kut ata ne sanisua rang tute omak e.

⁹Suam mihei lak kha mual tinah an rivâk vêl a, Kin ringna phalin ifah ruahei kin izong ngai a nit.

¹⁰Kin chungpanghei kha lungthu angkah dôran a lum a, Ṭâmna khan a ne înnat tak tak a nit.

¹¹Kin nupuihei kha Zion tlâng zelah khan zâlrâtin an siatpui a, Nungâkhei khom khah Juda khopui tinah khan an întlôm a nit.

¹²Kin ruaituhei kha an ṭhui a, an ikhâi a; Kin patarhei lak khom marit tho mak a.

¹³Kin tlangvâlhei kha suakhei angkan bu an innôi a, Naipanghei lak thing têl iriktak idelin hong pêm an pêm a.

¹⁴Patarhei kha kul kotbâia iṭhung khâi mak a, Vânglâihei khan irîhoi itum an bâng zoi tâk a.

¹⁵Kin lungril râifânna a ṭuai tâk; Kin lâmna ngai kha lusûn angkah a chang tâk.

¹⁶Kin lu ata rênglukhum a tlâk tâk; Kin isual tâk sikin kin chung a înkhôk tâk a nit.

¹⁷Kin lungrilhei dam thei mak a; Mitrithli ne zîm sikin kin mithei a zîng tâk.

¹⁸Zion tlâng kha inramin a om tâk a; A sungah sihalhei an lêng tâk.

¹⁹O PUMAPA, nang chu kumkhuaka rêng ni nit a, Kumkhuantluangkan inlal mai ni ti.

²⁰Îtho sik im khaten tena sôt ni ne imâk rak; Ni ne iriat mâi nôk tlak khâi ino rang mani?

²¹Ni tiang nen ngat nôk roh, O PUMAPA, ni tiang nen ngat nôk roh. Tianlâi angkan kin roinpuina inthar nôk roh.

²²A nitnon teh, nangman ni ne ipai thal rang tâk mani? Kin chungah ni ningthik ai chok thuar mai rang mani?