Read Biete EZEKIELA 1 Bible Online

EZEKIELA 1 - Biete bible

EZEKIELA 1

¹Kum sômithum kum, thla lina a sûn ringanî-ah khan keimah thiampu Ezekiela, Buzia naipa chu Babilon rama Kebar vadung kôlah Juda, bôia tânghei lâiah ki om a. Kha lâiah khan rivân ar-ong a, Pathian inlârna ki mu a.

²Rêng Jehoiakina bôia â tâng ata a kum ringa tlukna nî tak a nit.

³Kha mun Babilon rama Kebar vadung kôlah khan PUMAPA thu ki ziangah a zuang tlung a, PUMAPA kut tharât chu ki chungah a fûk tâk a.

⁴Ki hang en a, mâr tianga rithokin thlipui a hong rithok ki mu a. Sûm iduk ngutah khan khothlâr arlek zup zup a, a kôlvêl rivân khah a el zup zup a. Khothlâr rilekna munah khan dâr ritle angkana ritle a om a.

⁵Thlipui inlâina takah khan thiliring, miriam i-ang hi, ilikah an hong suak ki mu a.

⁶An sikah mâi ilikah neh rithla ilikah an nei chit a.

⁷An kehei chu a tlûn dak a, an keṭim chu sial ke angkan ketin an nei a, dâr inôt inritle angkah an nit.

⁸An mâi ilikah neh an rithla ilikah banah khan, miriam kut ilikah chit an nei a, kut khatkah kha rithla khatkah nuai chitah a om a.

⁹An rithla kha ritôn chakka pharin kil ilika neiin an iding rikual a, an lôn khomin rihêl nang loiin mahni maton chitah an lôn a.

¹⁰An mêl ilang dân chu hingka hin a nit: Matiang miriam mêl an riput a, changtiang sakeibaknei mêl, voitiang serâtchal mêl, nungtiang mupui mêl an irput a nit.

¹¹An rithla inikah chit ritôn phâkin an phar a, an rithla dang inikah khan an taksa an rikhû a.

¹²Kil ilikah an en thei chit a; kha sikah khan rihêl nang loiin a lômin an nuamna tiang tiang an ife thei a nit.

¹³Thiliringhei chu meiser chok ivâr tak angkah hi an nit a. Thiliring ilikahei kârah khan khothlâr arlek zup zup a, mei angkan a vâr pum a, meia rithokah khan khothlâr kha a hong irlek suak a nit.

¹⁴Thiliringhei khah khothlâr angkana râtin nungtiang matiang an rilong diai a.

¹⁵Thiliring ilikahei kha ki en mai lâiah khan, an kôl chitah tâli ke ilikah, rinênga ringat ki mu a.

¹⁶Tâli ke ilikahei chu beril lung ilu angkana ritle, ar-ang nat a nit a; a ke chêng sunga ke dang iom angkah hi a nit.

¹⁷Khasik takah khan an ikûi khomin rihêl nang loiin kil tin an ipan thei a nit.

¹⁸Tâli ke chêng rikual môr chu a chêng vung a, sunrikal a om fur a, arkual sung chu mita sip an nit.

¹⁹Thiliringhei fena kipah tâli kehei khom an fe a, rinênga rithokin thiliringhei kha an rikângin chu anni khom an rikâng ngai a.

²⁰Thiliringhei khah an nuamna tiang tiang an fe a, tâli kehei khom khan an izui mai a nit. Thiliringhei thu thua om an nit.

²¹Khangkan thiliringhei fena takah an fe a, an ringamna takah an ringam a, rivân tiang an rikângin tâli kehei khom an rikâng a. Thiliringhei thu thun an iom a nit.

²²Thiliringhei lu chungah khan thil rikhupdûr [1] hi a om a, krustal lung angkana ri-el pum a nit.

²³Kha thil rikhupdûr nuaiah khan thiliringhei kha an ngîr a, an rithla inikah chit ritôn phâk chakin an phar a, an rithla dang inikah khan an taksa an rikhû a.

²⁴An hang vuangin chu an rithla zâp irî khah tuikhanglian risok irî angkana natinsat, sipai lômpui rihu angkana rihu lian, Tinrêngthothei Pathian rôl irî angkana rî vung vung hi ki riat a. An ringamin chu an rithlahei kha an inri-ûm a.

²⁵Khanniseh, an rithla an phar khâi no nung khomin an lu chunga thil rikhupdûra rithokin a la rî vung vung mai a.

²⁶Thil rikhupdûr chungah khan safir lunga siam rêngṭhungmun i-ang hih a om a, rêngṭhungmunah khan miriam i-ang hih â ṭhung a.

²⁷Kha miriam i-ang khah a kong chungtiang chu dâr meia hâl iling ritle angkah taka ritle a nit a, a nuaitiang khom kha mei angkana vâr a nit a, a kôlvêl chu a vâr pum a.

²⁸A vêlkan ivâr kha sumrisâng rizâm angkah hi a nit. Hingka hih a nit PUMAPA roinpuina vâr ri-el ilang dân chu a nit. Amakhah ki hang mun chu rinêngah ke bok a; khanungchu, ne sôntu rôl kha ki riat tâk a.