Read Biete EZEKIELA 10 Bible Online

EZEKIELA 10 - Biete bible

EZEKIELA 10

¹Khante, ki hang en a, Cherubhei chunga rikhupdûrah khan safir lunga siam rêngṭhungmun i-ang hih ki mu a.

²Pathian khan puan rivuai riphân isiltu khah â sôn a, “Cherub nuaia tâli kehei kârah son fen la, mei ri-al so ni kutin va sôk inla, khopui chungah ithekindar roh,” a ti a. A fe khah ki mit ken zui mai a.

³Ani khah a va lûtin chu Cherubhei khah Tempil sung sim tiangah khan an lei iding a, insung chu sûmin a sip khap a.

⁴PUMAPA ompuina vâr ri-el khah Cherubheia rithoka rikiangin Tempil kot mâi tiang arthon a. Tempil chu sûmin a sip khap a, a tualah khan PUMAPA ompuina vâr ri-el khah a vâr pum a.

⁵Cherubhei rithla zâp irî chu pên ita ual thapuka rithok khomin ireh thei a nit a, Tinrêngthothei Pathian [5] rôl irî angkah a nit.

⁶Cherubhei nuaia om tâli ke rikualhei kâra mei kha ilah rangin PUMAPA khan puan rivuai riphân isiltu khah thu a pêkin chu ani khah a fe a, tâli ke khatka kôlah khan a va ding tâk a.

⁷Cherub khatkah khan Cherubhei nuaia mei kha a lâk a, puan rivuai riphân isiltu khah a pêk a. Puan rivuai riphân isiltu khan mei ri-alhei khah a chôi a, a suakpui tâk a.

⁸Cherubhei khan an rithla nuaiah miriam kut i-ang hih an nei chit a.

⁹Ki hang enin chu tâli ke ilikah, an rêngka ri-angnat, Cherub khatka kôlah khatkah chit a om a; tâli kehei chu beril [6] lungmantam angkana ri-el hi a nit a, tâli ke chêng sungah ke chêng dang iom angkah hi a nit.

¹¹Cherubhei an lônin chu rihêl nang loiin kil tinah an ikûi thei a. Ife ranga an nuamna tiang takah khan rihêl nang loiin an fe tiat thei a nit.

¹²An pumkan, an taksaheiah, an iruangheiah, an kutheiah, an rithlaheiah neh tâli ke chêngheiah khom mit a sip khap a.

¹³Tâli kehei chu, “Ikûi duai duai,” an tin ki riat.

¹⁴Thiliringhei khan mêl ilikah chit an nei a, â khatna khan serâtchal mêl arput a, â nikna khan miriam mêl arput a, â thumna khan sakeibaknei mêl arput a, â lina khan mupui mêl a irput a nit.

¹⁵Anni khah Kebar vadung rikama thiliring kî muhei ngir khah an nit. Cherubhei khah an vuangin neh

¹⁶an chângin chu tâli kehei khom khah anni lômah khan an ikûi sa mai ngai a. Cherubhei an vuang khomin anni khomin an izui thal ngai a nit.

¹⁷Cherubhei an idingin chu tâli kehei khom an iding a; Cherubhei an vuangin chu tâli kehei khom khah an rikâng sa a, Cherubhei thu thun an iom a nit.

¹⁸PUMAPA ompuina vâr ri-el khan Tempil lûtna kha a mâk a, Cherubhei chungah khan arthon a.

¹⁹Ki en mai lâiin Cherubhei kha an rithlahei an phar a, rinênga rithokin an vuang a, tâli kehei khom khan an zui sa mai a. Sak tianga Tempil kotbâiah khan an ringam a, an chungah khan PUMAPA ompuina vâr ri-el khah a om a.

²⁰Anni khah Kebar vadung rikama Israelhei Pathian nuaia thiliring kî muhei chia khah an nit iti ken fel thei a.

²¹Mêl ilikah neh rithla ilikah an nei chit a, an rithla nuai chitah khan miriam kut i-ang an nei sa a.

²²An mêlhei khom kha Kebar vadung rikama kî muhei angkah chia khah a nit a, an fena tinah an imatiang korong ai nit zit thei a nit.