Read Biete EZEKIELA 11 Bible Online

EZEKIELA 11 - Biete bible

EZEKIELA 11

¹Pathian rithla khan a ne dom a, nisua tianga Tempil dâikotah khan a ne ṭhui a, dâikot bulah khan mi sôminikah ringakah an lei om a, an lâiah khan nam ruaitu Azura naipa Jaazania neh Benaia naipa Pelatia hei an om sa a.

²Pathian khan ki ziangah, “Famthei miriam, hi mihei hih an nit, thil isual ingaitua suak a, khuaa mihei chanlamboia thor ngaihei chu an nit.

³Anni khan, ‘In sin zoro la ni tak mak, [7] khopui hi sabêl angkah a nit a, eimani hih sa angkah ei nit; khan khom khopui hin mei ata chu a ne înzôk a nit,’ an ti a.

⁴Khasikin, famthei miriam, anmani sêlin thu inpuang roh,” a ti a.

⁵PUMAPA rithla kha ki chungah a zuang tlung a, PUMAPA khan hi thu hih mipuihei iril rangin a ne be a, “Israel mihei o, nin thu sîrhei khah ki riat a, nin thil tho tumhei khom kî riat a nit.

⁶Hi khopui sungah hin mi nin that mai a, tolâidunghei khom mithi ruakin ai sip zoi tâk a nit.

⁷“Khasikin, Keimah, Pumapa PATHIAN hin amahih nin zianga kî ti chu a nit. Hi khopui hih sabêl chu a nit ngêt a, khateh a sa khah im ai nit? Tolâidunga nin mi thathei ruakhei hih a sa chu a nit hih. Nangni chu hin om no tin u, khopuia rithokin nangni kî ûmrizûl ngêt rang a nit.

⁸Khandai chu nin ṭi ti rei na? Nin iṭi tak khandai kha nin chungah ki hong îthlun rang a nit.

⁹Khopuia rithokin nangni ûmisua ki ta, ram dang mihei kutah nangni pêng ki ti. Kuttum nangni thông ki ta, khandaia sât that nîng nin ti.

¹⁰Nin ramrî sung ngêiah risualbualah ithatin nin iom rang a nit. Khanchu, mi tinin PUMAPA chu ki nit iti reh tâng an ti.

¹¹Sabêl sunga sa ai hoi ngai angkah hin chu hi khopui hin nangni hoi thei no nih. Israel ram sungah takmun khomah om rei, kuttum nangni kî tho rang a nit.

¹²Ki thupêkhei nin ikhiak a, ki dânhei zôm nuam mak chei a. Nin kôlvêla nam danghei dân khah nin ilâk ual tâk a nit,” a ti a.

¹³Kha thu khah ke sîr lâiin Benaia naipa Pelatia chu â lîr a, a thi zel tâk a. Khanchu, ke bok a, iring takkan, “O Pumapa PATHIAN, Israel rama a la om isunhei hih ni înrimang riai rang mani?” ki ti a.

¹⁴PUMAPA thu ki ziangah a zuang tlung a,

¹⁵“Famthei miriam, Jerusalema mihei khan nangmah neh ni chipui bôia tâng Israelhei chungchâng thu an isîr a, ‘Bôia tânghei chu PUMAPA chubai iûn rangin chu an ilat rai tâk a nit. Ram chu eimani dongtumin a ne ipêk tâk a nit hih,’ an ti vêl a.

¹⁶“Atûnah hin ne tângpuihei ziangah ki thu sîr hih iril roh. Keimah hi ki nit, ilah taka nam dang lâia â tir a, ram tina â chekindartu chu ki nit. Khan khoma an rithek indarna ramah khan an ziangah kî om mai rang a nit.

¹⁷“Khasikin, keimah Pumapa PATHIAN thu sîr hih anni chu iril roh. Anni chu ke chekindarna ramheia rithokin ṭhui bûm nôk ki ta, Israel ram chu an ziangah kî pêk nôk rang a nit.

¹⁸An hong kîr nôk tenan chu thil inimhei neh mirmil porinchehei hih an ipai vang rang a nit.

¹⁹Lungril ithar neh ngaituana thar anni chu pêng ki ta, an lungril chiklung angkana khir chu khâi pai pêk ki ta, thu zôm nuamna lungril rivuai pêng ki ti.

²⁰Khanchu, ki dânhei vong an ta, ki thupêkhei chu iamom takkan zôm an ti. Ki mihei nîng an ta, an Pathian nîng ki ti.

²¹Khanniseh, hi mirmil porinche neh nel iom tak tak chubai iûn inuam maihei chu kuttum thông ki ti. An sintho lam angkah takin anni chu kuttum kî tho rang a nit.” Tinrêngthothei PUMAPA khan ai ti tâk a nit.

²²Thiliringhei kha an vuang a, tâli kehei khom khan an zui a. An chungah khan PUMAPA ompuina vâr ri-el khah a om a.

²³Khanungchu, PUMAPA ompuina vâr ri-el khan Jerusalem khah a mâk a, khopui sak tiang itlângah khan â ding tâk a.

²⁴Kei khom inlârnaah khan Pathian rithla khan a ne dom a, bôia tânghei ziangah Babilon ramah a ne hong ṭhui nôk tâk a. Khanchu, inlârna kî mu khah arkiang tâk a.

²⁵PUMAPA thil nen mu murdi khah bôia tânghei ke ril tâk a.