Read Biete EZEKIELA 12 Bible Online

EZEKIELA 12 - Biete bible

EZEKIELA 12

¹PUMAPA khan a ne sôn a, ki ziangah,

²“Famthei miriam, rihel irât mihei lâia lêng ni nit hih. Mit an neia chu îte mu thei mak a; ikuar an neia chu îte reh thei mak, rihel bang an inuam a nit.

³Khasikin, atûnah hin, famthei miriam, bôia tânghei tho ngai lam angkan ni puak siam inla, zân zîng ma ngêiin rithok suak roh. Mi tinin ner thok lâi neh mun dang tiang ipana ni fe lâi khah nang mu seng riseh. Rihel irât mi an nit tliahei an ririat suak duai thei khom a nit.

⁴Nang an mu ngêt rangin sûn lâiah bôia tâng rang angkan ni puak siam inla, kholoiah bôia tâng rang angkana ni suak lâi kha mu ngêt riseh.

⁵An mu chung ngêiah khan ni inbang kha ṭhet inla; amakhan ni puak kêl inla, rithok suak roh.

⁶An mu chung ngêiah ni puak kha riput inla, ni fena rang lampui ni mu thei nona rangin ni mit tuam inla, zân zîng muakin rithok suak roh. Israel mihei rangin ni thil tho hih an tong rang inriatna risin nîng a ti,” a ti a.

⁷PUMAPA thupêk lam angkah takin ki tho a. Sûnah bôia tâng puak siam ngai lamin puak ki siam a, kholoiah, zân zîng muakin chu ki kutin bang kha ken rikua a, ki fe suak tâk a. Mi tinin an ne thlîr fut lâiin ki puak kha ki dârah ker put a, ker thok tâk a.

⁸Atûk zîngah chu PUMAPA khan a ne sôn a,

⁹“Famthei miriam, atûnah hin rihel irât Israel mihei khan, ‘Im nî tho?’ itia nang an ridonin chu,

¹⁰an ziangah hingka hin ti roh: ‘Tinrêngthothei PUMAPA khan hingka hin a ti: Hi thu hih Jerusalema roirêltu neh khuaa om murdihei ta rang piala a nit.

¹¹Nin ta rangin risinsiana ki nit hih, ki tho lam angkah takin nin chungah thông an ta; bôia tâng rangin nangni man an ti,’ itin.

¹²Nin ruaitu chu a puak a dârah riputin a suakna ranga bang an îphep pêkah khan zânah lâizâm thông a ti. A fena rang lampui a mu thei nona rangin a mâi rikhû khap a ti.

¹³Khannisela, a ta rangin ki lên kha zar ki ta, ani chu in-ôk ki ti. Khanungchu, Babilon khopuiah ṭhui ki ta, kha khua khah a mitin chu mu no nia; nikhomsela, kha khopuiah khan ai thi rang a nit.

¹⁴Ama roirisâipuihei, a roisaktuhei neh ama rungtuhei chu kil tinah ichekindar ki ta, khandaiin rizûl thal ki ti.

¹⁵“Ram dang, nam danghei lâiah anni kha ke chekindar tikin chu PUMAPA chu ki nit ngêt iti reh tâng an ti.

¹⁶Khandaihei, iṭâmhei, ripuiheia â thi bân mi iroichekah kî zua rang a nit. Khanchu, nam danghei lâiah khan thil porinche tak tak an lei itho ngaihei khah reh suak an ta, PUMAPA chu ki nit iti reh tâng an ti,” a ti a.

¹⁷PUMAPA khan a ne sôn a,

¹⁸“Famthei miriam, inthing pumin bu ni nêk rang a nit a, rilônthing risoinat pumin tui ni in rang a nit.

¹⁹Ram sunga mihei chu an ram sunga la om Jerusalema mihei zianga Pumapa PATHIAN thucha chu amahih a nit itin iril roh: ‘Rilônthing pumin fâk zong an ta, rithlavâi pumin tui in an ti. An ram sunga omhei an nun a siat tak tak a, an ram chu inram vang nîng a ti,’ ti roh.

²⁰Atûna miriam bitna khopuihei chu isehchitin om a ta, ram chu inram vangin om a ti. Khatikin chu PUMAPA chu ki nit iti an iriat rang tâk a nit,” a ti a.

²¹PUMAPA khan a ne sôn a,

²²“Famthei miriam, Israel mihein, ‘Zoro a fe ok tâk a, rillôknahei chu â tlung zel omak,’ îtho ranga an iti ṭian ṭian mani?

²³Atûnah hin Keimah Pumapa PATHIAN hin kha chungchânga ki thu sîr hih anni chu iril roh. Kha ṭong tuallêng inlâr tak nin inei kha inboi ki ta, Israel ram sungah isâmin om nôk khâi no nih. Anni chu iril roh, zoro a hong itlung thiai tâk a nit, inlârnaa thil ilang khah a hong itlung zel rang tâk a nit.

²⁴“Israel mihei lâiah inlârna lem neh rillôkna dik ino om khâi no nih.

²⁵Keimah, Pumapa PATHIAN ngêiin anni chu isôn ki ta, kî ti murdi chu ilen nîng a ti. Rivuak khâi no nih. O Israel rihel irâthei, ki thu sîr hih nin dam sung ngeiin ilen nîng a ti,” itin Tinrêngthothei PUMAPA khan a ti.

²⁶PUMAPA khan ki ziangah,

²⁷“Famthei miriam, Israelhein inlârna nî muhei neh ni thu rillôkhei kha sûn maton ilah taka thil la tlung rang angkan an irngai a nit.

²⁸Khasikin, Keimah, Tinrêngthothei PUMAPA thu sîr hih anni chu iril roh. Rivuak khâi no nih. Ki thu sîr hih ilen zel ai nit rang a nit. Keimah, Pumapa PATHIAN hin kî ti tâk a nit,” a ti a.