Read Biete EZEKIELA 13 Bible Online

EZEKIELA 13 - Biete bible

EZEKIELA 13

¹PUMAPA khan a ne sôn a,

²“Famthei miriam, Israel rama zânthla lem, mahni iphuatot thu inpuang ngaihei idemin thu inpuang roh. PUMAPA thu ringai rangin anni chu iril roh,” a ti a.

³Pumapa PATHIAN khan hingka hin a ti: “Mahni nuam lam ringot neh inlârnaa an imu ni tlak ino thu sîr ngai zânthla invêthei chung chu ân khôk e.

⁴Israel mihei o, nin zânthlahei chu khoram sihalhei angkah taka mangmunboi an nit.

⁵Israelhei kul bang chimna munhei khah rung mak a, a bang siaminṭhat nôk khom an itum ino a nit. Khasikin, PUMAPA nikhuaa ridoina a tlung tikin Israel chu vênginzôkin om thei no nih.

⁶An inlârna muhei kha milak a nit a, an thu rillôkhei khom rilêmna a nit. Ki thucha inpuangtu angkan an ribe a; khanniseh, anni chu ki mi tir ni mak e. An thu inpuang khah â dikin an la iam nôk ngai a.

⁷Anni chu ke ril a: Inlârna nin imuhei khah â dikino a nit a, nin rillôknahei khom kha rilêmna a nit. Ki ṭongbâi suak ngêi nin înpuang angkan nin isîr a; khanniseh, keiman nangni ki îsôn tlak ino a nit,” a ti a.

⁸Khasikin, Pumapa PATHIAN khan an ziangah, “Nin thu sîrhei khah milak thu a nit a, nin inlârna muhei khom khah rilêmna a nit. Nangni kî nel a nit hih.

⁹Nangmani inlârna dikino mu a, mahni iphuatot thu inpuang ngai zânthlahei, kuttum nangni kî tho rang a nit. Ki mihei ribûmnaah khan inṭel no tin u; Israel mihei riming riziakna bu-ah khom nin riming inchuang sa ni no nih. Israel ramah khom kîr nôk tlak khâi no tin u. Khanchu, Pumapa PATHIAN chu ki nit iti reh tâng nin ti.

¹⁰“Thiltinrêng a ṭhat riai itin zânthlahei khan ki mihei an ṭhui insual a, thiltinrêng lak chu â ṭha omak a. Ki mihein kulbang ichimhei khah inîng dûmkan an hang siam titot a; khanungchu, zânthlahei khan chinai an nâl invâr a.

¹¹Khasikin, khangkana kulbang nâl invâr zânthlahei ziangah khan, ‘Ai chim zel rang a nit,’ iti iril roh. Rua sângsari zuang sûr a ta, irial ilian tak takin zuk deng a ta, thlipuiin sêm a ta, ai chim ngêt rang a nit.

¹²Kulbang kha chim a ta; khanchu, mi tinin nin inâl invâr kha im a ṭhatna ai nit itin nangni lar don an ti,” a ti a.

¹³Pumapa PATHIAN khan hingka hin ai ti a nit. “Ki ningthikin phâivosimpui, ruasângsari neh irialhei kha kulbang iseh rangin ki zuk itir rang a nit.

¹⁴Khanchu, kulbang an inâl invâr kha chim a ta, indarchit a ta, a lungphûmhei khom ilang vang a ti. Chim riai a ta, nangni khom nin ithi rang a nit. Khanungchu, PUMAPA ki nit iti mi tinin reh tâng an ti.

¹⁵“Kulbang neh chinai nâl invârtuhei chungah ki ningthik iṭhum ki ta; khanchu, kulbang chu a chim vang tâk a,

¹⁶kha rualin thiltinrêng an ṭhat riai no lâi khom, thiltinrêng ai ṭhat riai a nit itia Jerusalem lungngam isak ngai zânthlahei chu an rimang zoi tâk iti thu nangni ril ki ti,” Tinrêngthothei PUMAPA khan ai ti tâk a nit.

¹⁷PUMAPA khan ki ziangah, “Atûnah hin Famthei miriam, ni mihei lâia om rillôk thu iphuatota inpuang ngai nupanghei tiang ngat roh. Anni chu dem inla,

¹⁸Keimah, Pumapa PATHIAN thu sîr hih anni chu iril roh: Nangmani nupanghei, nin chung ân khôk vang na! Mi danghei nin thunuaiah nin inlêng theina rangin nin ibânah dôi ruihei nin khuap a, mâi rikhû puanhei nin siam pêk ngai a. Marangṭhat izongin ki mihei ringnun chunga thu nei nin itum a nit hih.

¹⁹Barli kutkah neh ibai lekte muna rangin ki mihei maah mualphoi nin ne sak a. Ithi ranga chuk inohei khah nin that a, ithi ngêt ranga chukhei khah nin zua a. Khangkah khan ki mihei ziangah milak nin tho a, nin în-iam ngai a nit,” a ti a.

²⁰Khasikin, Pumapa PATHIAN khan hingka hin ai ti a nit: “Nin bânbun, rikuaibu angkana mi nin ihôpna kha kî nel tak tak a nit. Nin ibâna rithokin ipot ki ta, mi nin în-ôkhei khah inzôk ki ti.

²¹Nin mâi rikhû puanhei khom sânchit ki ta, nin kuta om, ki mihei chu inzôk ki ti. Khanchu, PUMAPA chu ki nit iti reh tâng nin ti.

²²Lungzîng kî sak nuam ino ki mi ṭhahei khah milakin zâmzal nin sak a. Mi sualhei khah an sual rilet a, an ringna inzôk rangin nin îdan ngai a nit.

²³Khasikin, atûnah hin inlârna lem nin imuhei neh nin rillôkna dik inohei nangni ki înringam pêk rang a nit. Ki mihei chu nin kuta rithokin san isua ki ta; khanchu, PUMAPA chu ki nit iti reh tâng nin ti,” a ti a.