Read Biete EZEKIELA 14 Bible Online

EZEKIELA 14 - Biete bible

EZEKIELA 14

¹Israel ruaitu ṭhenkah ki ziangah an hong a, PUMAPA lungdo chu im ai nit iti an ner don a.

²PUMAPA khan ki ziangah,

³“Famthei miriam, hi mihei hin an lungril tak khah mirmil an pêk a, suala ṭhui inlût rangin mirmil ziangah an irphal riam a nit. Khante, khangkana mihei khan an ne hong isôn rang khom hih a nit im a?

⁴“Khasikin, atûnah hin anni chu isôn inla, Keimah, Pumapa PATHIAN hin an zianga ki thu sîr hih iril roh: Israel mi tukhom a lungril mirmil ipe a, suala an ṭhui inlût ranga riphal a, zânthla zianga thu ridon ranga honghei chu, mirmil an nei intam lam angkah takin Keimah, PUMAPA hin inah takkan lei sâm ki ti.

⁵Israel mihei hin an mirmilhei sikin nung an ne song tâk a; nikhomsela, an lungril ken min theina rangin ki lei isâm rang a nit.

⁶“Khasikin, atûnah hin Israel mihei chu Keimah, Pumapa PATHIAN thu sîr hih iril roh. Hong kîr nôk unla, nin mirmil porinchehei chu mah riai rei.

⁷“Israel mihei lâia mi manih, ram dang mi Israel mihei lâia omhei manih nung ne song a, mirmil chubai iûn a; khanungchu, zânthla zianga thu ridon ranga fe chu Keimah, PUMAPA ngêi hin lei sâm ngai ki ti.

⁸Ki lei îsîr tâk angkan ki mihei lâi ata ûm isua pai ki ti. Mihei enrikhîna neh bâi rihângna chang tâng an ti. Khanchu, PUMAPA chu ki nit iti reh tâng an ti.

⁹“Khante, zânthla chu ilêma omin thu â sîrin chu, kha zânthla lêmtu chu Keimah, PUMAPA hi ki nit a, ki kut a chungah ilek ki ta, ani chu ki mi Israelhei lâi ata ûmisua pai ki ti.

¹⁰Zânthla sualna neh a zianga thu hong ridontu sualna khah ar-ang bang a nit, an sual man chu an ituang seng seng rang a nit.

¹¹Khanchu, ki mi Israelhei kha ki ziang ata tlân rimang khâi no nia, mirmil sikin borinnimin om khâi no nia, an siatna sikin porinchen om khâi no nih. Ki mihei ni tâng an ta, Keimah an Pathian nîng ki ti,” Tinrêngthothei PUMAPA khan ai ti tâk a nit.

¹²PUMAPA khan a ne sôn a,

¹³“Famthei miriam, ram khan ki chungah natinsat takkan thil isual tho sela, ki kut ilek ki ta, an fâknêk munah nâr isat pêk ki ta, voniṭâmin miriam neh sahei thîng an ti.

¹⁴Hi mi ṭha ithumkahei Nova, Danela[8] neh Joba hei khah om sa khom sela, an ṭhatna khan anmani ringna bang inzôk an ti. Tinrêngthothei PUMAPA thu suak khan a ti.

¹⁵“Ram sungah sarânghei ki tir a, mi an sê that a, ram sunga mihei an ṭêi indar chit a, sarânghei an ṭi sika inzin ngam loia ki siamin,

¹⁶hi mi ithumkahei hih om sa khom sela, an naihei ilua khom inzôk thei no nih. Anmani ringna mâng mâng chu inzôk thei an ta; khanniseh, ram chu isehchitin om a ti. Keimah, Pumapa PATHIAN hi Pathian iring ki nit,” Tinrêngthothei PUMAPA thu suak khan a ti.

¹⁷“Ram sungah khandai ken lêng a, miriam neh sahei that infâi riai riseh ki ti a khan,

¹⁸hi mi ithumkahei hih om sa khom sela, an naihei ilua khom inzôk thei no nih. Anmani ringna ka mâng mâng chu inzôk thei an ta; khanniseh, ram chu isehchitin om a ti. Keimah, Pumapa PATHIAN hi Pathian iring ki nit,” Tinrêngthothei PUMAPA thu suak khan a ti.

¹⁹“Miriam neh sahei ithat ranga ripui ken lêng a, ki ningthik kha ram chungah ke ṭhumah khan,

²⁰Nova, Danela neh Joba hei om sa khom sela, an naihei ilua khom inzôk thei no nih. An ṭhatna khan anmani ringna bang inzôk a ti. Keimah, Pumapa PATHIAN hi Pathian iring ki nit,” Tinrêngthothei PUMAPA thu suak khan a ti.

²¹Pumapa PATHIAN khan hingka hin ai ti a nit: “Ki kuttum thona inrît tak tak ilikah, khandaihei, iṭâmhei, ripuihei, sarânghei kha miriam neh sahei that inrimang ranga Jerusalemah ki tir tikin chu a înrît tak tak rang a nit.

²²An naihei lâia â thi bân an om a, nin ziangah an hongin chu, an innun dân neh an thil thohei khah mûng nin ta, Jerusalem chunga kuttum kî tho murdi khah itho rang pial a nit hiteh tîng nin ti.

²³Thil kî tho tinrêng khah a san iṭha tak a om sika kî tho a nit iti reh tâng nin ti,” Tinrêngthothei PUMAPA thu suak khan a ti.