Read Biete EZEKIELA 16 Bible Online

EZEKIELA 16 - Biete bible

EZEKIELA 16

²“Famthei miriam, Jerusalem chu a thil porinche tak thohei hih iril roh.

³Tinrêngthothei PUMAPA thu sîr hih Jerusalem chu iril roh. “Nen siangna ram chu Kanan a nit a; ni pa khah Amor mi a nit a, ni nu khah Hit [9] mi a nit.

⁴Ni suaknî-ah khan ne lâirui iâttu nei mak che a, tui inrisil ni mak che a, ichi nâl ni mak che a, puana tuam khom ni mak cheh.

⁵Tute nang ingaisak nuam omak a, lung nang inkhamin tutên nang don mak a. Ni suak leta ne nim ikop ṭiankan tolâidungah imarakin nî om a nit.

⁶“Ki hong thlengah khan ni thisena ni irbual khah nang ki mu a. Mahni thisen ngêia risil zit ni ta khom inla, ithi rangin chu nang phal mang a.

⁷Loisûl ithuar dût angkan nang ken thuar a, ni thuar tûr tûr a, ni mêl khom a hong ṭhat tîr tîr a. Ne ṭânghei a hong rimuam a, ni samhei khom a hong sei ṭhat a; khanniseh, korongboi ni la nit a.

⁸“Ki hong thleng nôkin chu nang ki mu a, idit inei thei dingmunah ni om tâk a; ni korongboi khah ki chungzakuan nang ken hâk a, lung nang rithlungpui rangin ṭong ken kung a. A nit, nangmah neh rineina thuthlung ki siam a, ki ta ni hong nit tâk a,” Tinrêngthothei PUMAPA thu suak khan a ti.

⁹“Khanungchu, tui ki lâk a, ni thisen ikop khah ker sûk infâi a, oliv riak nang ki nâl tâk a.

¹⁰Puan iṭha tak nang ken sil a, savun iṭha chi pheikok nang ken bun a, risompuan lukhumin nang ken khum a, rilungpuan zakorfual nang ken hâk a.

¹¹Silbom iṭha ṭhan nang ken rivo a, bânbun nang ken bun a, rithei enihoi tak nang ken li a.

¹²Nârbet nang ke khop pêk a, kuarbet nang ken bet a, lukhum enihoi tak khom nang ki pêk a.

¹³Khanchu, tangkarua neh rângkachakin ner vo a, risompuan neh rilungpuanin ni irvo mai ngai a nit. Baidi ṭha chia siam ibai ni fâk a, khuaituihei, oliv riakhei khom nuam dôra fah rang ni nei a. Ni mêl khom a hong ṭhat tak tak tâk a, rêngnu angkah dôr ni hong nit tâk a.

¹⁴Ni mêl ṭhatzia chu nam tin lâiah ân thang tâk a, ki ṭhatna nang ker bel sikin nî ṭhat rikip a nit,” Tinrêngthothei PUMAPA thu suak khan a ti.

¹⁵“Nikhomseh ni mêl ṭhatna khah ni song a, ner ming inthangna khah ni hurpui a, â hong murdi ziangah ner phal rip a, nang an întlôm tâk a nit.

¹⁶Ni silbomhei kha ni khêng a, ni bôlkuanghei ivo nan ni mang a, nochizuar angkah takin mi tin ziangah ni irphal rip [10] ngai a nit.

¹⁷Tangkarua neh rângkachak nang kî pêk khah ipa rilimhei isiam nan ni mang a, mi hur angkan ni înrêpui a nit.

¹⁸Silbom iṭha rivona nang kî pêkheia khan ipa rilimhei khah ni tuam a, oliv riak neh namhoi nang kî pêkhei khom khah an maah ni lan a.

¹⁹Baidi ṭha chi hei, oliv riak hei, khuaitui hein nang ke fa a; nikhomseh, khahei khah mirmilhei ditsakna dong itumin an ziangah ni lan a, khangkah khan nî tho ngai a nit,” Tinrêngthothei PUMAPA thu suak khan a ti.

²⁰“Kha bang khah ni loiin ni ne inei pêk nainu naipahei khah ribôlna rangin mirmilhei ziangah ni lan a.

²¹Ki chunga iamom loia nî om ilua hih inrup ti loia, ki naihei ten khom mirmil makunga hâlrivâm ranga nî lan hih thil chanlamboi pai im ai nit?

²²Hi thil porinche tak hih itho a, nochizuar angkan ni hur sikin ni naipang lâi, korongboi ni nit lâi, ni thisen ner sil zit lâi khah voikate lua nî riatsuak khâi ino a nit hih,” a ti a.

²³Pumapa PATHIAN khan, “Ni chung ân khôk e! Ân khôk e! Hi thil isual ni tho banah,

²⁴lamsîr ikipah mirmil isônna rang neh rizuarna rang munhei nen ding fer fur a.

²⁵Ni mêl ṭhat chu porinchen ni siam a, â hong murdi ni malpui ni lîm pêk a, a sûn bat dêt loiin nochizuar nêkan nî fe ual tet mai a nit hih.

²⁶Ner nâipui hurna sip Aigupta mihei khah ni zâlpui a, ki ning inthik rangin ni irzuar ual ual a nit.

²⁷“Ringai roh, ni chungah ki kut ilek ki ta, ni rangtum ki ṭhatvurna chu kî kâi ikhîr nôk rang a nit. Nangma neltu, ni om dân porinchehei nang izakpuitu Filistia mihei ziangah nang ki lan tâk a nit.

²⁸“Mi dangin ne lung an intluk theino sikin Asuriahei chu ner zûl a, an ziangah ner zuar a; khanniseh, anni khom khan ne lung intluk thei ual mak a.

²⁹Babilon mi, rivai itho ngaihei ziangah khom ner zuar a, anni khom khan ne lung an întluk thei ino a nit,” a ti a.

³⁰Pumapa PATHIAN khan hingka hin ai ti a nit: “Zaksal tâk nochizuar angkah takin ni châng a, nî hur titak a nit hih.

³¹Kotsua tinah mirmil isônnahei ni siam a, rizuarna rang munhei nen ding fer fur a. Khanniseh, nochizuar pangai angkana sum ilo ranga sin chu ni mak cheh.

³²Mahni pasal lungthlung loia riatloi mihei neh inrê ngai nupang angkah ni nit.

³³Nochizuarhei hin chu lo an nei ngai a, nangmah rêkin chu nang izâlpuitu khah lo ni pêk ngai a, kil tin ata honga nang izâlpui rang mi nî êm ngai a nit.

³⁴Nochizuar danglam tak ni nit, min nang fial mak a, nangman nî fial ngai a nit. Lo nang peh mak a, nangman anni chu lo ni pêk ngai a. A nit, danglam tak ni nit,” a ti a.

³⁵Khasikin, nangmah Jerusalem, mi hurnu, PUMAPA thu hi ringai ta,

³⁶Pumapa PATHIAN khan hingka hin a ti: “Ni silbomhei ni khêng riai a, nochizuar angkah takin ni idithei ziangah neh ni mirmil porinchehei ziangah khan nangmah ner lan a, ni naihei kha mirmilhei ziangah ribôlnan ni lan a.

³⁷Khasikin, ni lei hong îdit ngaihei, nî kan tak takhei neh nî nel tak takhei murdi hong bûm ki ta, kil tina nang ihual rangin koibûm ki ti. Khanchu, ni silbomhei khêng vang ki ta, ni korongboi khah nang mu riai an ti.

³⁸Inrêhei neh mithathei chungthu an rêl lam angkah takin ni chungthu rêl ki ti. Ki ning nen thik tak tak sikin thinan ni chungah roi rêl ki ti.

³⁹An kutah nang bâng ki ta, bôlkuanghei neh rizuarna mun nî siamhei khah ṭhet vang an ti. Ni silbomhei nang khêng pêk an ta, ni thil iṭhahei khah lah vang an ta, korongboin nang marak an ti.

⁴⁰“Vântlâng iphung an ta, lungin nang dêng an ta, khandaiin nang richan nôi an ti.

⁴¹Ni inhei khah hâl an ta, nupang danghei mu chungah kuttum nang thông an ti. Ni nochizuar hurna khah nang inringam ki ta, ni îdithei khah thilpêk peh nôk khâi no tin e.

⁴²Khanungchu, ki ningthik ṭuai a ta, ke lung dâi riam tâng a ti. Ke lung dam a ta, nang thîkna lungril nei khâi no ning e.

⁴³Ni chîn lâia nang ki lei hong enkol ngai dân khah ner ngil phar tak a, hi ni thil thohei murdi sikah hin ningmur ni ne isak tak tak a nit. Khasikin, a rêngkan nang ki întuak vang a nit hih. Îtho sika hurna porinche tak ithon, thil porinche dang nî thohei khah ni însap sa mai mani?” Tinrêngthothei PUMAPA thu suak khan a ti.

⁴⁴PUMAPA khan, “Jerusalem, min ni chungchângah hi ṭong ulian, ‘a nu angkah tak a nainu khom’ iti hih la mang an ti.

⁴⁵Ni nu nainu chu nî nit titak a nit hih. Ani khan a pasal neh a naihei chu a nel a. Mahni pasal neh naihei ineltu inzirpui chu ni lei nit ngêt hiteh. Nangmah neh nen zirpuihei hin nin nu chu Hit mi a nit a, nin pa chu Amor mi a nit.

⁴⁶“Ni uliannu Samaria chu a nainuhei neh, mâr tiang an om a. Ni unainu Sodom chu a nainuhei neh, sim tiang an iom a nit.

⁴⁷An kenunghei izuia an thiltho porinchehei itho saah hin ne lung ni întluk ngai mani? Intluk ngai mak che, zoro sôt inote sungin ni sin tho tinrêngah khan anmani nêka sual ual nî châng tâk a nit.

⁴⁸“Pathian iring chu ki nit titak,” Pumapa PATHIAN khan a ti, “Nen zirpui Sodom neh a khua chînhei khomin nangmah neh ni khua chînhei itho dôra thil isual hi chu tho ngai mak e.

⁴⁹Ringai ta, ni unainu Sodom sualna chu amahih a nit; ripâk takkan a om a, fâknêk a nei intama a naihei neh hoiinhâi takkan an lêng a, inrianghei neh lunginzînghei an ingaisak ngai ino a nit.

⁵⁰An risong tak tak a, an tuklul inlianin ki thil nel tak takhei an tho sikin anni chu ki înrimang tâk a nit.

⁵¹“Samaria khomin ni thil thonsual arzâtka lua tho mak e. A thil tho porinche tak nêka porinche ualin sin ni tho a. Ni thonchâina natinsatzia neh inrichakin chu nen zirpuihei chu thonchâina nei viat ino angkan a îlang a nit.

⁵²Khasikin, nen zirpuihei nêka thil porinche natinsat ual ni tho sikin an tuang rang piala ni irngai nêka natinsat mâimôkna tuang ni ta; anmani nêka ni sualna a porinche ual sikin anni chu iṭha angkan an îlang a nit. Izakin ni mâi sen riseh; nen zirpuihei lak chu rithiang ini angkan nen lang tâk a.”

⁵³PUMAPA khan Jerusalem ziangah, “Sodom neh a khua chînhei chu siam inṭha nôk ki ta, Samaria neh a khua chînhei khom siaminṭha nôk ki ti. Anmani rualah khan nang khom nang siaminṭha nôk ki ti.

⁵⁴Ni khât nâk nâkin la zak ni ta, ni mualinphoina khan nen zirpuihei an ṭhat ualzia khah a înlang rang a nit.

⁵⁵Nen zirpui Sodom neh Samaria kha an naihei neh khan vângisakin hong om nôk an ta; nang khom ni naihei neh khan vângisakin om nôk nin ti.

⁵⁶Ni vângsak inṭum lâiah khan ni unai Sodom chu thuzer ithona takin ni lei imang ngai ni mak im a?

⁵⁷Ne sualzia â lang tâk a, anmani angkah chia ni nit. Atûn chu Edomhei, Filistiahei neh ni kôlvêla om, nang ineltuhei thuzer thona nî chang chak tâk a nit.

⁵⁸Ni sintho porinche neh ni ngalna sikah khan ni tuang ngêt rang a nit,” PUMAPA thu suak khan a ti.

⁵⁹Pumapa PATHIAN khan hingka hin a ti: “Ni sintho lam takkan nang kî thung rang a nit; ni ṭonginkung ngamringilin thuthlung kha ne khiak a.

⁶⁰Nikhomsela, ni thuarbap lâia thuthlung nang kî siampui khah remai ki ta, kumkho thuthlung nangmah neh kî siam rang a nit.

⁶¹Ni om dân kha reh suak ni ta, ni uliannu neh ni unainu ne pom nôk tenan izak tak tak ni ti. Ki thuthlungah ṭang sa no khom sela anni chu ni naihei ichang rangin nang kî pêk rang a nit.

⁶²Nangmah neh ki thuthlung kha indet ki ta; khanchu, PUMAPA chu ki nit iti reh tâng ni ti.

⁶³Ni thil isual thohei nang ki ngaidam tenan chu nê sual ngaizia kha reh suak ni ta, ne zak tak tak sikin ṭong ngam viat khâi no tin e.” Pumapa PATHIAN thu suak khan a ti.