Read Biete EZEKIELA 17 Bible Online

EZEKIELA 17 - Biete bible

EZEKIELA 17

¹PUMAPA khan a ne sôn a, ki ziangah,

²“Famthei miriam, Israelhei ziangah thu khir neh ṭongrikhekin thu sîr roh,

³Keimah, Pumapa PATHIAN hin an ziangah hingka hin kî ti a nit: Musimpui ilian tak, mul enihoi tak, rithlaphar rizat duai hi a om a. Lebanon tlângsîpah a vuang a, sidar thing lêrah a fûk a.

⁴A zîk rinoi khah a chun a, rivai itho ngai mihei ramah a vuangpui a, rivai itho mihei khopuiah a phun tâk a.

⁵Khanungchu, Israel rama rithokin grep ṭiak khom a lâk a, rinêng irînnikna munah a phun a, ân thuar maitu rang tui tamna munah khan a phun tâk a.

⁶A hong thuar a, grep kung riniam neh ribom vung a hong chang tâk a. Â ṭanghei khah musimpui tiangah khan arzâm a, rizung inthûk tak a lâk a. Khanchu, grep khah a hong cher zîng dût tâk a.

⁷“Musimpui ilian tak rithlaphar rizat duai neh mul isâ tak inei hi a om nôk a. Khante, a ṭoina mun ata grep rizung neh â ṭanghei khan tui a mu tam ual theina rangin kha musimpui tiangah khan arzâm tâk a.

⁸Khanniseh, grep kung ilian tak, ithuar dût, â râ kûr ngut a nit theina rangin ram ṭhatna, tui tamna muna phun a lei nit pial tâk a.

⁹“Khasikin, keimah, Pumapa PATHIAN hin hingkan kî ti a nit: Hi grep kung hih la ringin a lai thuar mai thei rang mani? Â phuntu mupui masa khan arzunghei iphâi paiin â râhei ipai vangin, â ṭanghei ikhiakin a înthêm riai ino rang mani? Â phâi rangah khan ritha rât manih, mipui itam manih nang ual no nih.

¹⁰Iṭha taka phun chu a nit ngêt a, khan la ring thei mai a tîm a? Khosak tianga phâivuan a sêm tikah khan ai thêm ino rang mani? A ṭoina mun ngêiah khan ai thêm ino rang mani?” a ti a.

¹¹PUMAPA khan ki ziangah,

¹²“Hi rihel irât insungkuahei hih ridon roh. Ama ṭongrikhek omzia hih an iriat chu ai nit mani? Ringai ta, Babilon rêng khah Jerusalemah a hong a, rêng neh a milianhei kha a man a, Babilon ram tiang a ṭhui riai tâk a.

¹³Rêng insungkua lâia mi khatkah kha thuthlung an siampui a, ṭong ân rikhâm a, milian danghei chu a ṭhui riai a.

¹⁴Ram kha idinga an rihel nôk khâi nona rangin neh thuthlung khah an isiat nona rangin kha milianhei khah a îrên a nit.

¹⁵Nikhomsela, Judai ram rêng khah arhel tâk a, Aigupta rama rithoka sakor neh sipai itam takkah va ṭhui rangin palâi a tir a. Lôtluk thei tâng a tîm? Ama angkana thotu khah zôk thei a tîm a? Thuthlung isehtu khah ai zôk thei rang mani?

¹⁶“Pathian iring ki nit hih,” Pumapa PATHIAN khan a ti. “Rênga inṭhungtu, Babilon rêng zianga a ṭongrikhâm neh thuthlung kha â siat sikin kha rêng khah Babilonah ai thi ngêt rang a nit.

¹⁷Mi tam takkah ithat ranga Babilon mihein rinêng an inpông a, hual bang an siam nung tenan chu Faroa neh a sipai lôm irât takhei khan ani chu ṭangpui thei khâi no nih.

¹⁸A ṭongrikhâmna kha â khiak tâk a, thuthlung kha â siat tâk a. Bân iphara ai namindet nung tâk khah â siat a, hi thilhei murdi hih a tho tâk sikin atûn chu ai zôk khâi ino rang a nit,” a ti a.

¹⁹Tinrêngthothei PUMAPA khan hingka hin a ti: “Pathian iring kî nit ngêt angkah hin, vong indet ngêt ranga ker ming ichinga a ṭongrikhâmna thuthlung khah â khiak tâk sikin ani chu kuttum kî tho ngêt rang a nit.

²⁰Lênchâng kam pêk ki ta, in-ôk ki ta, Babilonah ṭhui ki ti. Khanchu, ki chungah a iamom no sikin kha munah khan kuttum kî tho rang a nit.

²¹A sipai iṭhahei chu râlbualah ithatin om an ta, a la dam isunhei chu kil tinah chekindarin om an ti. Kha tenan chu Keimah, PUMAPAhin ki lei iti tak a nit iti reh tâng nin ti.”

²²Pumapa PATHIAN khan hingka hin a ti: “Sidar thing inzâi tak zîk rinoi chu khiak ki ti; Keimah ngêiin tlâng risâng ân chuapna takah phun ki ti.

²³Israel tlâng risângah khan phun ki ta, Hong thuar dût a ta, irâ ṭuk a ti. Sidar thing ilian tak nîng a ta, Amakhan iva chitin om an ta, ribu kâi an ti.

²⁴Ram sunga thing murdihein PUMAPA chu ki nit iti riang an ti. Thing iseihei khah ker om a, Thing riniamhei khah ken thuar ngai a. Thing iringhei khah ken châr a, Thing ichârhei khah kên ring ngai a. Keimah PUMAPA hin kî ti tâk a nit a, Isin ranga kî ti tâk chu kî sin ngai a nit.”