Read Biete EZEKIELA 18 Bible Online

EZEKIELA 18 - Biete bible

EZEKIELA 18

¹PUMAPA khan a ne sôn a, hingka hin a ne ril nôk a:

²“Israel rama min an isâm ṭian ṭian ngai thuvâr hih im ai nit? ‘Pahei thei thûr fâkah, naihei ha a lei ṭim ngai,’ iti hih a nit.

³“Pathian iring ki nit,” Tinrêngthothei PUMAPA thu suak khan a ti. “Israel ramah hi pipu thuvâr hih sâm mai khâi no tin u.

⁴Mi murdi ringna hih ki ta a nit a, nu neh pa ringna banah nai ringna khom ki ta a nit. Ringai roh, thil isual ithotu chu ai thi ngêt rang a nit.

⁵“Tu miriam khom mi ṭha, mi fel, mi dik a nit a,

⁶Israel mihei mirmil chubai ûn mak a, bôlkuanga ribôlna thillanhei fah ngai mak a, mi dang nupui châipui ngai mak a, nupang felno lâiin rimunpui ngai mak a,

⁷mi tute lêm inkông ngai mak a, a thil ritângtuhei siakham khom a pêk kîr mai ngai a, tute irok ngai mak a, voniṭâmhei fâk a pêk a, korongboia omhei silbom a pêk ngai a,

⁸â pung rizûlin mi inritâng mak a, thil ṭhano ata ardîn tak tak a, thleibîk nei loiin mi thubuai a rêl pêk ngai a,

⁹Ki thupêkhei a zôm a, ki Dânhei a vongin chu kha mi khah mi fel a nit a, ai ring ngêt rang a nit,” Pumapa PATHIAN thu suak khan a ti.

¹⁰“Khante, khangkana mi khan inru neh mi that isong naipa nei sela,

¹¹kha nai khan a pa thil tho ngai khah tho nuam loiin bôlkuanga ribôlna thillanhei a fâk a, mi dang nupui a châipui a,

¹²inriang lêm inkôngin a rop ral a, a thil ritânghei siakham â rên pêk khap a, sanong ribôlna munah a fe a, mirmil porinche takhei chubai a ûn a,

¹³â pung rizûlin mi ân ritâng a, hi thil porinchehei hih a tho ngaiin chu ai thi ngêt rang a nit. Ring tlak no nih. A thina chunga rinangna chu a chung ngirah khan ringat nîng a ti.

¹⁴“Kha mi khan naipa nei sela, kha a naipa khan a pa thil isual tho murdi khah a mu riai a, a lungril a siam a, tho nuam mak a.

¹⁵Israel mihei mirmil chubai ûn mak a, bôlkuanga ribôlna thillanhei fah ngai mak a, mi dang nupui châipui ngai mak a,

¹⁶tute nuaisia ngai mak a, ropral ngai mak a, a thil ritânghei siakham lah nuam ngai mak a, tute khuruk tho ngai mak a, voniṭâmhei fâk a pêk a, korongboia omhei silbom a pêk ngai a,

¹⁷thil ṭha no tho nuam ngai mak a, â pung rizûlin mi inritâng ngai mak a. Ki Dânhei a vong a, ki thupêkhei a zôm a. Kha mi khah a pa sual sikah khan thi tlak no nih, ai ring ngêt rang a nit.

¹⁸A pa khan chu mi dang lêm inkôngin a ropral ngai a, mahni inzirpuihei khom a lêm inkông ngai a, zoro tin mi danghei chungah thil ṭha no ai tho ngai a nit. Kha a pa kha chu a sualna sikah khan ai thi ngêt rang a nit.

¹⁹“Khanniseh, nangmanin, ‘Ithôm naipa khan a pa sualhei sikin ai tuang ino rang?’ nin ti ngai a. Khannisela, naipa khan chu idik takkan thil iṭha a tho a, ki dânhei a vong a, ridîn takkan a zôm ngai sikin ai ring ngêt rang a nit.

²⁰Thil isual ithotu chu thîng a ta; naipa kha chu a pa sualna sikah khan a tuang rang ni mak a, a pa khomin a naipa sualna sikah khan a tuang rang ni ual mak e. Mi ṭha khan a sin ṭhat loman mûng a ta, mi sual khan a sual man mûng a ti.

²¹“Mi sual chu a sualna ata arlet a, ki dânhei a vong a, thil dik neh â ṭha a sina a nitin chu ring a ta; thi no nih.

²²A sualnahei murdi izâ riai nîng a ta, thil iṭha a tho sikah khan ring a ti.

²³Mi sual an ithi hih ki lôm ngai nin isôn mani?” Pumapa PATHIAN thu suak khan a ti. “Lôm ngai mang, an rilet a, an iring hih kî lôm tak a nit.

²⁴“Mi fel khomin thil iṭha sin a mâk a, thil isual a tho a, mi sualhei itho angkana thil porinche tinrêng a thoah khan a lai ring mai rang mani? Ring no nih, thil iṭha a lei hong ithohei khah iremai ni khâi no nia; a iamom nona neh a sualnahei sikah khan thi ngêt a ti.

²⁵“Nikhomseh nangmanin chu, ‘PUMAPA thil tho hih idik mak,’ nin ti ngai a. Israel insungkuahei o, ringai rei, ki thil tho hih â dik ino ni mak a, nin om dân hi kêng â dikino chu ai nit.

²⁶Mi felin sin iṭha sin a mâk a, sual a sinin chu thîng a ti; a sual sin sik ngêia thi a nit.

²⁷Mi sual khomin a sual sin tho khah a mâk a, thil dik neh â ṭha a sinin chu a ringna chu inzôk a ti.

²⁸A sintho khah a riat infel a, a sualnahei a mâk vangin chu thi tlak no nia, ring ngêt a ti.

²⁹Nangmani Israel insungkuahei khan, ‘PUMAPA thil tho hih idik mak,’ nin ti ngai a. Ki lampui hih â dik ino ni mak a, nin lampui kha kêng â dik ino chu ai nit.

³⁰“Khasikin, Israel insungkua hei o, Keimah, Pumapa PATHIAN hin nin sintho lam angkah takin nin chungah roi kî rêl rang a nit iti hih nangni ki îril a nit. Hong kîr unla, nin thil isual tho murdi ata hong rilet rei; khanchu, nin sual khah nangni inrimangtu ni khâi no nih.

³¹Nin siatnahei murdi chu mah vang unla, lungril ithar neh ngaituana thar nei rei. Israel insungkuahei o, îtho rang im nin ithi rang hi?

³²Mi an ithi hi kî nuam ni mak,” Pumapa PATHIAN thu suak khan a ti. “Nin sualhei ata rilet unla, ring rei.”