Read Biete EZEKIELA 19 Bible Online

EZEKIELA 19 - Biete bible

EZEKIELA 19

¹PUMAPA Pathian khan ama sûnna lâ hih Israel rêng nai inikahei sûnna ranga sak rangin a ne ril a:

²Ni nu chu sakeibakneipui a nit a, Sakeibaknei lômhei lâiah a tehei a don a.

³Â hâi tak khatkah a don inlian a, A hong puitling tenan chu sa a that thei tak tak a, Miriam ifah ngai a chang tâk a.

⁴Nam danghei khan an riatin, dîp an choih a, a tlâk tâk a; Thîr kol an inbun a, Aigupta ramah an ṭhui a.

⁵A rinpui tak om khâi mak iti a riatin chu, A te dang a don inlian nôk a, Sakeibaknei ihâi tak a nit tâk a.

⁶A puitling tenan chu sakeibaknei danghei lâiah a lêng a, Ani khom khan sa a that thei tak tak a, Miriam ifah ngai a chang tâk a.

⁷An kulpuihei â siat a, an khuahei ân ram a, Ram sunga mihei chu â râm iṭin rilônthingin an om ngai a.

⁸Namhei chu â doi rangin an ribûm a; Kil tina rithokin an ihong a nit. An lênchânghei chu an zar a, an chângah khan an in-ôk tâk a.

⁹Thîr kol an inbun a, ribômah an khum a, Israel tlângramheiah â râm an riat khâi nona rangin, Rip sunga khum pumin Babilon rêng ziangah an pêk tâk a.

¹⁰Ni nu chu grep kung vadung rikama phun angkah hi a nit. Tui a tam sikah khan a thuar dût dût a, Â râ nuam tak tak a.

¹¹Rêng irola mang inrup, iṭang ikhir tak takhei a nei a. Grep kung chu sûmhei iphâk dapkan arfon a; Mi tinin a nâ ribom vung neh arsângzia khah an thlîr mai ngai a.

¹²Khanniseh, ningmurna kut kha arzung idênin a phâi pai a, Rinêngah a pai tâk a. Khosak ithli khan a sêm inchâr a, â râhei a ṭul zoi tâk a, Â ṭanghei khah a kiak riai a; A châr riai a, ihâlin a om tâk a.

¹³Tui boina ram iṭôl, ramchârah khan, Ithon a nit a, amakhan iphun a nit tâk a.

¹⁴Â ṭanga rithokin mei a hong suak a; Â râhei khah a kâng zoi riai tâk a. Rêng irol inrup iṭang kha tiklâi khomin nei khâi no nih. Amahih sûnna lâ a nit a, isak mai rang a nit.