Read Biete EZEKIELA 2 Bible Online

EZEKIELA 2 - Biete bible

EZEKIELA 2

¹Khanchu, ne sôntu khan, “Famthei miriam, iding roh. Ni ziangah thu ki îsîr rang a nit,” a ti a.

²Rôl khan ki ziangah thu a la sîr mai lâiin Pathian rithla chu ki sungah a zuang lût a, a nen ding tâk a, a thu sîr khah ker ngai mai a.

³“Famthei miriam, Israel mihei ziangah nang kî tir a nit. An chibulhei khangkah takin ki chungah an rihel a, an ne doi a, anni khom vuani tenah hin an la irhel mai a nit.

⁴Nam tuklulilian tak, marit ne tho tlak ngai ino an nit. Khasikin, keimah Tinrêngthothei PUMAPA hin an zianga thu sîr ranga nang kî pêk chu anmani iril rangin nang kî tir a nit hih.

⁵Anni chu nam rihel irât tak ni khom seh, ni ṭong an ringai le an ringai no le khom, an lâiah zânthla ai om a nit iti chu an riat rang a nit.

⁶“Khanniseh, famthei miriam, nangman chu anni khah ni ṭi rang ni mak a, an ṭong sikin indôp tlak no roh. Ni thu zôm no nia, nang isêlin nang nel an ta; imuang âinuvêt kâra lêng angkah nîng ni ti. Khaten khomin, rihel mihei neh an ṭong tihei khah ṭi no roh.

⁷Rihel irât tak an nit iti remai inla, an ringai le an ringai no le khom ki thu hih ne ril rang a nit.

⁸“Famthei miriam, nang chu ki thu hih ringai roh. Anmani angkan rihel no roh. Ni bâi âng inla, ki thil nang pêk hih fah roh,” a ti a.

⁹Khanchu, keimah ne zuk iban kut hih ki mu a, kut khan lekhabuzuat a chôi a.

¹⁰Kha kut khan lekhabuzuat khah arsam a, a phêk sungtiang neh putiang khah riziakin a sip riai a. Thu riziaka chuang kha peitema ṭapna thu hei, ṭâna thuhei neh irungna thuhei a nit.