Read Biete EZEKIELA 20 Bible Online

EZEKIELA 20 - Biete bible

EZEKIELA 20

¹Kum sarina kum, a thla ringana, a sûn sômnî-ah khan Israel ruaitu ṭhenkahei chu PUMAPA sôn rang an hong a, ki makungah an iṭhung a.

²Khanchu, PUMAPA khan a ne sôn a,

³“Famthei miriam, hi Israel ruaituhei ziangah thu sîr inla, Pumapa PATHIAN thu sîr hih iril roh. Ki thiltum ner don ranga nin ihong a nit na? Pathian iring ki nit hih, nangmanin thu nin ner don rua ni mang e. Keimah, Pumapa PATHIAN hin kî ti tâk a nit.

⁴“Famthei miriam, annihei irêl ranga hin ner siam zoi tâk im? Ner zoi tâka a nitin chu rêl inla, an pahein thil porinche an lei ithohei khah anni khah iril roh.

⁵Ki thu sîr hih anni chu iril roh. Israelhei ker thlang lâiah khan an ziangah ṭonginkung ki nei a. Aigupta ramah khan keimah ngêi an ziangah ker phuang suak a, ‘Keimah hih nin Pathian PUMAPA chu ki nit,’ itin anni khah ke ril a.

⁶Kha zoroah khan Aigupta ram ata ṭhui isua a, ki ram zong suak, dût neh khuaitui luangna ram, ram richong neh ram iṭha taka ṭhui ithlun rangin ṭonginkung ki nei a.

⁷An ziangah, ‘Nin înpâm mirmil porinchehei kha pai unla, Aigupta rama pathian dik inoheiah khan borinnimin om no rei, keimah hi PUMAPA nin Pathian chu ki nit,’ ki ti pêk a.

⁸Nikhomsela, ki chungah an rihel a, ki thu tutên zôm nuam mak a. An înpâm mirmil porinchehei khah pai nuam mak a, Aigupta ram pathianhei khom khah ithla nuam mak a; khanchu, Aigupta ram ngêiah khan an chungah ki ningthik iṭhum rangin ker siam tâk a.

⁹Khanniseh, an omna namhei mitmua ker ming a siat nona rangin ki îṭhum khâi ino a nit, Aigupta ram ata anni chu kî ṭhui isua rang a nit iti ki lei înpuang thlâm tâk khom a nit a.

¹⁰“Khaangkan Aigupta rama rithoka khan ramchâr ke ruai ithlun a.

¹¹Min an zôm a, an ring theina rang ki thupêkhei chu ke ril a, ki Dânhei chu ken risei a.

¹²Anmani neh kin kâra risinsiana thuthlung rangin sabat nî khom ken kung pêk a, anmani serinrantu PUMAPA chu ki nit an riat mai theina rangin.

¹³Khanniseh, Israel mihei khan ramchârah khan ki chungah an rihel a, min an zôma an ring theina ranga ki thupêkhei kha zôm nuam mak a, ki Dânhei an nôl a, ki sabatnîhei laka chu an innim mai a; khanchu, ramchârah khan ki ningthik kha an chungah ki îṭhum rang tâk manih ki ti a.

¹⁴Khanniseh, Aigupta ram ata ki ṭhui isua imutu nam danghei mitmuah ker ming ân pôi nona rangin kî tho khâi ino a nit.

¹⁵Ramchârah khan ki pêk rang ram, dût neh khuaitui luangna, ram richong neh ram iṭha takkah khan ṭhui inlût no ning e iti ten khom ṭonginkung ki nei tâk a.

¹⁶An mirmilhei ikan ualin ki Dânhei an nôl a, ki thupêkhei zôm nuam mak a, ki sabatnîhei an innim a; khasikah khan ṭonginkung khah kî nei a nit.

¹⁷“Khaten a nit nung khomin lungkhamin ki en a, ramchârah khan ki înrimang vang khâi ino a nit.

¹⁸Ramchârah khan an naihei ziangah, ‘Nin chibulhei thupêk zôm no unla, an dânhei uksak no unla, an mirmilheiah khan borinnimin om no rei.

¹⁹Keimah hi PUMAPA nin Pathian chu ki nit a, ki Dânhei neh ki thupêkhei zôm rei.

²⁰Ki sabatnîhei ser unla; khanchu, keimah neh nangmani kâra risinsiana thuthlung nîng a ta, keimah hi PUMAPA nin Pathian chu ki nit iti nin iriat mai rang a nit,’ ki ti a.

²¹“Khanniseh, an naihei khom khah ki chungah an rihel a, min an zôma an ring theina rang, ki thupêkhei khah zôm nuam mak a, ki Dânhei khom an izôm nuam ino a nit. Ki sabatnîhei chu an innim a, ramchârah khan an chungah ki ningthik ki îṭhum rang tâk manih ten khom ki ti a.

²²Khanniseh, Aigupta ram ata ki ṭhui suak lâi imutu nam danghei mitmuah ker ming ân pôi nona rangin kî tho khâi ino a nit.

²³Khanchu, ramchâr ngêiah khan ṭonginkung dang ki nei nôk a, ‘Anni chu rammual kil tinah nam tin lâiah chekindar ki ti,’ itin ṭongrikhâmna ki nei tâk a.

²⁴Ki thupêkhei an nôl a, ki Dânhei zôm nuam mak a, ki sabatnîhei innimin an chibulhein chubai a iûn ngai mirmilhei ngir khah chubai an ûn sikin khangkan kî ti tâk a nit.

²⁵“Khanungchu, an ṭhatna rang ni no dân neh an ring theina rang ni no thupêk kha anni chu ki pêk a.

²⁶An thillanhei khan anmani borinnimin ken om a, an nai lutîr ipahei khom ribôlna rangin an imang tâk a nit. Amakhah anmani kuttum itho a, PUMAPA chu ki nit iti inmuna ranga kî tho a nit.

²⁷“Famthei miriam, atûnah hin Israel insungkuahei chu keimah, Pumapa PATHIAN hin an zianga ki thu sîr hih iril roh. An pahein an ne phial sikin ker ming an îsiat tak tak a nit.

²⁸Ipe kî tum ram ke ruai ithlun tenah khan tlângrisânghei neh thingkung iringhei an hang mu a, amakhan ribôlnahei an lan zel tâk a. Ne êsêlin ribôlnan thilpêkhei an lan a, namhoihei an hâl a, uain thillan an hong chôi a, ki ning an inthik titak a.

²⁹‘Hi munrisângheiah[11] hin îtho ranga nin ife im ai nit?’ itin anni khah ker don a. Kha zoroa rithokah khan atûn tenah hin ‘Munrisâng’ itia koi ai nit mai tâk a nit.

³⁰Khasikin, atûnah hin Israel insungkuahei chu Keimah, Pumapa PATHIAN thu sîr hih iril roh. Nin pahei nung izuiin borinnimin nin om a, an thil porinche tho khah izuiin nin ribôl mai a.

³¹Mirmil zianga thil ilan neh ribôlnan nin naihei meia hâlin vuani ten khomah hin borinnimin nin lai om mai ngai a nit. Khaten khomin Israel insungkuahei o, ki thiltum iria tumin nin lai hong mai ngai na? Keimah, Pumapa PATHIAN chu Pathian iring kî nit angkah hin, nangmanin nin ne sôn rang ni mang e.

³²Nam dang, ram dang danga omhei tho dân angkan thinghei neh lunghei isôn rangin nin lungril nin inthlêk ngit a. Khanniseh, isôn thei tlak no tin u.

³³“Keimah Pumapa PATHIAN hi Pathian iring kî nit angkah hin, nangni ki îril thlâm a nit; nangni dîn viat loiin nin chungah ki kut ilek ki ta, nin chungah ningmur rilâng ki ti.

³⁴Nam dang lâia nin rithekindarna rama rithoka nangni ki hong ṭhui ikhîr nôk tenan chu ki sinthotheizia neh ki ningthikzia nangni inmûng ki ti.

³⁵Nam dang ramah, ramchârah khan nangni ṭhui ki ta, mâi ritongin nin chungthu rêl ki ti.

³⁶Sinai ramchârah nin pahei chungthu ki rêl a, thiamno ki închang angkah takin nin chungthu rêl ki ta, thiamno nangni inchang ki ti,” Pumapa PATHIAN thu suak khan a ti.

³⁷“Tôkmolin nangni sôi ki ta, ki thuthlung nangni inzôm ki ti.

³⁸Nin lâia tukhom ki chunga rihel neh thilsual ithotuhei chu ithlei ki ta, atûna an omna ram ata ṭhui suak ki ta; khanniseh, Israel ram chu tlung khâi no nih. Khanchu, PUMAPA ki nit iti reh tâng nin ti.”

³⁹Pumapa PATHIAN khan hingka hin a ti: “O nangni Israel insungkua murdihei a hoi nin ti lam takkan om rei. Fe unla, nin mirmilhei sin tho rei. Khanniseh, nungah chu ki thu la zôm nin ta, nin mirmilhei zianga thilpêkhei ilan a, ker ming mualphoi nin isak ngai hih nin la îma rang a nit.

⁴⁰Israel ram, ke tlâng rithiang, Israel tlâng risângah khan chu, Israel mi tinin chubai ne ûn nin ta, kha munah khan nin chungah lôm ki ta, nin ngaihoi thillanhei, râ masa nin ilanhei, nin thil rithiang lanhei nangni lei iham pêk ki ti.

⁴¹Nin rithekindarna ram ata nangni ki ṭhui suak a, nangni ki ṭhui bûm tikin chu nin thil nam hoi lan angkan nangni lei iham ki ta, nam danghei khan ker thiangzia mûng an ti.

⁴²Israel ramah nin chibulhei zianga ipeh ranga ki înkung ramah nangni ki hong ṭhui ithlun nôk tenan chu PUMAPA ki nit iti reh tâng nin ti.

⁴³Khanchu, nin om dân neh nin thil thohei sika borinnima nin iom ngaihei khah reh suak nin ta, thil isual nin lei hong ithohei murdi sikah khan nin khât nâk nâkin rinel nin ti.

⁴⁴O Israel insungkuahei, ker ming ihoina rang ringot a, nin om dân isual neh ichim iom taka thil nin itho ngai angkah ni loia nin chungah thil ki tho tenan chu PUMAPA ki nit iti reh tâng nin ti.” Tinrêngthothei PUMAPA thu suak khan a ti.

⁴⁵PUMAPA khan a ne sôn a,

⁴⁶“Famthei miriam, sim tiang ngat inla, sim tiang ram idemin thu isîr inla, sim tiang rampui chungthu inpuang roh.

⁴⁷Sim tiang rampui chu Pumapa PATHIAN thu sîr hih ringai rangin iril roh: Ringai ta, ni chungah mei isuang ki ta, thing iring neh â châr, a rêngkan kâng riai a ti. A chok khah tutên that thei no nia, sim tianga rithokin mâr tiang indar a ta, mi tin ai em thlût rang a nit.

⁴⁸Keimah, PUMAPA hin kî hâl a nit iti riang an ta, tutên that thei no nih,” a ti a.

⁴⁹Khanniseh, keiman, “Pumapa PATHIAN, hingka hin chu nen tho no roh. Mi tinin ṭongthurkhen bangin kêng thu a îsîr ngai an ne iti tâk kêng,” ki ti a.