Read Biete EZEKIELA 21 Bible Online

EZEKIELA 21 - Biete bible

EZEKIELA 21

¹PUMAPA khan a ne sôn a,

²“Famthei miriam, Jerusalem tiang ngat inla, mun rithiang idemin thu isîr inla, Israel ram chungchâng thu inpuang roh.

³Israel ram ziangah hingka hin ti roh: PUMAPA khan hingka hin a ti: Ringai roh, nang idoitu ki nit tâk, ki khandai chu a kok ata thuat ki ta, nin lâia mi ṭha khom, mi sual khom kî sât nôi chit rang a nit.

⁴Mi ṭha neh mi sual ki sât nôi rang sikin ki khandai chu sim neh mâra mi murdi chungah ki îlek rang a nit.

⁵Khanchu, tukhomin keimah, PUMAPA hin ki khandai chu ki thuat a, thun nôk khâi no ning iti riang an ti.

⁶“Famthei miriam, lungdongna sika ne lung ikak rak angkan irung inla, mi tin khan nang an thlîr theina rang mun takah ngaiinsian irung roh.

⁷‘Îtho rang sika ni îrung im?’ itia nang an ridonin chu, ‘A thu sîr kha a hong tlung rang tâk sikin ki îrung a nit. A hong tlungin chu mi tin ilung indôp a ta, an ibân ritha rizal a ta, an rithla vâi a ta, an rilo inthing a ti,’ itin anni chu iril roh. Ringai ta, a zoro chu a hong tlung ṭian tâk a,” Pumapa PATHIAN khan a ti.

⁸PUMAPA khan a ne sôn a,

⁹“Famthei miriam, hingka hin inpuang roh. Keimah, PUMAPA thu sîr hih mihei chu iril roh: “Khandai chu itât inngaih a nit a, Khandai chu inôt inritle a nit tâk.

¹⁰Risâtna rangin itât inngaih a nit a, Khothlâr angkana rilek zap zap ranga nôt inritle a nit. Râifânna rang zel om no nih, Ki mihei hin rilna neh isôina an ingaisak nuam viat ino a nit.

¹¹Imang thei zel rangin khandai chu itât a nit tâk; Itât inngaih a, inôt inritle a nit; Mi thattu chôi ranga inrifûk diam a nit tâk.

¹²Famthei miriam, beidongin irung vong vong roh, Hi khandai hih ki mihei tuang rang a nit a, Ki mihei chu Israel ruaituhei murdi neh an rêngkan khandaia sât nîng an ti. Beidongin ne ṭâng richûm ta roh.

¹³Ki mihei hih ifia an nit a, An rilet non chu rimang an ti,” Pumapa PATHIAN thu suak khan a ti.

¹⁴“Atûnah hin, famthei miriam, thu inpuang roh. Ni kut ibên inla, khandai khan vaiinlêng riseh. Thatna khandai a nit a, khandai iṭiom a nit a, sâtnôina khandai a nit.

¹⁵Ki mihei chu indôpin a siam a, an ilîr zoi tâk. Rithatna khandai khothlâr angkana rilek zap zap rang, kul kotbâi ikipah kî sia tâk a nit.

¹⁶Nangmah, khandai ingaih tak, voitiang changtiang sât inla, ner hêlna tiang tiang rivât roh.

¹⁷Kei khomin ki kut lei iben ki ta; khanchu, ki ningmur ṭuai tâng a ti. Keimah, PUMAPA hin kî ti tâk a nit.”

¹⁸PUMAPA khan a ne sôn a,

¹⁹“Famthei miriam, ram khatka rithoka lampui hong isuak lamṭhuamah khan khandai ichôia Babilon rêng hong thleng thal theina rang lampui ikhinin risin peh roh.

²⁰Ân ṭhuamna takah khan risin târ inla, khatkah khan Amon mihei khopui Raba fena lampui ikhin sela, a dang khatkah khan Judai ram kul inei khopui Jerusalem fena lampui ikhin riseh.

²¹Babilon rêng kha lamṭhuamah khan a fena rang lampui riatna rangin thlasânin thal ithing [12] a ta, a mirmilhei isôn a ta, an ribôlna sathin chu iṭha takkan enrichik a ti.

²²Jerusalem tiang ingata ṭul, thlasânna thal khah a kut changtiang a rût a, kul bang isimna rang hei, ridoina tlângisam rang hei, kul kotbâi isiatna rang hei, rinêng ivur inpônga hualna bang isiam rang hei a nitin a riat tâk a.

²³Jerusalem mihei khan Babilon neh an thu lei thlung tâk sikah khan thlasânna dik inon bêng an ta; khanniseh, hi rillôkna hih an isualzia ân reh suaktu rang a nit a, iman an init ngêt rang a nit iti thu â riltu a nit.

²⁴Khasikin, Keimah, Pumapa PATHIAN hin amahih kî ti a nit: Nin siatna chu iremai a nit a, nin sualhei chu puangindar a nit a, nin sintho murdi khan nin porinchezia chu a înlang a nit. Thiamno changin kuttum tuang nin ta, nin irâlhei kutah nangni kî lan rang a nit.

²⁵“Nangmah, Israel ruaitu, mi sual, ithat rang ni nit. Ni thi rang sûn chu a hong tlung thiai tâk.

²⁶Keimah, Pumapa PATHIAN hin kî ti a nit: Ni rênglukhum neh ni lukôm chu lîp pai roh. A balam pialin îte om khâi no nih; mi tlômhei chu chôiinrisâng nîng an ta, milianhei chu intlôm nîng an ti.

²⁷Ram a ti, ram a ti. A nit, khopui chu ki înram rang a nit; khanniseh, khopui kuttum itho ranga ki irthlangah khah a hong mâkah chu amahih tlung no nih, a ziangah kî pêk rang a nit.

²⁸“Famthei miriam, thu chu inpuang inla, Israelhei idemtu Amon mihei ziangah keimah, Pumapa PATHIAN thusuak hih inpuang inla, an ziangah hingka hin ti roh: “That inrimangna rangin khandai chu inrifûk diam tâk a nit, Thatna rangin nôt inritle a nit a, Khothlâr angkana rilek zap zap rangin inritle a nit tâk.

²⁹Inlârna nin imu ngaihei kha â dikino a nit a, nin thu inpuanghei khom kha milak a nit. Mi sual porinche nin nit, nin nikhua, nin kuttum tuangna rang nikhua ngêi chu a hong tlung thiai tâk. Nin ringah khandai chu ridôt a ti.

³⁰“Khandai chu a kokah thun nôk roh, nen siang nen zirna ramah khan ni chungthu rêl ki ti.

³¹Ki ningmurna chu ni chungah iṭhum ki ta, ki ningthikna mei chu ni chungah sêm inchok ki ti. Mi that mai ngai, mi nunterhei kutah nang lan ki ti.

³²Mei khan nang kâng a ta, nangma ram ngêiah khan ni thisen suak a ti; tutên nang remai khâi no nih,” PUMAPA khan ai ti a nit.