Read Biete EZEKIELA 22 Bible Online

EZEKIELA 22 - Biete bible

EZEKIELA 22

¹PUMAPA khan a ne sôn a,

²“Famthei miriam, mithattu tamna khopui chungthu rêl rangin ner zoi tâk im? A sintho porinche murdihei khah iril riai roh.

³Pumapa PATHIAN khan hingka hin a ti ti roh: Mithat isong neh mirmil chubai iûna porinchea risiam khopui mongna chu a hong tlung tâk.

⁴Thisen nin îsuahei sikah khan thiamno nin ichang a nit; nin mirmil siamheiah khan porinchen nin om a, nin mongna nikhua chu nin innâi a, a hong itlung thiai tâk a nit. Khasikah khan nam tin imusitin neh nuizabûrin nangni kî siam tâk a nit.

⁵Ringo rikhal irât, khopui rimingiseh tak ni nit sikin ni kôlvêla omhei neh ram ilah taka omhei khomin nang an înui a nit.

⁶Israel ruaituhei murdi khan an khât râtnaah ringatin mithat an isong a nit.

⁷Khopui sunga mi tute khomin mahni nu ne pa marit tho mak a, ram dang mihei an nuaisia a, numeihei neh farahei dik ino takkan nuam ning an lo a.

⁸Ki Mun Rithianghei marit tho ngai mak a, ki sabatnî khom manginṭha ngai mak.

⁹Mi an that theina rangin mi dang an nô ngai a, bôlkuangah mirmil zianga ribôlna ruai an fâk a, an taksa rizukna lo an intlukna rangin khosungah ihur takkan an om ngai a.

¹⁰Ṭhenkan chu mahni pahei nupui an zâlpui a, ṭhenkan nupang an rithiangno lâi khomin zâlrâtin an châipui ngai a.

¹¹Ṭhenkan chu an inrê a, mi nupui an châipui a, an imoihei an châipui a, an pahei nainu, an far ruahei ngêi khom an châipui ngai a.

¹²Mi ithat ranga thamna lâhei khom an om a, â pung rizûlin mahni chipui Israelhei ngêi iropralin fâkinrûk ilan an richong a, keimah ngêi khom an ne irngil phar tâk a nit.” Pumapa PATHIAN thu suak khan a ti.

¹³“Thisen isua neh fâkinrûk nin song sikin ki kuttum ki zuang îṭhum rang a nit.

¹⁴Nin chungah kuttum ke ṭhum tikin nin ituang ngamin zâl nin lei isong thei rang mani? Keimah, Pumapa hin kî ti tâk hih kî len ngêt rang a nit.

¹⁵Nam dang lâiah neh ram tinah nangni chekindar ki ta, khangkah khan ni porinchena khah ki înboi rang a nit.

¹⁶Nam danghei khan nangni enkhûm an ta; khanchu, keimah hi PUMAPA chu ki nit iti riang nin ti.”

¹⁷PUMAPA khan ki ziangah,

¹⁸“Famthei miriam, Israel insungkuahei hih an rêngkan mangmunboi an nit, hâlinzôina meia tangkarua rithît infâi nunga a êk ṭha no dâr hei, ṭin hei, sisâr hei angkah pai hi an nit.

¹⁹Khasikin, keimah, Pumapa PATHIAN hin annihei chu khahei angkana mangmunboi an nit iti atûnah hin ki îril a nit. Anni chu an rêngkan Jerusalemah munkan hong buk ki ti,

²⁰tangkarua hei, dâr hei, sisâr hei hâlinzôina bêlah an sia a, an înzôi ngai angkah hin ki ningthik neh ningmur khan anni chu kâng inzôi a ti.

²¹A nit, anni chu Jerusalemah buk khôm ki ta, an nuaiah meipui sêm pêk ki ta, ki ningthikin hâlinzôi ki ti.

²²Tangkarua, hâlinzôina bêla an ihâl inzôi ngai angkah hin Jerusalemah khan hâlinzôiin om an ta; khanchu, PUMAPA ningthik an irtem a nit iti reh tâng an ti,” a ti a.

²³PUMAPA khan a ne sôn nôk a,

²⁴“Famthei miriam, Israelhei hih iril roh. An ram chu ram thâr inrithiang ino a nit a, ki ningthikna nikhua sika rua dong ino ram a nit.

²⁵An ruaituhei [13] chu sakeibaknei an sa that ihaia ngur angkah hih an nit. Mi an that a, mi sum neh thil iluhei an lâk pêk a, mi itam takkah numeiin an isiam a nit.

²⁶Thiampuhei khan ki dân an musit a, ki thil rithianghei an inbor a, rithiang neh rithiang ino ithlei thei mak a, â fâi neh â nim danglamna khom mi inrisei thei mak e. Ki sabat an ringainêp a, Israel mipui lâiah tutên marit an ne itho no a nit.

²⁷An ruaituhei chu inia inruak, an imu murdi sânphor ngai angkah hi an nit a, an richong theina rang a nitin chu mi nal khom an îsat ngai a nit.

²⁸Zânthlahei khan inlârna dikino an mu a, milak thu rillôkin rông an inâl bang angkah hin an sinthohei chu an ril inṭhat ngai a. Thuno an inpuang a, ‘Pumapa PATHIAN khan hingka hin a ti,’ an ti a, Khanniseh, keimah, Pumapa hin an ziangah thu sîr tlak mang e.

²⁹Mi richonghei khan mi an lêm a, an ropral a, inrianghei neh farahei deng an inthei a, ram dang mihei dik ino takkan an nuaisia a.

³⁰Ram chu ki ningmurin ke siat riai nona rangin a bang ichimhei siam inṭha rang, a siatna munheia lei ingîra lei inzôk rang mi, an lâiah ki zong a, khan tute kî mu no a nit.

³¹Khasikin, ki ningthikna an chungah iṭhum ki ta, ki ningthikna mei khan inrimang a ti; an thil lei tho sikah khan mei chu an chungah ki îṭhum rang a nit,” Pumapa PATHIAN thusuak khan ai ti a nit.