Read Biete EZEKIELA 24 Bible Online

EZEKIELA 24 - Biete bible

EZEKIELA 24

¹Suaka kin itâng kum ikuakna thla sômna, a sûn sômnî-ah khan PUMAPA khan a ne sôn a,

²“Famthei miriam, hi vuaninta tarik hih riziak richik roh, ama sûn hih Babilon rêngin Jerusalem a hual phut nî a nit.

³Ki mi rihel irâthei ziangah ṭongrikhekin hi thu hih iril roh: An ta ranga keimah, Pumapa PATHIAN thusuak ngêi hih iril roh: “Bêl kha mei chungah ichuan unla, Tui sung insip rei.

⁴Satak iṭha tlâk unla, a dârhei neh a malpuihei, A lung-er ru rinoihei khah tlâk insip rei.

⁵Bera ṭha tak that unla, Bêl nuaiah khan thing tua buk buk rei. Tui chu ritlok nguan nguan sela, A ruhei neh a takhei chu min riseh.”

⁶Pumapa PATHIAN khan hingka hin a ti: “Mithattuhei khopui chung chu ân khôk e! Ilap viat ngai ino bêl in-êk angkah hih a nit. Sa tlin khah ithlei loiin a rêngkan thur suak vang rei.

⁷Khopuiah khan mithatna a om a, an thisen khah lungpui ihûl chungah a luang, rinêngah luang seh chu ipilin a irkhû rang a nit.

⁸Ithup a nit nona rangin lungpui ihûl chungah ki înluang a nit; ningthikna phuba ki lâk theina rang mun ngêiah khan ki înluang a nit.”

⁹Pumapa PATHIAN khan hingka hin a ti: “Mithattuhei khopui chung chu ân khôk e! Keimah ngêi hin thingthu chu kî ron ngit rang a nit.

¹⁰Thing hong ipom ngut unla, mei chu sêm inchok vung vung unla; sa chu min zôi neng sela, suang inkang unla, a ruhei chu inkâng vang rei.

¹¹Dâr bêl irong kha mei ri-al chungah ichuan ṭian unla, iling vung riseh. Khanchu, a bêl-êk khah a kâng riai tenan bêl kha rithiang nôk tâng a ti.

¹²A bêl-êk ikop khah ilap infâi tum khom inla, infâi thei no tin e, mei bangin a înfâi thei a nit. [15]

¹³Jerusalem, ni hurna khan borinnimin nang ai siam tâk a nit. Nang thâr inrithiang ki tuma chu ni irthiang thei ino a nit. Ki ningthikna mei ni tuang mâkah chu ni irthiang khâi ino rang a nit hih.

¹⁴Keimah, Pumapa PATHIAN hin ki ti tâk a, ki zoro hong tlung a ta, kî tho ngêt rang a nit. Ni sual chu â riano om tho no ning a, lung nang inkham no ning a, khoza khom nei no ning e. Ni sintho neh ni omdân angkah takin ni chungah roi kî rêl rang a nit.” Pumapa PATHIAN thu suak khan a ti.

¹⁵PUMAPA khan a ne sôn a,

¹⁶“Famthei miriam, ni lungthlung tak chungah khan voikazelin natna ithlun ki ta, nang kî lâk inrimang pêk rang a nit. Ni nuar rang ni mak a, ni ṭap rang khom ni mak a, ni mitrithli khom ne ṭhul rang ni mak.

¹⁷Ner niak irî mi inreh non la, lusûn angkan om no roh, lukôm tho loiin manih, ke khotlongin manih tual suak no roh. Ni mâi chu rikhû non la, lusûnhein an ifâk an inêk ngai fâknêk fah no roh,” a ti a.

¹⁸Kha nî zîngah khan mipui ziangah thu ke sîr a, kholoiah chu ki nupui kha a thi zel tâk a. Thu a ne pêk lam angkah takin atûk zîngah chu ki tho tâk a.

¹⁹Mihei khan, “Itho tâk im hingkana nî tho, ne ril roh,” an ti a.

²⁰Khanchu, an ziangah, “PUMAPA khan a ne sôn a, ki ziangah

²¹ama thu hih nangmani Israel insungkuahei nangni peh rangin a ne îril a nit. Ringai rei, ki Tempil, sinthotheina nin isong tak tak, â en nin ichim ino neh nin ikan tak tak nin fe maina ngai khah PUMAPA khan porinchen ai siam rang a nit. Nin naipahei nin nainuhei Jerusalema la omhei kha khandaiin sât that an ti.

²²Khanchu, ki tho lam angkah takah hin nin itho rang a nit: Nin mâi rikhû no tin ua, lusûnhein an ifâk an inêk ngai fâknêk khom fah no tin u.

²³Lu kôm loiin manih, pheikok ribun loiin manih tual suak no tin ua, lusûnin nin ṭap rang ni mak. Nin sualnahei sikin irung nin ta, nin ṭap inrisâi nin ti.

²⁴Nin ta ranga risin nîng ki ta, kî tho lam angkah takah hin nin itho rang a nit. PUMAPA khan hihei murdi hih a tlung tenan chu Pumapa PATHIAN a nit iti reh tâng nin ti.”

²⁵PUMAPA khan, “Famthei miriam, an lômna neh an isong, â en an ichim ino, an ikan a, an fe maina ngai Tempil chu sut pai ki ta, an naipahei an nainuhei chu lah pêk riai ki ti.

²⁶Amahih ki tho nî tenan chu â zôk la om isunhei chu ni ziangah hong a ta, ama thu hih nang hong iril an ti.

²⁷Kha nikhua ngirah khan ṭong thei nôk tâng ni ta, a hong izôkhei khah risônpui thei tâng ni ti. Khanchu, an ta rangin risinsiana nîng ni ta, PUMAPA chu ki nit iti reh tâng an ti,” a ti a.