Read Biete EZEKIELA 25 Bible Online

EZEKIELA 25 - Biete bible

EZEKIELA 25

¹PUMAPA khan a ne sôn a,

²“Famthei miriam, Amon ram tiang ngat inla, anmani demin thu inpuang roh.

³Keimah, Pumapa PATHIAN thusuak hih ringai rangin anni chu iril roh: Ki Tempil borinnimin a om a, Israel ram isehchitin a om a, Judai ram mihei bôia iṭhuia an om lâiah khan nin lôm tak tak a.

⁴Khasikin, nin lei riiam sikah khan khosak ramchâra nam iomhei nangni ki înrûn rang a nit. Ni ram sungah riabuk hong khuar an ta, an puan inhei hêm indet an ti. Nin thei irâhei fâng an ta, nin ran dûthei chu nangni in pêk an ti.

⁵Raba khopui chu saringsei lêngna munin siam ki ta, Amon ram pumpui chu bera vâina munin siam ki ti; khanchu, PUMAPA chu ki nit iti riang nin ti.

⁶“Pumapa PATHIAN khan hingka hin a ti: Israel ram chu a siat sikin musit takkan râifânin kut ne bên a, hong ritôp ner tôp vêl a;

⁷khasikin, ringai roh, ni chungah kut iṭhum ki ta, nam danghei kutah nang pêng ki ta, an râllâk sum chang ni ti. Nang isehchit ki ta, nama tep inrup ni khâi ngai no tin a, ram khom nei khâi no tin e. Khanchu, keimah hi PUMAPA chu ki nit iti reh tâng ni ti.”

⁸Pumapa PATHIAN khan hingka hin ai ti a nit: “Moab neh Seir [16] khan Judai ram khom ram danghei angkah pai a nit hih an ti a.

⁹Khasikin, Moab ramrî rungtu khopuihei chu inrûn ki ta, ram enihoi taka khopui Beth Jesimot hei, Baal Meon hei, Kiriathaim hei chu inrûn ki ti.

¹⁰Moab chu Amon neh khan khosak ramchâra nam iomhei kha inrûn ki ta; khanchu, Moab khah nama tep inrup ni khâi no nih.

¹¹Moab chu kuttum thông ki ta; khanchu, Keimah hi PUMAPA chu ki nit iti reh tâng an ti.”

¹²Pumapa PATHIAN khan hingka hin a ti: “Edom khan Judai ram chungah phuba a lâk ngek ngek a, kha phuba lâkna khan thiamchang nona Edom chungah a hong îthlun titak a nit.

¹³Khasikin, Pumapa PATHIAN hin kî ti a nit: Edom chungah ki kut iṭhum ki ta; miriam khom, ran khom kî that riai rang a nit. Teman khopui ata Dedan khopui idênin inram ki ta, mihei chu khandaiin ithat nîng an ti.

¹⁴Ki mi Israelhei khan Edom chungah phuba ne lah pêk ta, ki ningthikna natinsattak chu Edom an înritem rang a nit. Phuba kî lâk a nit iti Edom khan reh tâng a ti,” Pumapa PATHIAN thu suak khan a ti.

¹⁵Pumapa PATHIAN khan hingka hin a ti: “Filistiahei khan an kumkhua râl chungah nunter takkan phuba an lâk a, musit takkan an isiat chit a.

¹⁶Khasikin, Filistiahei chu doi ki ta, kî that inrimang vang rang a nit iti hih ki inpuang a nit. A la dam isun Filistia Phâia omhei [17] khom that vang ki ti.

¹⁷Ningthik rikhêl takkan kuttum thông ki ta, an chungah phuba lâng ki ti. Ki ningthik inrît ritem an ta; khanchu, PUMAPA chu ki nit iti reh tâng an ti.”