Read Biete EZEKIELA 26 Bible Online

EZEKIELA 26 - Biete bible

EZEKIELA 26

¹Suaka kin itâng kum sômleikhatna, thla [18] sûn masa takah khan PUMAPA khan a ne sôn a.

²“Famthei miriam, Tura mihei khan Jerusalem chungchângah râifân takkan, ‘Jerusalem chu a siat vang tâk! Rivai thona tianga a thuneina a boi tâk! Tiklâi khomin ner siakpui thei[19] khâi no nih,’ itin an ipâi a.

³“Khasik takah khan atûnah hin Keimah, Pumapa PATHIAN hin kî ti a nit: O Tura khopui, ne râl ki nit tâk hih. Nam dang itam takkah nang idoi rang hong ṭhui ki ta, tuipui rifôn angkan an ihong rang a nit.

⁴Ni khopui kulbanghei isehchit an ta, ni in risânghei isim an ti. Khanchu, a chunga pil khah phît infâi liai ki ta, lungpharpha ringot ni tâng a ti.

⁵Tuikhangliana inga mantuhei lên phoina chang a ti. Keimah, Pumapa PATHIAN hin kî ti tâk chu kî ti tâk a nit. Tura chu nam danghei ranga râllâk sum chang a ta,

⁶a ram rizat khuaheia mi omhei khah an khandaiin that an ti; khanchu, keimah hi PUMAPA chu ki nit iti Tura khan reh tâng a ti.”

⁷Pumapa PATHIAN khan hingka hin a ti: “Babilon rêng, Nebukadnezara, rêng roinpui tak chu Tura doi rangin mâr tianga rithokin sakor hei, tâli hei, sakor chungchuang mihei, sipai hei, lôm itam takkah neh ki hong iṭhui rang a nit.

⁸Ram rizat khuaheia om mihei chu khandaiin thîng an ta, irâlhein ribîkna khurhei choih an ta, rinêng inpông an ta, ipho neh nang an ihual vang rang a nit.

⁹Bang sukisiatna mang an ta, ni in risânghei chu thîr tumin ito sim an ti.

¹⁰An sakor ipâl bâlikhutorin nang ibô khap a ta; sakor hei, tâli hei, sakor chungchuang mihei rihu khan kul banghei chu innîng dur dur a ta; khopui iram kotbâiheiah an ithleng thal thal ngai angkah hin ni kul kotbâiheiah khan lût an ti.

¹¹Ni kotsuahei chu an sakor chungchuang mihei khan sirinphit an ta, an khandaiin ni mihei that an ti. Ni lungphun idet tak takhei chu inlîr an ti.

¹²Ne râlhei khan ner chonhei neh ni neinun zuarhei chu an nuam lam takkan lâng an ta; ni kul banghei isim riai an ta, ni in ihoihei chu ṭhet chit an ta, lunghei, thinghei neh thil ichimhei chu lâng an ta, tuikhanglianah pai an ti.

¹³Nin lasak irî vung vung ngai khah inmong ki ta, nin seranda rîhei khom ki îndâi rang a nit.

¹⁴Lungpharpha bangin nang siam ki ta, inga mantuhei lên phoina ngai chang ni ti. Khopui angkan nang inding nôk tlak khâi no nih. Keimah, Pumapa PATHIAN hin kî ti a nit.”

¹⁵Tura khopui ziangah Pumapa PATHIAN khan hingka hin a ti: “Irûna ni om tikin chu mi an ithat rihu, popliam ituanghei ṭap khêk irî sikah khan tuipui rikama omhei kha rilônthingin om an ti.

¹⁶Tuikhanglian rikama rênghei chu an rêngṭhungmun ata zuang ṭum an ta, an rêngpuanhei neh an silbom iṭha tak takhei khah khek an ta, inthing pumin rinêngah iṭhung an ti. Ni vânduai tong khah inrît an ti tak tak sikin sûtin ibô a ti.

¹⁷Hi lâah hin nang ṭâ an ti: “Khopui riming inthang chu isehchit a nit tâk. Arkuanghei chu tuikhanglianah armang zoi tâk. Hi khopuia mihei hih tuikhangliana thuneitu an nit a, Tuipui rikama om murdihei ṭisim an nit ngai a.

¹⁸Â lîr nî-ah khan tuihualhei chu an inthing a, Inrimang a om nî-ah khan, Tuihuala mihei chu lung âminvâiin an iom a nit.”

¹⁹PUMAPA PATHIAN khan hingka hin a ti: “Tute om nona khoram angkan nang inram ki ta, tuikhanglian inthûk takah nang inrinîk ki ta, tuikhanglianin nang chîm inrimang a ti.

²⁰Tianlâi mihei fena khur inthûk mithi khuaah khan nang iṭhul ki ti. Khanchu, rinêng thuai kumtluang mun iramah khan nang in-om ki ta, mi ring ramah mun nei khâi no tin e.

²¹Nang inrimang ki ta, rimanga ni omna hi mi tinin ṭîng an ti. Nang zong nang zong khom seh, nang mu tlak khâi no nih,” Pumapa PATHIAN thu suak khan a ti.